ଦିଲ୍ଲୀରେ ସୁଧୁରୁନି ଜଳ ସମସ୍ଯା, ତୃତୀୟ ଦିନରେ ଆପ୍ ନେତ୍ରୀ ଆତିଶିଙ୍କ ଅନଶନ
ନୂଆଦିଲ୍ଲୀ : ଦିଲ୍ଲୀରେ ସୁଧୁରୁନି ଜଳ ସମସ୍ଯା। ପ୍ରତିବାଦରେ ଆପ୍ ନେତ୍ରୀ ଆତିଶିଙ୍କ ଅନଶନ। ଗତ ଏକ ମାସ ଧରି ଦିଲ୍ଲୀରେ ପାନୀୟ ଜଳ ସମସ୍ଯା ଅତି ଉତ୍କଟ ଧାରଣ କରିଥିବାବେଳେ କେନ୍ଦ୍ର ସରକାର ଏଥିପ୍ରତି କର୍ଣ୍ଣପାତ କରୁ ନଥିବା ଅଭିଯୋଗ କରିଛନ୍ତି ଆତିଶି। ପ୍ରତିବାଦରେ ସେ ତିନି ଦିନ ଧରି ଅନଶନରେ ବସିଛନ୍ତି।
ଆତିଶି ଅଭିଯୋଗ କରିଛନ୍ତି ଆବଶ୍ଯକ ପରିମାଣ ଜଳ ହରିଆଣା ଛାଡୁ ନଥିବାରୁ ଦିଲ୍ଲୀରେ ପାନୀୟ ଜଳ ସଂକଟ ତୀବ୍ର ହୋଇଛି। କିଛିଦିନ ତଳେ ସ୍ଥିତିରେ ସୁଧାର ଆଣିବା ଦିଗରେ ପଦକ୍ଷେପ ନେବା ଲାଗି କେନ୍ଦ୍ର ଜଳଶକ୍ତି ମନ୍ତ୍ରୀଙ୍କ ନିକଟରେ ଆପ୍ ପକ୍ଷରୁ ଦାବି କରାଯାଇଥିଲା।
କଂଗ୍ରେସ ପକ୍ଷରୁ ବି ଜଳାଭାବ ପ୍ରତିବାଦରେ ଆନ୍ଦୋଳନ କରାଯାଇଥିଲା। ପାଣି ସମସ୍ଯାର ସମାଧାନ ଲାଗି ତୁରନ୍ତ ପଦକ୍ଷେପ ନେବା ଦାବିରେ କଂଗ୍ରେସ ପକ୍ଷରୁ ମଟକା ଫୋଡ ଆନ୍ଦୋଳନ ହୋଇଥିଲା। ଦିଲ୍ଲୀର ସମସ୍ତ ୨୮୦ ବ୍ଲକରେ ଏହି ଆନ୍ଦୋଳନ ହୋଇଥିଲା। ସେପଟେ ଦିଲ୍ଲୀରେ ଏବେ ବି ଶହ ଶହ ଲୋକ ଟ୍ଯାଙ୍କର ନିକଟରେ ଭିଡ ଜମାଉଛନ୍ତି। ଦିଲ୍ଲୀରେ ପାଣି ଲାଗି କଟକଣା ବି ବଳବତ୍ତର ରହିଛି।
