ତିନୋଟି ଫର୍ମାଟରେ ଶତକ କରିଥିବା ଭାରତୀୟ
1 min read
ଭୁବନେଶ୍ୱର: (ପ୍ରିୟ ପ୍ରୀତମ ମହାନ୍ତି), ଆର୍ (R) କହିଲେ ରାମ୍ ଆର୍ କହିଲେ ରହିମ୍ । ହେଲେ ଭାରତୀୟ କ୍ରିକେଟ ଟିମରେ ଆର୍ ମାନେ ରେକର୍ଡ । ଇଂରାଜୀ ଲେଖା ଆର୍ ରେ ଥିବା ତିନି ଭାରତୀୟ କ୍ରିକେଟରଙ୍କ ନାଁରେ ରହିଛି ବିରଳ ରେକର୍ଡ । ଏମାନେ ହେଲେ ରାଇନା, ରାହୁଲ ଓ ରୋହିତ । ବିଶ୍ବରେ ଏମାନଙ୍କ ରେକର୍ଡ ସହ ସମକକ୍ଷ କେବଳ ୧୧ ଖେଳାଳି । ଏହି ତିନି ବ୍ୟାଟସମ୍ୟାନ ତିନୋଟି ଫର୍ମାଟରେ ଶତକ ହାସଲ କରିବାର ଗୌରବ ଅର୍ଜନ କରିଛନ୍ତି । ଏକଦିବସୀୟ, ଟେଷ୍ଟ ଓ ଟି-୨୦ ଫର୍ମାଟରେ ଭାରତ ପାଇଁ ଶତକ ମାରିବାର ରେକର୍ଡ ରହିଛି ଏମାନଙ୍କ ନାଁରେ ।
ସୁରେଶ ରାଇନା: ୨୦୦୫ରେ ପ୍ରଥମ ଏକଦିବସୀୟ ଖେଳିଥିବା ରାଇନା ପ୍ରଥମ ବଲରେ ହି ଆଉଟ ହୋଇଥିଲେ । ହେଲେ ପର ମୁହୂର୍ତ୍ତରେ କିଛି ଭଲ ଇନିଂସ୍ ମଧ୍ୟ ଖେଳିଛନ୍ତି ଉତ୍ତର ପ୍ରଦେଶର ଏହି ବ୍ୟାଟସମ୍ୟାନ । ଜୁନ୍ ୨୦୦୮ରେ ହଂକଂ ବିପକ୍ଷରେ ୧୦୧ ରନ୍ କରି ଜୀବନର ପ୍ରଥମ ଶତକ ଅର୍ଜନ କରିଥିଲେ ରାଇନା । ଏହା ପରେ ୨୦୧୦ ମେ’ ମାସରେ ଦକ୍ଷିଣ ଆଫ୍ରିକା ବିପକ୍ଷରେ ଟି-୨୦ରେ ୧୦୧ ରନ୍ କରିଥିଲେ ଏହି ବାମ ହାତୀ ବ୍ୟାଟସମ୍ୟାନ । ସେହି ବର୍ଷ ଜୀବନର ପ୍ରଥମ ଟେଷ୍ଟ ମ୍ୟାଚ୍ ଖେଳି ଶ୍ରୀଲଙ୍କା ବିପକ୍ଷରେ ୧୨୦ରନ୍ କରି ପ୍ରଥମ ଭାରତୀୟ ଭାବେ ତିନୋଟି ଫର୍ମାଟରେ ଶତକ ହାସଲ କରିବାରେ ରେକର୍ଡ କରିଥିଲେ ରାଇନା । ସର୍ଟ ପିଚ୍ ବଲ ଖେଳିବାରେ ଦୁର୍ବଳତା ପାଇଁ ରାଇନା ବାରମ୍ବାର ଟିମରୁ ବାହାରିଛନ୍ତି । ହେଲେ ତତ୍କାଳୀନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ପାଖ ଲୋକ ବୋଲି ରାଇନାଙ୍କୁ ବାରମ୍ବାର ସୁଯୋଗ ମିଳୁଥିବା କଥା ସବୁ ସମୟରେ ଚର୍ଚ୍ଚା ହୁଏ । ବର୍ତ୍ତମାନ ଆଇପିଏଲରେ ଧୋନୀଙ୍କ ଅଧୀନରେ ରାଇନା ଚେନ୍ନାଇ ସୁପର କିଙ୍ଗସ୍ ପାଇଁ ଖେଳୁଛନ୍ତି ।
ରୋହିତ ଶର୍ମା: ୨୦୦୭ ଟି-୨୦ ବିଶ୍ବକପରେ ଦକ୍ଷିଣ ଆଫ୍ରିକା ବିରୋଧରେ ପ୍ରଥମ ମ୍ୟାଚ୍ ଖେଳି ମ୍ୟାନ ଅଫ୍ ଦ ମ୍ୟାଚ୍ ହୋଇଥିଲେ ରୋହିତ । ଜିମ୍ବାଓ୍ବେ ବିରୋଧରେ ମେ’ ୨୦୧୦ରେ ଜୀବନର ପ୍ରଥମ ଶତକ ହାସଲ କରିଥିଲେ ହିଟ୍ ମ୍ୟାନ । ହେଲେ ଟେଷ୍ଟ କ୍ରିକେଟରେ ରୋହିତଙ୍କୁ ସେତେଟା ସୁଯୋଗ ମିଳି ନାହିଁ । ୨୦୧୩ ମସିହାରେ ଓ୍ବେଷ୍ଟ ଇଣ୍ଡିଜ୍ ବିରୋଧରେ ୧୧୭ ରନ୍ କରିଥିବା ସତ୍ତ୍ବେ ଟିମରେ କେବେ ଇନ୍ ତ କେବେ ଆଉଟ ରହିଛନ୍ତି ମୁମ୍ବାଇ ଇଣ୍ଡିଆନସର ଅଧିନାୟକ । ୨୦୧୫ ଅକ୍ଟୋବରରେ ଦକ୍ଷିଣ ଆଫ୍ରିକା ବିରୋଧରେ ଟି-୨୦ରେ ୧୦୬ ରନ୍ କରି ଦ୍ବିତୀୟ ଭାରତୀୟ ଭାବେ ତିନୋଟି ଫର୍ମାଟରେ ଶତକ ହାସଲ କରିଥିଲେ ରୋହିତ ।
କେ.ଏଲ. ରାହୁଲ: କର୍ଣ୍ଣାଟକର ଷ୍ଟାଇଲିସ ରାଇଟ ହ୍ୟାଣ୍ଡେଡ୍ ବ୍ୟାଟସମ୍ୟାନ ଲୋକେଶ ରାହୁଲ ତୃତୀୟ ଭାରତୀୟ ଭାବେ ଏହି ରେକର୍ଡ କରିଛନ୍ତି । ବଡ କଥା ହେଉଛି, ୧୮ ମାସ ମଧ୍ୟରେ ସେ ଏହି କୀର୍ତ୍ତିମାନ ହାସଲ କରିଛନ୍ତି । ଜାନୁଆରୀ ୨୦୧୫ରେ ଅଷ୍ଟ୍ରେଲିଆ ବିପକ୍ଷରେ ପ୍ରଥମ ଶତକ ହାସଲ କରିଥିଲେ ରାହୁଲ । ଏହାର ଦେଢ ବର୍ଷ ପରେ ଅର୍ଥାତ୍ ଜୁନ ୨୦୧୬ରେ ଜିମ୍ବାଓ୍ବେ ବିପକ୍ଷରେ ଏକଦିବସୀୟ ଖେଳି ୧୦୦ ରନର ଅପରାଜିତ ପାଳି ଖେଳିଥିଲେ କର୍ଣ୍ଣାଟକର ଏହି ବ୍ୟାଟସମ୍ୟାନ । ଠିକ୍ ଦୁଇ ମାସ ପରେ ଓ୍ବେଷ୍ଟ ଇଣ୍ଡିଜ୍ ବିପକ୍ଷରେ ୧୧୦ ରନର ଅପରାଜିତ ପାଳି ଖେଳି ତିନୋଟି ଫର୍ମାଟରେ ଶତକ ହାସଲ କରିଥିଲେ ରାହୁଲ । ଏତେ ସବୁ ପରେ ବି ଦଳରେ ସ୍ଥାୟୀ ଖେଳାଳୀ ଭାବେ ରାହୁଲଙ୍କ ସ୍ଥାନ ସୁରକ୍ଷିତ ରହିନି । ବେଳେବେଳେ ରିଜର୍ଭ ଖେଳାଳି ଭାବେ ଏକଦିବସୀୟ ଓ ସ୍ଥାୟୀ ଭାବେ କେବଳ ଟି-୨୦ ଖେଳିବାର ସୁଯୋଗ ପାଇଥାନ୍ତି ରାହୁଲ । ଆଇପିଏଲରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପାଇଁ ବିରାଟ କୋହଲିଙ୍କ ଅଧିନରେ ଖେଳୁଥିବାରୁ ରାହୁଲ ଅଧିନାୟକଙ୍କ ଗୁଡ ବୁକରେ ଥିବା ଚର୍ଚ୍ଚା ହୁଏ ।
ଏହି ତିନି ଜଣଙ୍କୁ ମିଶାଇ ବିଶ୍ବ କ୍ରିକେଟରେ ୧୪ ଜଣ ବ୍ୟାଟସ୍ମ୍ୟାନ ଏପରି ମାଇଲ ଖୁଣ୍ଟ ଅତିକ୍ରମ କରିଛନ୍ତି । ରୋହିତ ଶର୍ମା ଏକଦିବସୀୟରେ ତିନୋଟି ଦ୍ବିଶତକ ସହ ଟେଷ୍ଟ ଓ ଟି-୨୦ରେ ଶତକ ମାରିଛନ୍ତି । ହେଲେ ଓ୍ବେଷ୍ଟଇଣ୍ଡିଜର କିମ୍ବଦନ୍ତୀ ଓପନର କ୍ରିସ୍ ଗେଲ୍ ଟେଷ୍ଟରେ ତ୍ରିଶତକ, ଏକଦିବସୀୟରେ ଦ୍ବିଶତକ ଓ ଟି-୨୦ରେ ଶତକ ମାରି ଏହି ତାଲିକାରେ ଗ୍ରାଣ୍ଡ ସ୍ଲାମ୍ ହାସଲ କରିଛନ୍ତି ।
')}
