ମରଣ ମୁହଁରୁ ଫେରିଲା ଶିଶୁ
ସୋର: ଛଳଛଳ ଆଖି । ଅସହାୟ ଚେହେରା । ବିକଳରେ ଚାହୁଁଛି ଏତେତେଣେ । କେଉଁଠି ଅଛି ମୋ ମାଆ । ଏବେ ଦୌଡ଼ି ଆସି ମୋତେ କୋଳାଇ ନେବ । ହେଲେ ନା ମାଆ ଆସୁଛି, ନା ପିଲାଟି ନିଜ ପରିବାର ସମ୍ପର୍କରେ କିଛି କହି ପାରୁଛି । ଏ ହେଉଛି ସୋର ବସ୍ ଦୁର୍ଘଟଣାରେ ମରଣ ମୁହଁରୁ ବର୍ତ୍ତି ଯାଇଥିବା ଏକ କୋମଳମତି ଶିଶୁର କାହାଣୀ । ମେଡିକାଲ ପରିସରରେ ବସି ସମସ୍ତଙ୍କ ମୁହଁକୁ ଚାହୁଁଛି । ଆଶା ଗୋଟିଏ କେହି ତା’ ମାଆ ସମ୍ପର୍କରେ କିଛି ସୂଚନା ଦେବ । ପିଲାଟିକୁ ଦେଖି ଦେଖଣାହାରୀଙ୍କ ହୃଦୟ ମଧ୍ୟ ଫାଟି ପଡୁଛି ।
ଦୁର୍ଘଟଣାରେ ଜଣେ ଶିଶୁ ସହ ୬ ଜଣଙ୍କ ମୃତ୍ୟୁ ଘଟିଛି । ହେଲେ ଭଗବାନଙ୍କ ଅପାର କୃପାରୁ ଦୁର୍ଘଟଣାରେ ମରଣକୁ ଆଖି ଆଗରେ ଦେଖି କାଳକୁ ପରାସ୍ତ କରି ଜୀବନ୍ତ ଫେରି ଆସିଛି ଶିଶୁଟି ।
ପିଲାଟି ଘରର ପରିଚୟ ଦେଇ ପାରୁନି କି ବାପାଙ୍କ ନାଁ କହି ପାରୁନି । କେବଳ ଅସ୍ପଷ୍ଟ ସ୍ବରରେ ମାଆ ସହ ଆସିଥିବା କହୁଛି । ତେବେ କେଉଁଠୁ ଆସିଛି, କେଉଁଠିକୁ ଯାଉଥିଲା ତାହା ମଧ୍ୟ କହି ପାରୁନି । ବାପାମାଆଙ୍କ ସହ ଘରୁ ବସରେ ଆସିଥିବା କହିଛି । ଏମିତି ସ୍ଥିତିରେ ପିଲାଟିର ପରିଚୟ ମିଳିପାରୁନାହିଁ । ବାପାମାଆଙ୍କର ମଧ୍ୟ କୌଣସି ସୂଚନା ମିଳିପାରିନି ।
