Changes from 1st September: କାଲିଠୁ ହେଉଛି ଏହି ସବୁ ପରିବର୍ତ୍ତନ, ଜାଣି ନିଅନ୍ତୁ…
1 min read
ନୂଆଦିଲ୍ଲୀ: ଦେଶରେ ସେପ୍ଟେମ୍ବର ୧ରୁ ଅନେକ କିଛି ବଦଳିବାକୁ ଯାଉଛି । ଯାହା ନିତିଦିନିଆ ଜୀବନଠାରୁ ଆରମ୍ଭ କରି ଆର୍ଥିକ କାରବାର ଉପରେ ପ୍ରଭାବ ପକାଇବ । ଏହି ପରିବର୍ତ୍ତନରେ ଲକଡାଉନ୍ ପ୍ରତ୍ୟାହାର ଅର୍ଥାତ୍ ଅନଲକ୍ ୪ର ନିୟମ ବି ରହିଛି । ଏହାବଦ୍ ସରକାର ଅଗଷ୍ଟରେ ଘୋଷଣା କରିଥିବା କିଛି ନିୟମ ସେପ୍ଟେମ୍ବର ପହିଲାରୁ ଲାଗୁ ହେବ ।
ବଦଳିବ ସିଲିଣ୍ଡର ଦର
ପ୍ରତି ମାସର ପ୍ରଥମ ଦିନରେ ରୋଷେଇ ଗ୍ୟାସ୍ ଦର ବଦଳୁଛି । ୧ ଅଗଷ୍ଟରେ ଏଲପିଜି ଗ୍ୟାସ୍ ଦର କେବଳ କୋଲକାତାରେ ବଦଳି ଥିଲା । ନନ୍ ସବସିଡି ଗ୍ୟାସ୍ ଦର ବଢ଼ି ୬୨୧ ଟଙ୍କା ହୋଇଥିଲା । ସେହିଭଳି ଦିଲ୍ଲୀରେ ୧୪ କିଲୋଗ୍ରାମ୍ ଗ୍ୟାସ୍ ଦର ରହିଥିଲା ୫୯୪ ଟଙ୍କା, ମୁମ୍ବାଇରେ ୫୯୪, ଚେନ୍ନାଇରେ ଏହା ୬୧୦ ଟଙ୍କା ୫୦ ହୋଇଥିଲା ।
ମହଙ୍ଗା ହେବ ବିମାନ ଯାତ୍ରା
ବେସାମରିକ ବିମାନ ଚଳାଚଳ ମନ୍ତ୍ରାଳୟ ସେପ୍ଟେମ୍ବର ୧ରୁ ଘରୋଇ ଓ ଅନ୍ତର୍ଜାତୀୟ ବିମାନ ଯାତ୍ରୀଙ୍କ ଠାରୁ ଅଧିକ ବିମାନ ସୁରକ୍ଷା ଶୁଳ୍କ ଆଦାୟ ପାଇଁ ନିଷ୍ପତ୍ତି ନେଇଛି । ଏହାଦ୍ୱାରା ବିମାନ ଯାତ୍ରା ଆହୁରି ମହଙ୍ଗା ହେବ । ଆସନ୍ତା ମାସରୁ ଘରୋଇ ଉଡ଼ାଣ ପାଇଁ ଯାତ୍ରୀ ବିମାନ ସୁରକ୍ଷା ଶୁଳ୍କ (ASF) ୧୫୦ ଟଙ୍କା ପରିବର୍ତ୍ତେ ୧୬୦ ଟଙ୍କା ଦେବେ । ସେହିଭଳି ଅନ୍ତର୍ଜାତୀୟ ଉଡ଼ାଣ ପାଇଁ ସେପ୍ଟେମ୍ବରରୁ ୪.୮୫ ଡଲାର ବଦଳରେ ୫.୨ ଡଲାର ASF ଦେବାକୁ ପଡ଼ିବ । ବିମାନ କମ୍ପାନୀ ଟିକେଟ୍ ବୁକିଂ ବେଳେ ASF ବାବଦକୁ ଏହି ଅର୍ଥ ନେଇ ସରକାରଙ୍କୁ ଜମା କରିବେ । ଏହି ଅର୍ଥରେ ଦେଶର ସମସ୍ତ ବିମାନବନ୍ଦରର ସୁରକ୍ଷା ବ୍ୟବସ୍ଥା କରାଯାଇଥାଏ ।
ଅନଲକ୍ ୪
ଆସନ୍ତାକାଲିଠାରୁ ଦେଶରେ ଅନଲକ୍ ୪ ଆରମ୍ଭ ହେଉଛି । ଅନଲକ୍ ୪ରେ କଣ ଖୋଲିବ ଓ କଣ ନାହିଁ ଏନେଇ ବୁଧବାର ଗୃହ ମନ୍ତ୍ରାଳୟ ଗାଇଡଲାଇନ୍ ଜାରି କରିଛି । ଏହି ଆଧାରରେ ରାଜ୍ୟ ସରକାର ଗାଇଡଲାଇନ୍ ଜାରି କରିବେ । ଅନଲକ୍ ୪ରେ ଦିଲ୍ଲୀରେ ମେଟ୍ରୋ ସେବା ପୁଣି ଥରେ ଆରମ୍ଭ ହେବ । ଦେଶରେ ମାର୍ଚ୍ଚ ଶେଷ ସପ୍ତାହରୁ ମେଟ୍ରୋ ସେବା ବନ୍ଦ ଥିଲା । ତେବେ, ଏବେ ସ୍କୁଲ, କଲେଜ ଖୋଲିବ ନାହିଁ ।
GST ପୈଠରେ ବିଳମ୍ବ କଲେ ମୋଟ ଦେୟ ଉପରେ ଦେବାକୁ ପଡିବ ସୁଧ
GST ଭରିବାରେ ଡେରି କଲେ ଏଥର ଅଧିକ ଟଙ୍କା ଦେବାକୁ ପଡ଼ିବ । ସେପ୍ଟେମ୍ବର ୧ରୁ ମୋଟ ଟିକସ ଦେବାରେ ଡେରି କଲେ ସୁଧ ଦେବାକୁ ପଡ଼ିବ । ଏହି ବର୍ଷ ଆରମ୍ଭରୁ ଉଦ୍ୟୋଗ ଗୁଡ଼ିକ GST ଭରିବାରେ ବିଳମ୍ବ ପାଇଁ ପାଖାପାଖି ୪୬ ହଜାର କୋଟି ଟଙ୍କା ସୁଧ ଆଦାୟ ନିର୍ଦ୍ଦେଶ ଉପରେ ଚିନ୍ତା ପ୍ରକଟ କରିଥିଲେ । ସମୁଦାୟ ଟିକସ ଉପରେ ସୁଧ ଆଦାୟ କରାଯାଇଥିଲା ।
ଲୋନ୍ ମୋରେଟୋରିୟମ୍ ଲାଭ ମିଳିବନି
ଆରବିଆଇ ଦ୍ୱାରା ଘୋଷିତ ଲୋନ୍ ମୋରେଟୋରିୟମ ଅର୍ଥାତ୍ ଇଏମ୍ଆଇ ସ୍ଥଗିତ ଅବଧି ୩୧ ଅଗଷ୍ଟରେ ସରୁଛି । ଲକଡାଉନରେ ଋଣଗ୍ରହୀତାଙ୍କୁ ଆର୍ଥିକ ସ୍ଥିତିରୁ ଆଶ୍ୱସ୍ତି ଦେବାକୁ ଆରବିଆଇ ଲୋନ୍ ମୋରେଟୋରିୟମ୍ ଘୋଷଣା କରିଥିଲା । ପ୍ରଥମେ ଏହା ତିନି ମାସ ପାଇଁ ଘୋଷଣା ହୋଇଥିବା ବେଳେ ପୁଣି ତିନି ମାସ ବଢ଼ାଇ ଦିଆଯାଇଥିଲା ।
