ଚାଓ୍ୱଲା ଗଣଦୁଷ୍କର୍ମକାରୀଙ୍କୁ ବେଲ୍ ପ୍ରସଙ୍ଗ, ସୁପ୍ରିମକୋର୍ଟଙ୍କ ରାୟର ରିଭ୍ୟୁ ପାଇଁ ପିଟିସନ୍
ନୂଆଦିଲ୍ଲୀ: ଗଣଦୁଷ୍କର୍ମକାରୀଙ୍କୁ ସୁପ୍ରିମକୋର୍ଟଙ୍କ ଜାମିନ ନେଇ ଦାଏର ହେବ ରିଭ୍ୟୁ ପିଟିସନ । ତଳ କୋର୍ଟ ଓ ହାଇକୋର୍ଟ ଅପରାଧୀଙ୍କୁ ଫାଶୀ ଦଣ୍ଡ ଶୁଣାଇଥିବା ବେଳେ ସୁପ୍ରିମକୋର୍ଟ ସେମାନଙ୍କୁ ଜାମିନ ପ୍ରଦାନ କରିଥିଲେ । ସୁପ୍ରିମକୋର୍ଟରେ ରିଭ୍ୟୁ ପିଟିସନ ଦାଖଲ ପାଇଁ ଦିଲ୍ଲୀ ଉପରାଜ୍ୟପାଳଙ୍କ ମଞ୍ଜୁରୀ ମଧ୍ୟ ମିଳିଛି । ଅଭିଯୁକ୍ତଙ୍କୁ କୋର୍ଟରେ ନିଜ ପକ୍ଷ ରଖିବାର ସୁଯୋଗ ଦିଆଯାଇ ନଥିଲା । ପୋଲିସ ତଦନ୍ତରେ ଅବହେଳାକୁ କୋର୍ଟ ଦାୟୀ କରିଥିଲେ । ୪୯ ଜଣ ସାକ୍ଷୀଙ୍କ ମଧ୍ୟରୁ ୧୦ ଜଣଙ୍କୁ ପ୍ରତିପକ୍ଷ ପ୍ରଶ୍ନ ନକରିବା ଓ ଅଭିଯୁକ୍ତଙ୍କୁ ଚିହ୍ନଟ କରାଯାଇ ନଥିବା କହି କୋର୍ଟ ୩ ଅଭିଯୁକ୍ତଙ୍କୁ ବେଲ୍ ପ୍ରଦାନ କରିଥିଲେ ।
୨୦୧୨ ଫେବୃଆରୀରେ ଛାବଲା ଅଞ୍ଚଳର ଜଣେ କାମ ସାରି ଘରକୁ ଫେରୁଥିବା ବେଳେ ଏକ ଲାଲ ରଙ୍ଗର କାରରେ ତିନି ଜଣ ଯୁବକ ତାଙ୍କୁ ଅପହରଣ କରିନେଇଥିଲେ । ଯୁବତୀଙ୍କୁ ଗଣଦୁଷ୍କର୍ମ କରିବା ସହ ନିର୍ଯାତନା ମଧ୍ୟ ଦେଇଥିଲେ । ପୀଡିତାଙ୍କୁ ଘଣ୍ଟା, ଲୁହା ରଡ, ବିୟର କାଚରେ ମାଡ଼ ମାରିଥିଲେ ଅଭିଯୁକ୍ତ । ବିୟର ବୋତଲ କାଚରେ ପୀଡ଼ିତାଙ୍କ ପୂରା ଶରୀରକୁ ମଧ୍ୟ କାଟିଥିଲେ । ଯୁବତୀଙ୍କ ଆଖି ତାଡ଼ି ସେଥିରେ ଗାଡ଼ି ବ୍ୟାଟେରୀରେ ଥିବା ଏସିଡ ଢାଳି ଦେଇଥିଲେ ଅଭିଯୁକ୍ତ । ରାଜଧାନୀ ଛାତି ଉପରେ ଏଭଳି ଭୟଙ୍କର କାଣ୍ଡ ପୁରା ଦେଶକୁ ଦୋହଲାଇ ଦେଇଥିଲା । ହାଇକୋର୍ଟ ତିନି ଅଭିଯୁକ୍ତଙ୍କୁ ମୃତ୍ୟୁଦଣ୍ଡ ଶୁଣାଇଥିବା ବେଳେ ସୁପ୍ରିମକୋର୍ଟ ସେମାନଙ୍କ ବେଲ ଆବେଦନକୁ ମଞ୍ଜୁରୀ ଦେଇଥିଲେ ।
