୨୦୧୩ ମସିହାରୁ କରୋନା ରାଜ୍ ଲୁଚାଉଛି ଚାଇନା !

ନୂଆଦିଲ୍ଲୀ: କରୋନା ଭାଇରସ୍ ମହାମାରୀକୁ ନେଇ ଚୀନ ଉପରେ ପୂର୍ବରୁ ବହୁ ଅଭିଯୋଗ ହୋଇ ଆସୁଛି । ଏବେ ଏକ ରିପୋର୍ଟରେ ଖୁଲାସା ହୋଇଛି ଚୀନ ୭ ବର୍ଷ ପୂର୍ବେ ଏମିତି ଏକ ଭାଇରସ୍ ଷ୍ଟ୍ରେନକୁ ଜାଣିବାକୁ ପାଇଥିଲା । ଯାହାକୁ ବର୍ତ୍ତମାନର କରୋନା ଭାଇରସର ନିକଟତମ ବୋଲି କୁହାଯାଇଛି । ଏକ ବ୍ରିଟିଶ ୱେବସାଇଟ୍ ମୁତାବକ, ଚୀନ୍ ୨୦୧୩ ମସିହାରୁ ଭାଇରସ୍ ବାବଦରେ ଜାଣିଥିଲେ ବି ତଥ୍ୟ ଲୁଚାଇ ରଖିଥିଲା ।

ସେହିଭଳି ଅନ୍ୟ ଏକ ରିପୋର୍ଟରେ କୁହାଯାଇଛି- ବାଦୁଡ଼ି ଓ ମୂଷା ରହୁଥିବା ଏକ ଗାତରୁ ୨୦୧୩ ମସିହାରେ କରୋନା ଭାଇରସ୍ ଷ୍ଟ୍ରେନ୍ ସମ୍ବନ୍ଧୀୟ ତଥ୍ୟ ଚୀନ୍ ପାଇଥିଲା । ଆଉ ଏହି ଭାଇରସର ଷ୍ଟ୍ରେନକୁ ଚୀନ ବୁହାନର ସେହି ବିବାଦୀୟ ଲାବରେ ଏତେ ବର୍ଷ ଯାଏଁ ରଖି ଆସିଥିଲା ।

କିଛିଦିନ ତଳେ ବିଶ୍ୱ ସ୍ୱାସ୍ଥ୍ୟ ସଂଗଠନ ବା ଡବ୍ଲୁଏଚଓ କରୋନା ଭାଇରସର ଉତ୍ପତ୍ତି ସ୍ଥଳ ଚୀନ ଯାଇ ଅନୁଧ୍ୟାନ କରିବ ବୋଲି କହିଥିଲା । ଏବେ, ୭ ବର୍ଷ ତଳର ଭାଇରସ୍ ଷ୍ଟ୍ରେନର ସୂଚନା କରୋନା ଉତ୍ପତ୍ତି ଉପରେ ଗୁରୁତ୍ୱପୂର୍ଣ୍ଣ କୁହାଯାଉଛି ।

ପ୍ରକୃତରେ ୨୦୧୨ ମସିହାରେ ଖଣିରେ କାମ କରୁଥିବା ୬ ଜଣ ଲୋକଙ୍କୁ ଜ୍ୱର, କାସ, କଫ ଓ ନିମୋନିଆ ହୋଇଥିଲା । ସେଥିମଧ୍ୟରୁ ୩ ଜଣଙ୍କ ସ୍ୱାସ୍ଥ୍ୟାବସ୍ଥା ବହୁତ ଖରାପ ଥିଲା । ରିପୋର୍ଟ ଅନୁଯାୟୀ, ଆକ୍ରାନ୍ତଙ୍କ ମଧ୍ୟରୁ ୪ ଜଣଙ୍କ ଶରୀରରେ କରୋନା ଭାଇରସ୍ ଆଣ୍ଟିବଡିଜ୍ ମିଳିଥିଲା । କିନ୍ତୁ, ଯାଞ୍ଚ ପୂର୍ବରୁ ୨ ଜଣଙ୍କ ମୃତ୍ୟୁ ହୋଇଥିଲା ।

ଫେବ୍ରୁଆରୀରେ ଡା. ଶି ଝେଙ୍ଗଲି କରୋନା ଭାଇରସ୍ ଉପରେ ଏକ ଏକାଡେମିକ ପେପର ପ୍ରସ୍ତୁତ କରିଥିଲେ । ନେଚର ଜର୍ନାଲରେ ପ୍ରକାଶିତ ରିପୋର୍ଟ ପ୍ରକାରେ, ବୁହାନ ସ୍ଥିତ ଲାବରେ ଚୀନ ବାଦୁଡ଼ି ଠାରୁ ମଳିଥିବା RaTG13 ଭାଇରସ୍ ରଖିଥିଲା । ଯାହାର ୯୬.୨ ପ୍ରତିଶତ କରୋନା ଭାଇରସ୍ ଠାରେ ମିଳେ । କିନ୍ତୁ ଶି ଝେଙ୍ଗଲିଙ୍କ ଜଣେ ସହଯୋଗୀଙ୍କ ଅନୁଯାୟୀ RaTG13 ହେଉଛି ସେହି ନମୁନା ଯାହା ଖଣିରୁ ମିଳିଥିଲା । ଏବଂ ଏହାର ସୂଚନା ସାର୍ବଜନୀନ କରାଯାଇ ନଥିଲା ।

ଏହା ପୂର୍ବରୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏପ୍ରିଲ୍ ମାସରେ କହିଥିଲେ- ପ୍ରମାଣ ଦେଖିବା ପରେ ଭରସା ହୋଇଛି କରୋନା ଭାଇରସ୍ ଚୀନ ବୁହାନ ସ୍ଥିତ ଇନଷ୍ଟିଚ୍ୟୁଟ୍ ଅଫ୍ ଭାୟରୋଲିଜିରୁ ଆସିଛି । କିନ୍ତୁ, ଚୀନ୍ ଲାବରୁ ଭାଇରସ୍ ସଂକ୍ରମଣ ବ୍ୟାପିଥିବା କଥାକୁ ଅଗ୍ରାହ୍ୟ କରି ଆସୁଛି ।