ସିଂହଦ୍ୱାରରୁ ମହାପ୍ରଭୁଙ୍କୁ ଦର୍ଶନ, ମନ୍ଦିର ଚତୁଃପାର୍ଶ୍ୱ ଉନ୍ନତିକରଣ କାର୍ଯ୍ୟର ସମୀକ୍ଷା

ପୁରୀ: ପୁରୀ ଶ୍ରୀମନ୍ଦିର ଚତୁଃପାର୍ଶ୍ୱ ଐତିହ୍ୟ କରିଡରର ଉନ୍ନତିକରଣ କାର୍ଯ୍ୟର ସମୀକ୍ଷା କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସିଂହଦ୍ୱାର ସମ୍ମୁଖରେ ଠିହାହୋଇ ମହାପ୍ରଭୁଙ୍କୁ ଦର୍ଶନ କଲେ । ଏଥିପାଇଁ ମୁଖ୍ୟମନ୍ତ୍ରୀ ଆଜି ପୁରୀ ଗସ୍ତ କରିଥିଲେ । ସାଙ୍ଗରେ ଥିଲେ ୫-ଟି ସଚିବ ଭି.କେ ପାଣ୍ଡିଆନ୍, ଉନ୍ନୟନ କମିଶନର ସୁରେଶ ମହାପାତ୍ର, ଶ୍ରୀମନ୍ଦିର ମୁଖ୍ୟ ପ୍ରଶାସକ କ୍ରିଷନ କୁମାର ସହ ପୁରୀ ଜିଲ୍ଲାପାଳ ଓ ଏସପି ପ୍ରମୁଖ ଥିଲେ ।

ପୋଲିସ ପ୍ରଶାସନ ଏବଂ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଥିଲା । କଟକଣା କୋହଳ ହେଲା ପରେ ଏବେ ଜୋରସୋରରେ ଆଗେଇ ଚାଲିଛି ସୌନ୍ଦର୍ଯ୍ୟକରଣ କାମ । ସେପଟେ ସମୀକ୍ଷା ପରେ ପ୍ରତିକ୍ରିୟ ରଖିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ । ସେ କହିଛନ୍ତି ମୁଖ୍ୟମନ୍ତ୍ରୀଙ୍କ ଭିଜନ ଅନୁସାରେ ସବୁ କାମ ଚାଲିଛି । ଆଜି ପୁରା ଶ୍ରୀମନ୍ଦିିରର ଚତୁଃପାର୍ଶ୍ୱ ଉନ୍ନତିକରଣ କାର୍ଯ୍ୟକୁ ବୁଲି ଦେଖିଥିଲେ । ଦକ୍ଷିଣ ଦ୍ୱାର ନିକଟରେ ଥିବା ପଂଜାବୀ ମଠ, ଗଣ୍ଡୁଆ ଚଉରା ନିକଟ ନେପାଳ ଭବନ, ପଶ୍ଚିମ ଦ୍ୱାର ନିକଟ ତଥା ମେଘନାଦ ପ୍ରାଚୀର କୁ ଲାଗି ଥିବା ଏକ ଇଲେକ୍ଟ୍ରି ଅଫିସ ମଧ୍ୟକୁ ଯାଇଥିଲେ । କାହିଁକି ୭୫ ମିଟର ପରିଧି ମଧ୍ୟରେ ଏହି ଅଫିସ ରହିଛି ତାହା ପଚାରି ବୁଝିଥିଲେ ।

ଦେଢ଼ ବର୍ଷ ପୂର୍ବରୁ ମୁଖ୍ୟମନ୍ତ୍ରୀ ଶ୍ରୀଜଗନ୍ନାଥ ହେରିଟେଜ କରିଡର ଡ୍ରିମ ପ୍ରୋଜେକ୍ଟର କାର୍ଯ୍ୟ ଆରମ୍ଭ ପାଇଁ ନିର୍ଦ୍ଦେଶ ଦେଇଥିଲେ । ଯେଉଁଥିରେ ୭୫ ମିଟରର ଶ୍ରୀମନ୍ଦିର ଚତୁଃପାର୍ଶ୍ୱ ଐତିହ୍ୟ କରିଡରର ଉନ୍ନତିକରଣ କରାଯିବ । ତେବେ ଏହି ଉନ୍ନତିକରଣ ପାଇଁ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି । ଆଉ ମାତ୍ର ୩ ମାସ ଭିତରେ ଭୂମି ଅଧିଗ୍ରହଣ କାର୍ଯ୍ୟ ସରିଯିବ ବୋଲି  କହିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ । ଏହା ଛଡ଼ା ପୁରୀର ଅନ୍ୟ ସବୁ ପ୍ରୋଜେକ୍ଟକୁ ମଧ୍ୟ ସମୀକ୍ଷ କରିଛନ୍ତି ମୁଖ୍ୟମନ୍ତ୍ରୀ । ପରିକ୍ରମା କେମିତି ହେବ ଓ ଆର୍କିଟକଚର କଣ ରହିବ ସେନେଇ ସମୀକ୍ଷା କରି ଦେଖିଛନ୍ତି ମୁଖ୍ୟମନ୍ତ୍ରୀ ।

ତାଙ୍କ ସାମ୍ନାରେ ସମ୍ପୂର୍ଣ୍ଣ ପ୍ଲାନ ରଖାଯାଇଥିଲା । ସେ ବଡ଼ ଦାଣ୍ଡ ଉପରେ ପ୍ଲାନର ବ୍ଲୁ ପ୍ରିଣ୍ଟ ଦେଖିଥିଲେ । ଦୁଇଟ ପ୍ରୋଜେକ୍ଟର କାର୍ଯ୍ୟ ଆରମ୍ଭ ହୋଇଛି  । ଅନ୍ୟ ୩ଟି ପ୍ରୋଜେକ୍ଟର କାର୍ଯ୍ୟ ଆଉ ୩ ମାସ ମଧ୍ୟରେ ଆରମ୍ଭ ହୋଇଯିବ । ତେବେ ପୁରୀରେ ଯେଉଁ ସବୁ କାର୍ଯ୍ୟ ହାତକୁ ନିଆଯାଇଛି ସେସବୁ ମୁଖ୍ୟମନ୍ତ୍ରୀଙ୍କ ମାର୍ଗଦର୍ଶନରେ ସବୁ ଠିକ୍ ଭାବରେ ହେବ ବୋଲି କହିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ।