ଜମ୍ମୁ-କାଶ୍ମୀରରେ ନୂଆ ମେଣ୍ଟକୁ କଂଗ୍ରେସ ନେତା ପି.ଚିଦାମ୍ବରମଙ୍କ ସମର୍ଥନ

ନୂଆଦିଲ୍ଲୀ: ଜମ୍ମୁ-କାଶ୍ମୀରକୁ ପୁଣି ମିଳୁ ସ୍ୱତନ୍ତ୍ର ସୁବିଧା । ଉଚ୍ଛେଦ ହୋଇଥିବା ଅନୁଚ୍ଛେଦ ୩୭୦ ମଧ୍ୟ ପୁଣି ଲାଗୁ ହେଉ । ଶୁକ୍ରବାର ଜମ୍ମୁ-କାଶ୍ମୀରର ମୁଖ୍ୟ ରାଜନୈତିକ ଦଳର ମେଣ୍ଟ ତିଆରିକୁ ସମର୍ଥନ କରି ବରିଷ୍ଠ କଂଗ୍ରେସ ନେତା ପି.ଚିଦାମ୍ବରମ ଏମିତି କହିଛନ୍ତି । ପୂର୍ବତନ ଗୃହମନ୍ତ୍ରୀ ପି.ଚିଦାମ୍ବରମ ଟ୍ୱିଟ୍ କରି ଲେଖିଛନ୍ତି- ଜମ୍ମୁକାଶ୍ମୀର ଏବଂ ଲଦାଖର ଲୋକଙ୍କ ଅଧିକାରର ପୁନରୁଦ୍ଧାର ପାଇଁ ସାମ୍ବିଧାନିକ ଲଢ଼େଇ ଉଦ୍ଦେଶ୍ୟରେ ମୁଖ୍ୟ ଧାରାର ଆଞ୍ଚଳିକ ଦଳ ଏକାଠି ହେବାକୁ ସମସ୍ତେ ସ୍ୱାଗତ କରିବା ଉଚିତ୍ ।

‘କେନ୍ଦ୍ର ସରକାର ନଜର ବଦଳାନ୍ତୁ’

ସେ ଆହୁରି କହିଛନ୍ତି- କେନ୍ଦ୍ର ସରକାର ମୁଖ୍ୟ ଧାରାର ଦଳ ଓ ଜମ୍ମୁ-କାଶ୍ମୀରର ଲୋକଙ୍କୁ ଅଲଗା ଓ ଦେଶ ବିରୋଧୀ ନଜରରେ ଦେଖିବା ବନ୍ଦ କରନ୍ତୁ । କଂଗ୍ରେସ ଜମ୍ମୁ-କାଶ୍ମୀରବାସୀଙ୍କ ସ୍ଥିତି ଓ ଅଧିକାରକୁ ଫେରାଇ ଆଣିବାକୁ ସଂକଳ୍ପବଦ୍ଧ । ୨୦୧୯ ମସିହା ଅଗଷ୍ଟ ୫ରେ ସରକାର ନେଇଥିବା ମନମୁଖୀ ଓ ଅସାମ୍ବିଧାନିକ ନିଷ୍ପତ୍ତିକୁ ବାତିଲ୍ କରିବା ଉଚିତ୍ ।

The central government must stop looking at the mainstream parties and the people of J&K as secessionist or anti-national.

— P. Chidambaram (@PChidambaram_IN) October 16, 2020

ଆଞ୍ଚଳିକ ରାଜନୈତିକ ଦଳର ବୈଠକ

ବୁଧବାର ଜମ୍ମୁ-କାଶ୍ମୀରର ମୁଖ୍ୟ ଧାରାର ରାଜନୈତିକ ଦଳ ଏକ ବୈଠକ କରିଥିଲେ । ରାଜ୍ୟର ପୂର୍ବ ସ୍ଥିତି ଫେରାଇ ଆଣିବାକୁ ଏହ ମେଣ୍ଟ ଗଠନ ପାଇଁ ନିଷ୍ପତ୍ତି କରିଥିଲେ । ଏହି ମେଣ୍ଟ ଏହି ପ୍ରସଙ୍ଗରେ ସବୁ ପକ୍ଷଙ୍କ ସହ ଆଲୋଚନା କରିବ । ନ୍ୟାସନାଲ କନଫରେନ୍ସ ଅଧ୍ୟକ୍ଷ ଫାରୁକ୍ ଅବଦୁଲ୍ଲାଙ୍କ ବାସଭବନରେ ବୈଠକ ବସିଥିଲା । ଏଥିରେ ପିଡିପି ଅଧ୍ୟକ୍ଷ ମେହବୁବା ମୁଫତି, ପିପୁଲ୍ସ କନଫରେନ୍ସ ଅଧ୍ୟକ୍ଷ ସଜ୍ଜାଦ ଲୋନ, ପିପୁଲ୍ସ ମୁଭମେଣ୍ଟ ନେତା ଜାଦେବ ମୀର ଓ ମାକପା ନେତା ମୋହମ୍ମଦ ୟୁସୁଫ୍ ତାରିଗାମୀ ମଧ୍ୟ ଭାଗ ନେଇଥିଲେ ।