ନନ୍ଦିଘୋଷ ବ୍ୟୁରୋ : ଇରାନ୍ ଗୁପ୍ତ ଭାବେ ଚୀନ୍ ନିର୍ମିତ ଏକ ଉଚ୍ଚ ରିଜୋଲ୍ୟୁସନ୍ ସ୍ପାଇ ସ୍ୟାଟେଲାଇଟ୍ କିଣି ଆମେରିକାର ମଧ୍ୟପ୍ରାଚ୍ୟରେ ଥିବା ସୈନ୍ୟ ଘାଟିଗୁଡ଼ିକୁ ନିରୀକ୍ଷଣ ଏବଂ ଟାର୍ଗେଟ୍ କରିବାରେ ବ୍ୟବହାର କରିଥିବା ଏକ ବଡ଼ ରିପୋର୍ଟ ପ୍ରକାଶ ପାଇଛି। ଇରାନର ଇସ୍ଲାମିକ୍ ରେଭୋଲ୍ୟୁସନାରୀ ଗାର୍ଡ୍ କର୍ପ୍ସ (IRGC) ଏହି ସ୍ୟାଟେଲାଇଟ୍ ବ୍ୟବହାର କରି ଯୁଦ୍ଧ ସମୟରେ ଆମେରିକାର ଘାଟିଗୁଡ଼ିକର ପୂର୍ବ ଏବଂ ପର ଚିତ୍ର ଉଠାଇଥିଲା। ୨୦୨୪ ଶେଷ ଭାଗରେ ଇରାନ୍ ଚୀନର ଏକ କମ୍ପାନୀରୁ TEE-01B ନାମକ ଏହି ପୃଥିବୀ ପର୍ଯ୍ୟବେକ୍ଷଣ ସ୍ୟାଟେଲାଇଟ୍ କିଣିଥିଲା। ଏହା ଚୀନ୍ରୁ ଲଞ୍ଚ୍ ହେବା ପରେ “ଇନ୍-ଅର୍ବିଟ୍ ଡେଲିଭରୀ” ମାଧ୍ୟମରେ ଇରାନ୍କୁ ହସ୍ତାନ୍ତରିତ ହୋଇଥିଲା। ଏହି ଡିଲ୍ରେ ଇରାନ୍କୁ ଚୀନ୍ରୁ ସ୍ୟାଟେଲାଇଟ୍ ନିୟନ୍ତ୍ରଣ ଏବଂ ଡାଟା ସେବା ମଧ୍ୟ ମିଳିଥିଲା।
TEE-01B ସ୍ୟାଟେଲାଇଟ୍ ପ୍ରାୟ ୦.୫ ମିଟର ରିଜୋଲ୍ୟୁସନ୍ରେ ଛବି ଉଠାଇପାରେ, ଯାହା ଇରାନର ନିଜସ୍ୱ ନୂର-୩ ସ୍ୟାଟେଲାଇଟ୍ର ତୁଳନାରେ ବହୁତ ଉନ୍ନତ। ଏହା ସାହାଯ୍ୟରେ ଇରାନ୍ ସାଉଦି ଆରବ, ବାହାରୀନ୍ ଏବଂ ଇରାକ୍ରେ ଥିବା ଆମେରିକାର ଏୟାର ଘାଟିଗୁଡ଼ିକୁ ନିରୀକ୍ଷଣ କରିଥିଲା ଏବଂ ମିସାଇଲ୍ ଓ ଡ୍ରୋନ୍ ଆକ୍ରମଣ ପୂର୍ବରୁ ଏବଂ ପରେ କ୍ଷୟକ୍ଷତି ଯାଞ୍ଚ କରିଥିଲା।ଏହି ସ୍ୟାଟେଲାଇଟ୍ ଚୀନର Earth Eye Co. ପକ୍ଷରୁ ଲଞ୍ଚ୍ କରାଯାଇଥିଲା। ପରେ ଏହାକୁ ଇରାନର ଇସ୍ଲାମିକ୍ ରେଭୋଲ୍ୟୁସନାରୀ ଗାର୍ଡ୍ କର୍ପ୍ସର ଏରୋସ୍ପେସ୍ ଫୋର୍ସ ନିଜ ନିୟନ୍ତ୍ରଣକୁ ନେଇଥିଲା।
ରିପୋର୍ଟ ଅନୁସାରେ ଏହି ସ୍ୟାଟେଲାଇଟ୍ ମାର୍ଚ୍ଚ ୧୩, ୧୪ ଓ ୧୫ ତାରିଖରେ ସାଉଦି ଆରବର ପ୍ରିନ୍ସ ସୁଲତାନ୍ ଏୟାର ବେସ୍ର ଫଟୋ ଉଠାଇଥିଲା। ମାର୍ଚ୍ଚ ୧୫ ତାରିଖରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୂଚନା ଦେଇଥିଲେ ଯେ ଏୟାରବେସ୍ରେ ଥିବା ଏକ ଆମେରିକୀୟ ଯୁଦ୍ଧ ବିମାନକୁ ନଷ୍ଟ କରାଯାଇଥିଲା। ସେହିପରି କୁଏତ୍ ସ୍ଥିତ ଏୟାରବେସ୍ ଏବଂ ଓମାନ୍ ସ୍ଥିତ ଅନ୍ତର୍ଜାତୀୟ ବିମାନବନ୍ଦର ସମ୍ପର୍କରେ ମଧ୍ୟ ଅନେକ ତଥ୍ୟ ଇରାନ୍ ନିକଟକୁ ଯାଇଥିବା ସୂଚନା ମିଳିଛି।ଏହି ଖବର ପ୍ରକାଶ ପାଇବା ପରେ ଚୀନ୍ ଏହାକୁ “ଅସତ୍ୟ ଏବଂ ଅନୁମାନଭିତ୍ତିକ” ବୋଲି ଖଣ୍ଡନ କରିଛି। ବିଶେଷଜ୍ଞମାନେ କହୁଛନ୍ତି ଯେ, ଏହି ଘଟଣା ଚୀନ୍-ଇରାନ୍ ମଧ୍ୟରେ ବଢ଼ୁଥିବା କୌଶଳିକ ସହଯୋଗର ଏକ ନୂତନ ଉଦାହରଣ। ଇରାନ୍ ଏହି ସ୍ୟାଟେଲାଇଟ୍ ସାହାଯ୍ୟରେ ନିଜର ଆକ୍ରମଣ କ୍ଷମତାକୁ ବହୁତ ବଢ଼ାଇ ପାରିଛି ବୋଲି ମନେ କରାଯାଉଛି।
