ମା’ କାଳୀଙ୍କୁ ପ୍ରସନ୍ନ କରିବାକୁ କଇଁଚିରେ ଗଳା କାଟିଦେଲେ ଯୁବକ

ନନ୍ଦିଘୋଷ ବ୍ୟୁରୋ: ଅନ୍ଧବିଶ୍ବାସ ! ଗଭୀର ଯୁକ୍ତିହୀନ ବିଶ୍ବାସ, ଯାହା ବିଜ୍ଞାନସମ୍ମତ ନୁହେଁ । ଯଦିଓ ଶିକ୍ଷା, ସଂସ୍କାର ଓ ବିଜ୍ଞାନର ପ୍ରଭାବରେ ମଣିଷ ଧୀରେ ଧୀରେ ଏଇ ଅର୍ଗଳିରୁ ବାହାରିବାକୁ ଚେଷ୍ଟା କରୁଛି, ତଥାପି ମଣିଷ ମନରେ ଅନେକ ଅନ୍ଧବିଶ୍ବାସ ବସା ବାନ୍ଧି ତା’କୁ ପଛକୁ ଟାଣୁଛି। ଅନ୍ଧବିଶ୍ବାସର ଅଡୁଆ ସୂତାରେ ସେ ଛନ୍ଦି ହୋଇପଡୁଛି। ଉଡୁଡ଼ି ଯାଉଛି ସୁନାର ସଂସାର। କେଉଁଠି ନା କେଉଁଠି ଗଡୁଛି ମୁଣ୍ଡ। ସେମିତି ଏକ ଘଟଣା ସାମ୍ନାକୁ ଆସିଛି ଛତିଶଗଡର ରାୟପୁରରୁ । ଜଣେ ଯୁବକ ଦେବୀ କାଳୀଙ୍କୁ ଖୁସି କରିବା ପାଇଁ ନିଜକୁ ବଳି ଦେଇଛନ୍ତି। ଘଟଣା ପ୍ରକାଶ ପାଇବା ପରେ ସମଗ୍ର ଅଞ୍ଚଳରେ ଭୟର ବାତାବରଣ ସୃଷ୍ଟି ହେଇଛି ।  ସୂଚନା ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ଶବକୁ ଜବତ କରିବା ସହ ତଦନ୍ତ ଆରମ୍ଭ କରିଛି । 

କଇଁଚିରେ କାଟିଥିଲେ ଗଳା

ସେ ୪୮ ଘଣ୍ଟା ଧରି ନିରନ୍ତର ପୂଜା କରିବା ସତ୍ତ୍ବେ ଯେତେବେଳେ ମା କାଳୀ ଦର୍ଶନ ଦେଇନଥିଲେ, ସେତେବେଳେ ଭୁନେଶ୍ୱର କଇଁଚି ଉଠାଇ ତାଙ୍କ ଗଳା କାଟି ମାଙ୍କୁ ଖୁସୀ କରିବାକୁ ଚେଷ୍ଟା କରିଥିଲେ। କିନ୍ତୁ, ସେ ଗଳା କାଟିବା ପରେ କୋଠରୀ ରକ୍ତରେ ଭିଜି ଯାଇଥିଲା। ତାଙ୍କ ଚିତ୍କାର ଶୁଣି ପରିବାର ସଦସ୍ୟ ଆସିବା ବେଳକୁ ବହୁତ ଡେରି ହୋଇଯାଇଥିଲା। ଘଟଣା ସମ୍ପର୍କରେ ପୋଲିସକୁ ତୁରନ୍ତ ସୂଚନା ଦିଆଯାଇଥିଲା। ଏହା ପରେ ପୋଲିସ ଘଟଣାସ୍ଥଳରେ ପହଞ୍ଚି ଘଟଣାସ୍ଥଳକୁ ଯାଞ୍ଚ କରି ମୃତ ଦେହକୁ ପୋଷ୍ଟମର୍ଟମ ପାଇଁ ପଠାଇଥିଲା ।

ଘଟଣା ପରେ ଉତ୍ତେଜନା ପ୍ରକାଶ 

ମୃତଦେହକୁ ପୋଷ୍ଟମର୍ଟମ ପଠାଇ ପୋଲିସ ମାମଲାର ତଦନ୍ତ ଆରମ୍ଭ କରିଛି। ପୋଲିସ କହିଛି ଯେ ଏହି ଘଟଣା ଶନିବାର ସକାଳ ୧୧ଟାରେ ଘଟିଛି। ଘଟଣାସ୍ଥଳରୁ ମିଳିଥିବା ତଥ୍ୟ ଅନୁଯାୟୀ, ଭୁନେଶ୍ୱର ଦେବୀ କାଳୀଙ୍କୁ ଖୁସି କରିବା ପାଇଁ ନିଜକୁ ବଳି ଦେବାକୁ ଚେଷ୍ଟା କରିଥିବା ବେଳେ ତାଙ୍କର ମୃତ୍ୟୁ ଘଟିଛି । ଏହି ଘଟଣାରେ କେବଳ ପରିବାର ସଦସ୍ୟ ଆଶ୍ଚର୍ଯ୍ୟ ହୋଇ ନାହାଁନ୍ତି  ସମଗ୍ର ଅଞ୍ଚଳରେ ଆତଙ୍କ ଖେଳିଯାଇଛି। ଦେଶରେ ଅନ୍ଧବିଶ୍ୱାସ ଏବଂ ବଳିଦାନ ବିରୋଧରେ କଠୋର ନିୟମ ପ୍ରଣୟନ କରାଯାଇଥିଲେ ମଧ୍ୟ ଦେଶରେ ଅନ୍ଧବିଶ୍ୱାସର ମାମଲା ହ୍ରାସ ହେଉନାହିଁ କିମ୍ବା ବଳିପ୍ରଥା ବନ୍ଦ ହେଉନାହିଁ।