ବିଜନେସ ଟାଇକୁନଙ୍କ ସହ ମୁଖ୍ୟମନ୍ତ୍ରୀଙ୍କ ଓ୍ବାନ୍ ଟୁ ଓ୍ବାନ୍, ନିବେଶକଙ୍କୁ ଓଡ଼ିଶା ନିମନ୍ତ୍ରଣ କଲେ ନବୀନ

ଟୋକିଓ: ଜାପାନରୁ ଆସିବ ୨୬ ହଜାର କୋଟି ଟଙ୍କାର ନିବେଶ । ଜାପାନରେ ବିଜନେସ ଟାଇକୁନଙ୍କ ସହ ମୁଖ୍ୟମନ୍ତ୍ରୀଙ୍କ ଆଲୋଚନା ପରେ ଆସିଛି ନିବେଶ ପ୍ରସ୍ତାବ । ଗ୍ରୀନ୍ ହାଇଡ୍ରୋଜେନ, ଗ୍ରୀନ ଆମୋନିଆ, ଗ୍ରୀନ ଏନର୍ଜୀ, ଆଇଟି କ୍ଷେତ୍ରରେ ନିବେଶ ପାଇଁ ଏହି ପ୍ରସ୍ତାବ ଆସିଛି । ବିଜନେସ ଟାଇକୁନଙ୍କ ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ୍ବାନ ଟୁ ଓ୍ବାନ ଆଲୋଚନା କରିଛନ୍ତି । TYK କର୍ପୋରେସନର ସଭାପତିଙ୍କ ସହ ଉତ୍ପାଦନଭିତ୍ତିକ ଶିଳ୍ପରେ ଥିବା ସମ୍ଭାବନା ନେଇ ଆଲୋଚନା କଲେ ମୁଖ୍ୟମନ୍ତ୍ରୀ । ଓଡ଼ିଶାରେ ପର୍ଯ୍ୟାପ୍ତ ସୁଯୋଗ ଓ ବ୍ୟାବସାୟିକ ସମ୍ଭାବନା ରହିଛି । ଏଥିସହ କ୍ରୋସାକି ହରିମା କର୍ପୋରେସନ ନିର୍ଦ୍ଦେଶକଙ୍କୁ ଭେଟିଲେ ମୁଖ୍ୟମନ୍ତ୍ରୀ । ଏସିଆ ପାସିଫିକ ଉପାଧ୍ୟକ୍ଷ କୋଇଚିରୋ କିମୁରାଙ୍କ ସହ ମଧ୍ୟ ଆଲୋଚନା କରିଛନ୍ତି । ICIJ ସଭାପତି ଜଗମୋହନ ଏସ ଚନ୍ଦ୍ରାଣୀଙ୍କ ସହ ଆଲୋଚନା କଲେ ମୁଖ୍ୟମନ୍ତ୍ରୀ । ଇଜ୍ ଅଫ ଡୁଇଙ୍ଗ୍ ବିଜନେସ ଓ ଦକ୍ଷ ମାନବ ସମ୍ବଳ ସଂପର୍କରେ ଆଲୋଚନା କରିଛନ୍ତି । ଓଡ଼ିଶାରେ ପୁଞ୍ଜି ନିବେଶ ପାଇଁ ସରକାର ସବୁ ସହଯୋଗ ଯୋଗାଉଛନ୍ତି । ଓଡ଼ିଶାରେ ଥିବା ସୁଯୋଗ ସମ୍ପର୍କରେ ଜାଣିବାକୁ ICIJକୁ ମୁଖ୍ୟମନ୍ତ୍ରୀ ନିମନ୍ତ୍ରଣ କରିଛନ୍ତି ।

ଏହି ଅବସରରେ ଜାପାନରେ ଥିବା ଭାରତୀୟ ଦୂତାବାସରେ ଅବସ୍ଥାପିତ ମୟଙ୍କ ଯୋଶୀ ମଧ୍ୟ ଓଡ଼ିଶାକୁ ପ୍ରଶଂସା କରିଥିଲେ । ନିବେଶ ପାଇଁ ଓଡ଼ିଶା ପକ୍ଷରୁ ନିଆଯାଇଥିବା ପଦକ୍ଷେପ ପ୍ରଶଂସନୀୟ । ଶିଳ୍ପ ସଚିବ ହେମନ୍ତ ଶର୍ମା, କହିଛନ୍ତି  ଯେ ରାଜ୍ୟରେ ସ୍ଥିର ସରକାର ଯୋଗୁଁ ନିବେଶକୁ ନେଇ ଥିବା ସମ୍ଭାବନା ଆହୁରି ଦୃଢିଭୂତ ହୋଇଛି । ଶିଳ୍ପପତିମାନେ ମଧ୍ୟ ବିନା କୌଣସି ସମସ୍ୟାରେ ସରକାରଙ୍କୁ ଠାରୁ ସୁବିଧା ପାଇପାରୁଛନ୍ତି । ଏଥିସହ ରାଜ୍ୟରେ ଥିବା ଦକ୍ଷ ମାନବ ସମ୍ବଳ ମଧ୍ୟ ନିବେଶ ପାଇଁ ବିଜନେସ ଟାଇକୁନଙ୍କ ପାଇଁ ଅପୂର୍ବ ସୁଯୋଗ ଆଣିଦେଇଛି । ଶିଳ୍ପପତିଙ୍କ ସହ ଆଲୋଚନା ବେଳେ ଭାରତରେ ଓଡ଼ିଶା ଦୃତ ବିକାଶଶୀଳ ରାଜ୍ୟ ଭାବେ ପରିଗଣିତ ହେଉଛି ବୋଲି ମୁଖ୍ୟମନ୍ତ୍ରୀ କହିଛନ୍ତି । ଆଜିର ଇଭେଣ୍ଟର ୨୦୦ଟି କମ୍ପାନୀର ଅଧିକାରୀମାନେ ଯୋଗ ଦେଇଥିଲେ । ସେମାନଙ୍କୁ ଓଡ଼ିଶା ନିମନ୍ତ୍ରଣ କରିଛନ୍ତି ନବୀନ ପଟ୍ଟନାୟକ । ଓଡ଼ିଶାର ରୂପାନ୍ତରଣର ଚିତ୍ର ଦେଖିବାକୁ ନିମନ୍ତ୍ରଣ କରିଛନ୍ତି ମୁଖ୍ୟମନ୍ତ୍ରୀ ।