‘ଧୀମା ଖେଳି ହାରିଲା ଚେନ୍ନାଇ, ଡ୍ୱେନ୍ ବ୍ରାଭୋଙ୍କ ପୂର୍ବରୁ କେଦାର ଆସିବା ନିଷ୍ପତ୍ତି ଭୁଲ୍’
ଭୁବନେଶ୍ୱର: ଚେନ୍ନାଇ ସୁପର କିଙ୍ଗ୍ସ ଦଳ କଲକୋତା ନାଇଟ ରାଇଡର୍ସ ବିପକ୍ଷରେ ଅଚାନକ ପରାଜୟ ସ୍ୱୀକାର କରିଛି । ଦଳର ଉପରକ୍ରମର ବ୍ୟାଟ୍ସମ୍ୟାନ ଭଲ ପ୍ରଦର୍ଶନ କରିବା ସତ୍ତ୍ୱେ ମଧ୍ୟ ଟିମ୍ ମ୍ୟାଚ ହାରିଛି । ଜାଡେଜା ଓ କେଦାର ଯାଦବ ଅଧିକ ଡଟ୍ ବଲ ଖେଳିବା କାରଣରୁ ଟିମ୍ ମ୍ୟାଚ ହାରିଲା । ଏଣୁ ସିଏସକେକୁ ବିଭିନ୍ନ ବର୍ଗରୁ ସମାଲୋଚନା କରାଯାଉଛି ।
ଏହି କ୍ରମରେ ଯୋଡି ହୋଇଛନ୍ତି ଭାରତର ପୂର୍ବତନ ବିସ୍ଫୋରକ ଓପନର ବିରେନ୍ଦ୍ର ସେହୱାଗ୍ ।ସେହଓ୍ୱାଗ୍ କ୍ରିକବଜକୁ ସାକ୍ଷାତକାର ଦେଇ କହିଛନ୍ତି ଯେ, ୧୬୮ ରନର ବିଜୟ ଲକ୍ଷ ହାସଲ କରିବା ସମ୍ଭବପର ଥିଲା । ସିଏସକେ ଓପନର ମାନେ ଭଲ ପ୍ରଦର୍ଶନ ମଧ୍ୟ କରିଥିଲେ । ଏହା ସତ୍ତ୍ୱେ ଟିମ୍ ମ୍ୟାଚ ହାରିଲା ।
କେଦାର ଯାଦବ ଓ ରବିନ୍ଦ୍ରେ ଜାଡେଜା ଅଧିକ ଡଟ୍ ବଲ୍ ଖେଳିବା ହେତୁ ସିଏସକେ ଏକ ନିଶ୍ଚିତ ବିଜୟକୁ ହାତଛଡ଼ା କଲା । ମୋର ମନେ ହେଉଛି ଯେ କିଛି କ୍ରିକେଟର ଫ୍ରାଞ୍ଚାଇଜକୁ ସରକାରୀ ଚାକିରୀ ବୋଲି ଭାବି ନେଇଛନ୍ତି । ପ୍ରଦର୍ଶନ ଯାହା ବି ରହୁ, ଚୁକ୍ତି ଅନୁଯାୟୀ ବେତନ ମିଳିବ ।
ଓ୍ୱାଟସନ ଆଉଟ ହେବା ପରେ ୧୧ରୁ ୧୪ ତମ ଓଭର ମଧ୍ୟରେ ଦଳ ମାତ୍ର ୧୪ ରନ୍ ସଂଗ୍ରହ କଲା । ବ୍ୟାଟ୍ସମ୍ୟାନ ଅଧିକ ଡଟ୍ ବଲ୍ ଖେଳିଲେ । ସେହିଭଳି ଡ୍ୱେନ ବ୍ରାଭୋଙ୍କୁ ପୂର୍ବରୁ କେଦାର ଯାଦବଙ୍କୁ ବ୍ୟାଟିଂ ଦିଆଗଲା । ସେ ୧୨ଟି ବଲ୍ ବିନିମୟରେ ୭ ରନ୍ କଲେ । ପୁରା ମ୍ୟାଚକୁ ଅନୁଶୀଳନ କଲେ ଜଣାପଡୁଛି ଯେ ଧୀମା ଗତିରେ ବାଣ୍ଟି କରିବା ଯୋଗୁଁ ହିଁ ସିଏସକେ ମ୍ୟାଚ ହରାଇଲା ।
