୬ ଜିଲ୍ଲାରେ କଣ କ୍ଷୟକ୍ଷତି ଘଟାଇଛି ବାତ୍ୟା ‘ବୁଲବୁଲ୍’ ? ରିପୋର୍ଟ ମାଗିଲେ ମୁଖ୍ୟ ଶାସନ ସଚିବ

ଭୁବନେଶ୍ୱର: ବାତ୍ୟା ‘ବୁଲବୁଲ୍’ ପ୍ରଭାବିତ ୬ ଜିଲ୍ଲାର ଜିଲ୍ଲାପାଳଙ୍କ ସହିତ ଆଲୋଚନା କରିଛନ୍ତି ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ । ଭିଡିଓ କନଫରେନ୍ସିଂ ମାଧ୍ୟମରେ ଜଗତସିଂହପୁର, କେନ୍ଦ୍ରାପଡ଼ା, ଭଦ୍ରକ, ବାଲେଶ୍ୱର, ଯାଜପୁର, ମୟୂରଭଞ୍ଜ ଜିଲ୍ଲାପାଳଙ୍କ ସହ କ୍ଷୟକ୍ଷତି ନେଇ ଆଲୋଚନା କରିଛନ୍ତି । ଜିଲ୍ଲାସ୍ତରୀୟ ଅଧିକାରୀଙ୍କ ସହ ସେଣ୍ଟ୍ରାଲ ଡିଭିଜନ ଆରଡିସି ମଧ୍ୟ ଉପସ୍ଥିତ ଥିଲେ । ଏଥିରେ ୫ଟି ଦିଗ ଉପରେ ଆଲୋଚନା ହୋଇଛି । କ୍ଷୟକ୍ଷତିର ଆକଳନ କରି ୫ ଦିନ ଭିତରେ ରିପୋର୍ଟ ଦେବାକୁ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦିଆଯାଇଛି ।

ବାତ୍ୟା ‘ବୁଲବୁଲ୍’ ଯୋଗୁଁ ୩ ଲକ୍ଷ ହେକ୍ଟର ଜମିରେ ଫସଲ ନଷ୍ଟ ହୋଇଛି । ୨ ଲକ୍ଷ ହେକ୍ଟର ଜମିରେ ପ୍ରାୟ ୩୩ ପ୍ରତିଶତ ଫସଲ କ୍ଷତି ହୋଇଛି । ୫ ହଜାର ୫ ଶହ ଘର ଭାଙ୍ଗିଥିବା ବେଳେ ୧୬ ଲକ୍ଷ ବିଦ୍ୟୁତ ଉପେଭାକ୍ତା ପ୍ରଭାବିତ ହୋଇଛନ୍ତି । ସେଥି ମଧ୍ୟରୁ ୧୫ ଲକ୍ଷ ଉପେଭାକ୍ତାଙ୍କୁ ବିଦ୍ୟୁତ୍ ସଂଯୋଗ ଦିଆ ଯାଇଥିବା ମୁଖ୍ୟ ଶାସନ ସଚିବ ସୂଚନା ଦେଇଛନ୍ତି । ଭଦ୍ରକର ବାସୁଦେବପୁର, ଧାମରା, ଚାନ୍ଦବାଲି, ବାଲେଶ୍ୱରର ଭୋଗରାଇ, କେନ୍ଦ୍ରାପଡ଼ାର ରାଜନଗର ଓ ରାଜକନିକାର କିଛି ଅଞ୍ଚଳ ଏବେ ବି ଜଳ ଘେରରେ ଅଛି । ଏସବୁ ଅଞ୍ଚଳରେ ପ୍ରାୟ ୧ ଲକ୍ଷ ଲୋକ ଅନ୍ଧାରରେ ଅଛନ୍ତି । ସୋମବାର ସନ୍ଧ୍ୟା ସୁଦ୍ଧା ୭୦ ହଜାର ଲୋକଙ୍କୁ ବିଦ୍ୟୁତ୍ ସଂଯୋଗ ଦିଆଯିବ । ମଙ୍ଗଳବାର ସୁଦ୍ଧା ସମସ୍ତଙ୍କୁ ବିଦ୍ୟୁତ୍ ଦିଆଯିବ ।

ଗଣମାଧ୍ୟମର ତଥ୍ୟ ଅନୁଯାୟୀ ବାତ୍ୟା ସମୟରେ ୩ ଜଣଙ୍କ ମୃତ୍ୟୁ ହୋଇଛି । ତେବେ, ୨ ଜଣଙ୍କ ମୃତ୍ୟୁ ସ୍ୱାଭାବିକ ହୋଇଥିବା ବେଳେ ଅନ୍ୟ ଜଣଙ୍କ ମୃତ୍ୟୁ ନେଇ ତଦନ୍ତ ଚାଲିଥିବା ମୁଖ୍ୟ ଶାସନ ସଚିବ କହିଛନ୍ତି । ଅନ୍ୟପଟେ ବାତ୍ୟା ‘ବୁଲବୁଲ୍’ ଯୋଗୁଁ ୧୧ ଗାଈଗୋରୁ ଓ ୪ ଛେଳିଙ୍କ ମୃତ୍ୟୁ ହୋଇଛି । କେନ୍ଦ୍ରାପଡ଼ା ଓ ଜଗତସିଂହପୁରରେ କିଛି ଡଙ୍ଗା ଭାଙ୍ଗିଥିବା ନେଇ ରିପୋର୍ଟ ମିଳିଥିବା ମୁଖ୍ୟ ଶାସନ ସଚିବ ସୂଚନା ଦେଇଛନ୍ତି । ସମୀକ୍ଷା ବୈଠକରେ ଉନ୍ନୟନ କମିଶନର, ଏସଆରସି ପ୍ରଦୀପ ଜେନା, କୃଷି ସଚିବ, ଶକ୍ତି ସଚିବ, ସେସୁ ସିଇଓ ଅରୁଣ ବୋଥ୍ରା ପ୍ରମୁଖ ଉପସ୍ଥିତ ଥିଲେ ।

')}