ଗଲବାନ ଘାଟିରୁ ପଛକୁ ହଟିବ ଚୀନ, ହେଲେ ପୈଙ୍ଗୋଙ୍ଗକୁ ନେଇ ସ୍ଥିତି ଗମ୍ଭୀର

ନୂଆଦିଲ୍ଲୀ: ଭାରତ-ଚୀନ୍ ସୀମା ମଧ୍ୟରେ ଥିବା ସମସ୍ୟାର ସମାଧାନ ପାଇଁ ଦୁଇ ଦେଶ ମଧ୍ୟରେ ହୋଇଥିବା କୋର କମାଣ୍ଡର ସ୍ତରୀୟ କଥାବାର୍ତ୍ତା ତୃତୀୟ ପାଳିରେ ମଧ୍ୟ କୌଣସି ସମାଧାନ ମିଳିନାହିଁ । ସରକାରୀ ସୂତ୍ର ଅନୁଯାୟୀ, ପୂର୍ବରୁ ଦୁଇ ଦେଶ ମଧ୍ୟରେ ହୋଇଥିବା ଆଲୋଚନା ପରେ ଚୀନ୍ ଗଲବାନ୍ ଉପତ୍ୟକାର LAC ନିକଟରେ ଥିବା କେତେକ ଅଞ୍ଚଳରୁ ନିଜର ସୈନ୍ୟ ଘୁଞ୍ଚାଇବାକୁ ରାଜି ହୋଇଛି କିନ୍ତୁ ଏପର୍ଯ୍ୟନ୍ତ ପୈଙ୍ଗୋଗ ହ୍ରଦକୁ ନେଇ କିଛି ସମାଧାନର ବାଟ ବାହାରିନାହିଁ ।

ବାସ୍ତବରେ, ଦୁଇ ଦେଶ ମଧ୍ୟରେ ଅନେକ ପ୍ରସଙ୍ଗରେ ସହମତି ନାହିଁ । ଆଗରୁ ହୋଇଥିବା ପାରାମିଟର ଅନୁଯାୟୀ ଚୀନ୍ ଗଲବାନ୍ ଉପତ୍ୟକାରୁ ପଛକୁ ହଟିବାକୁ ରାଜି ହୋଇଛି, କିନ୍ତୁ ପୈଙ୍ଗୋଗ ହ୍ରଦ ନିକଟରେ ଉଭୟ ସୈନବାହିନୀ ପଛକୁ ଫେରିବାକୁ ରାଜି ନାହାଁନ୍ତି । ଭାରତୀୟ ସେନା ଫିଙ୍ଗର -୪ ରେ ଅଛି, ଏହି ଅଞ୍ଚଳ ପୂର୍ବରୁ ଭାରତ ଅଧୀନରେ ଅଛି । ଭାରତ ଫିଙ୍ଗର -୮କୁ LAC ବୋଲି ଦାବି କରୁଛି । ଏଭଳି ପରିସ୍ଥିତିରେ ମଙ୍ଗଳବାର ଦିନ ଚୁସୁଲରେ ଭାରତ ଏବଂ ଚୀନ୍ ବାହିନୀ ମଧ୍ୟରେ କୋର୍ କମାଣ୍ଡର ସ୍ତରୀୟ ବୈଠକର ମଧ୍ୟ କୌଣସି ଫଳାଫଳ ମିଳିନାହିଁ ।

ପୈଙ୍ଗୋଗ ଏବଂ ଗଲବାନ ପରି ଡେପସାଙ୍ଗ ଏବଂ ଡେମଚୋକରେ ମଧ୍ୟ ଚୀନ୍ ସେନା ପଛକୁ ଘୁଞ୍ଚୁନାହାଁନ୍ତି । ସୈନ୍ୟ କମାଣ୍ଡରଙ୍କ ମଧ୍ୟରେ ହୋଇଥିବା ଶେଷ ବୈଠକରେ ଚୀନ୍ କହିଥିଲା, ସେ ଗଲବାନରେ କ୍ଲେମ୍ ଲାଇନଠାରୁ ୮୦୦ ମିଟର ଦୂରରେ ଅଛି । ଜୁନ୍ ୨୨ରେ ଅନୁଷ୍ଠିତ ବୈଠକରେ ଚୀନ୍ କହିଥିଲା, ଗଲବାନର PP-୧୪ରେ ମାତ୍ର ୧୦୦ରୁ ୧୫୦ମିଟର ଭିତରକୁ ସେ ଆସିଥିଲେ ।
ଲଦାଖରେ ଏହି ବାର୍ତ୍ତାଳାପ ସହିତ ପରିଚିତ ସରକାରୀ ସୂତ୍ର ନ୍ୟୁଜ-18କୁ କହିଛି ଯେ ଲେହ ସ୍ଥିତ XIV କୋର୍ କମାଣ୍ଡର ଲେଫ୍ଟନାଣ୍ଟ ଜେନେରାଲ୍ ହରିନ୍ଦର ସିଂ ଏବଂ ତାଙ୍କର ଚୀନ୍ ସମକକ୍ଷ ମେଜର-ଜେନେରାଲ୍ ଲିୟୁ ଲିନ୍ ଦୀର୍ଘ ଦିନ ଧରି ଏହି ପ୍ରସଙ୍ଗରେ କଥା ହୋଇଥିଲେ । ଉଭୟ LAC ସମେତ କେତେକ କ୍ଷେତ୍ରରୁ ନିଜ ସୈନ୍ୟ ପ୍ରତ୍ୟାହାର କରିବାକୁ ସହମତି ପ୍ରକାଶ କରିଥିଲେ।

PP-14 ସେହି ସ୍ଥାନ ଯେଉଁଠାରେ ୧୫ ଜୁନ୍ ରାତିରେ ଦୁଇ ସୈନ୍ୟ ମଧ୍ୟରେ ରକ୍ତାକ୍ତ ସଂଘର୍ଷ ହୋଇଥିଲା | ଏହି ସଂଘର୍ଷରେ ୧୬ ବିହାର ରେଜିମେଣ୍ଟର କମାଣ୍ଡିଂ ଅଫିସର କର୍ଣ୍ଣେଲ ବି ସନ୍ତୋଷ ବାବୁଙ୍କ ସମେତ ଭାରତୀୟ ସେନାର ୨୦ ସୈନିକ ସହିଦ୍ ହୋଇଥିଲେ। ତେବେ ଚୀନ୍‌ରୁ ଆହତଙ୍କ କୌଣସି ସରକାରୀ ବିବୃତ୍ତି ଜାରି କରାଯାଇ ନାହିଁ।

ସରକାରୀ ସୂତ୍ର ଅନୁଯାୟୀ,ବର୍ତ୍ତମାନ ପୈଙ୍ଗଗ ହ୍ରଦ ମାମଲାରେ କିଛି କଥାର ସମାଧାନ ଦେଖିବାକୁ ମିଳୁଛି । ଏଠାରେ ୧୫ଜୁନ୍ ଦିନ ସଂଘର୍ଷ ହୋଇଥିଲା, ଉଭୟ ପାର୍ଶ୍ୱରେ ଥିବା ସୈନିକ ଏହି ସଂଘର୍ଷରେ ଗୁରୁତର ଆହତ ହୋଇଥିଲେ।

ଜଣେ ଅଧିକାରୀଙ୍କ ସୂଚନା ମୁତାବକ, ‘ପିଏଲଏ କମାଣ୍ଡରମାନେ ପୈଙ୍ଗଗରେ ବର୍ତ୍ତମାନ ପର୍ଯ୍ୟନ୍ତ କୌଣସି ନମନୀୟତା ଦେଖାଇ ନାହାଁନ୍ତି । ମୁଁ ଭାବୁଛି ଯେ ଆମେ ସମୟ ଅନୁସାରେ ଆଗକୁ ଗତି କରୁଛୁ । ଏଭଳି ପରିସ୍ଥିତିରେ ୱାନ୍ ସଟ୍ ସେଟଲମେଣ୍ଟ ଆଶା କରାଯାଇପାରିବ ନାହିଁ।’

ଭାରତ ଏବଂ ଚୀନ୍ ମଧ୍ୟରେ ଲଦାଖରେ ମେ ୫ରୁ ବିବାଦ ଲାଗି ରହିଛି । ଲଦାଖର ଗାଲୱାନ୍ ଉପତ୍ୟକାରେ ୧୫ ଏବଂ ୧୬ଜୁନ୍ ରାତିରେ ଦୁଇ ଦେଶ ମଧ୍ୟରେ ଏହି ବିବାଦ ଏକ ହିଂସାତ୍ମକ ସଂଘର୍ଷରେ ପରିଣତ ହୋଇଥିଲା ଯେଉଁଥିରେ ଭାରତର ୨୦ ଜଣ ସୈନିକ ସହିଦ ହୋଇଥିଲେ। ଏଥିରେ ଚୀନ୍ ମଧ୍ୟ ବହୁତ କ୍ଷତି ସହିଥିଲା । ବିବାଦ ଆରମ୍ଭ ପୂର୍ବରୁ ଦୁଇ ଦେଶ ମଧ୍ୟରେ ଅନେକ ସାମରିକ ଏବଂ କୂଟନୈତିକ ସ୍ତରର ଆଲୋଚନା ହୋଇଥିଲା । ଯାହା ପରେ ଉଭୟ ଦେଶ ନିଜର ସୈନ୍ୟବାହିନୀକୁ ପଛକୁ ଘୁଞ୍ଚେଇବାକୁ ରାଜି ହୋଇଛନ୍ତି। ଦୀର୍ଘ ୪୫ ବର୍ଷ ମଧ୍ୟରେ ସୀମାରେ ଏହା ହିଂସାର ସବୁଠାରୁ ବଡ଼ ଘଟଣା ଥିଲା |