ଗୋଟିଏ ଦିନରେ ଓମିକ୍ରନ୍ ପଜିଟିଭ୍ ଓ ନେଗେଟିଭ୍

ନୂଆଦିଲ୍ଲୀ: ଓମିକ୍ରନ୍ ସଂକ୍ରମଣକୁ ନେଇ ପ୍ରଶ୍ନ । ଜଣେ ବ୍ୟକ୍ତି ଓମିକ୍ରନ୍ ପଜିଟିଭ ଚିହ୍ନଟ ହେବା ଏବଂ ସେହିଦିନ ସେ କୋଭିଡ-୧୯ ନେଗେଟିଭ ପ୍ରମାଣିତ ହେବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ଗତ ନଭେମ୍ବର ୨୨ ତାରିଖରେ ଇଟାଲୀରୁ ଫେରିଥିଲେ ଚଣ୍ଡୀଗଡର ଜଣେ ୨୦ ବର୍ଷ ବୟସ୍କ ଯୁବକ । ତାଙ୍କୁ କ୍ବାରେଣ୍ଟାଇନରେ ରଖାଯାଇଥିଲା । ଗତକାଲି ସେ ଓମିକ୍ରନ୍ ସଂକ୍ରମିତ ଥିବା ଜଣାପଡିଥିଲା । ମାତ୍ର ଗତକାଲି ବି ତାଙ୍କର ହୋଇଥିଲା କୋଭିଡ ଟେଷ୍ଟ । ଆଶ୍ଚର୍ଯ୍ୟର କଥା ସେ କୋଭିଡ ନେଗେଟିଭ ଥିବା ପ୍ରମାଣିତ ହୋଇଥିଲା । ସେ ଫାଇଜରର ସମ୍ପୂର୍ଣ୍ଣ ଡୋଜ ନେଇଥିଲେ ବି ସଂକ୍ରମିତ ହୋଇଥିଲେ ।

ସେହିପରି ଆର୍ୟଲାଣ୍ଡରୁ ଆନ୍ଧ୍ରପ୍ରଦେଶକୁ ଆସିଥିବା ଜଣେ ୩୪ ବର୍ଷ ବୟସ୍କ ଯୁବକ ଓମିକ୍ରନ ସଂକ୍ରମିତ ଥିଲେ । ପରେ ତାଙ୍କର ଟେଷ୍ଟ ହେବା ପରେ ସେ କୋଭିଡ ନେଗେଟିଭ ଥିବା ଜଣାପଡିଥିଲା । ସେପଟେ ଓମିକ୍ରନକୁ ନେଇ ବିଶ୍ବ ସ୍ବାସ୍ଥ୍ୟ ସଂଗଠନ କହିଛି କି ଏହି ଭାରିଆଣ୍ଟ ଟିକାର ପ୍ରଭାବ ହ୍ରାସ କରିଥାଏ ଏବଂ ଡେଲଟା ତୁଳନାରେ ଅଧିକ ସଂକ୍ରମିତ ହୋଇଥାଏ । ଭାରତରେ ପ୍ରଥମେ ଚିହ୍ନଟ ହୋଇଥିବା ଡେଲଟା ଯେଉଁ ବେଗରେ ସାରା ବିଶ୍ବକୁ ଖେଳିଗଲା ତାହାଠାରୁ ଅଧିକ ବେଗରେ ଓମିକ୍ରନ ସଂକ୍ରମଣ ସୃଷ୍ଟି କରିବ ବୋଲି ସଂଗଠନ ଚେତାବନୀ ଦେଇଛି । ଦକ୍ଷିଣ ଆଫ୍ରିକାରୁ ସୃଷ୍ଟି ହୋଇଥିବା ଓମିକ୍ରନର ଇତିମଧ୍ୟରେ ଅନେକ ମ୍ୟୁଟେସନ ଘଟିଥିବା କୁହାଯାଇଛି । ବର୍ତ୍ତମାନ ସୁଦ୍ଧା ୬୩ ଦେଶକୁ ଓମିକ୍ରନ୍ ବ୍ୟାପିଛି ବୋଲି ବିଶ୍ବ ସ୍ବାସ୍ଥ୍ୟ ସଂଗଠନ ସୂଚନା ଦେଇଛି ।