ଭୁବନେଶ୍ୱର: ଛବି ସୁଧାରିବାକୁ ପୋଲିସକୁ ପରାମର୍ଶ ଦେଲେ ମୁଖ୍ୟମନ୍ତ୍ରୀ ମୋହନ ମାଝୀ। ଜିଲ୍ଲାପାଳ ଓ ଏସପି ସମ୍ମିଳନୀରେ ମୋହନ ମାଝୀ କହିଛନ୍ତି, ସେବା ଓ ସୁରକ୍ଷା ପୋଲିସର ପ୍ରାଥମିକତା ହେଉ। ଜନସାଧାରଣଙ୍କ ମନରେ ପୋଲିସ ପ୍ରତି ଯେଉଁ ଧାରଣା ଅଛି, ତାକୁ ସୁଧାରିବାକୁ ପଡ଼ିବ। ରାଜ୍ୟରେ ସାଂପ୍ରଦାୟିକ ସଦଭାବନା ବଜାୟ ରଖିବା ଉପରେ ମଧ୍ୟ ଗୁରୁତ୍ଵ ଦେଇଛନ୍ତି ମୋହନ। ଜିଲ୍ଲାରେ ଏସପି ଓ ଜିଲ୍ଲାପାଳଙ୍କ ସମନ୍ଵୟରେ ଜିଲ୍ଲାର ବିକାଶ, ଆଇନ ଶୃଙ୍ଖଳା କେମିତି ବଜାୟ ରଖାଯାଇପାରିବ, ତାଉପରେ ଫୋକସ୍ ଦେବାକୁ କହିଛନ୍ତି ମୁଖ୍ୟମନ୍ତ୍ରୀ।
ସମ୍ମିଳନୀରେ ଆଇନ ଶୃଙ୍ଖଳା, ନକ୍ସଲ ନିପାତ ମାଷ୍ଟର ପ୍ଲାନ୍, କୋଷ୍ଟାଲ୍ ସିକ୍ୟୁରିଟି, ମହିଳା ବିରୋଧୀ ହିଂସା ରୋକିବାକୁ ସମନ୍ୱିତ ଯୋଜନା, ନିଶାମୁକ୍ତ ଓଡ଼ିଶା ପାଇଁ ଯୋଜନା ସମ୍ପର୍କରେ ଆଲୋଚନା ହୋଇଛି। ଏହି ଅବସରରେ ରାଜ୍ୟରେ ପୋଲିସ ଭିତ୍ତିଭୂମିରେ ଉନ୍ନତି ପାଇଁ ମୁଖ୍ୟମନ୍ତ୍ରୀ ଅନେକ ଘୋଷଣା କରିଛନ୍ତି। ପୋଲିସକୁ ଆହୁରି ୯ ହଜାର ମଟର ସାଇକଲ ଦିଆଯିବ। ପ୍ରତି ଥାନାକୁ ଆଉ ଗୋଟିଏ ଲେଖାଏଁ ଚାରି ଚକିଆ ଗାଡ଼ି ଯୋଗାଇ ଦିଆଯିବ। ପ୍ରତି ଜିଲ୍ଲାରେ ହେବ ଓଡ୍ରାଫ ୟୁନିଟ। ଆଉ ୩ଟି ଷ୍ଟ୍ରାଇକିଂ ଫୋର୍ସ ବାଟାଲିୟନ କରାଯିବ। ୧୦ ମେଡିକାଲ କଲେଜରେ ସ୍ଵତନ୍ତ୍ର ଫାଣ୍ଡି ପ୍ରତିଷ୍ଠା ହେବ। ସେହିପରି ଶ୍ରୀମନ୍ଦିର ପାଇଁ ସ୍ଵତନ୍ତ୍ର ବାଟାଲିୟନ ହେବ। ଜିଲ୍ଲାପାଳ ସମ୍ମିଳନୀର ଦ୍ଵିତୀୟ ଦିନରେ ବରିଷ୍ଠ ପୋଲିସ ଅଧିକାରୀଙ୍କ ସହିତ ଏସପିମାନେ ବି ଯୋଗ ଦେଇଛନ୍ତି।
