ପ୍ରଶ୍ନ ଉଠାଇଲା କଂଗ୍ରେସ: କେନ୍ଦ୍ର ପାଇଁ ରାଜ୍ୟ ବିଜେପିର ଓକିଲାତି

ଭୁବନେଶ୍ୱର,(ଚିନ୍ମୟ କୁମାର ମହାପାତ୍ର): ବନ୍ୟାକୁ ନେଇ ରାଜନୀତି ବଢିବାରେ ଲାଗିଛି । ବନ୍ୟାକୁ ୧୫ ଦିନ ଉପରେ ବିତିସାରିଛି । ଏସ୍‌ଆର୍‌ସି ଅବଗତ କରିବା ସତ୍ତ୍ୱେ କେନ୍ଦ୍ରୀୟ ଟିମ କ୍ଷୟକ୍ଷତି ଆକଳନ କରିବାର ନାଁ ଧରୁନି । ଏପଟେ କିନ୍ତୁ କେନ୍ଦ୍ରକୁ ଅପେକ୍ଷା ନକରି ମୁଖ୍ୟମନ୍ତ୍ରୀ ବନ୍ୟା କ୍ଷତିଗ୍ରସ୍ତ ଚାଷୀଙ୍କ ପାଇଁ ୩୦୦ କୋଟି ଟଙ୍କାର ସହାୟତା ଘୋଷଣା କରିସାରିଲେଣି । କେନ୍ଦ୍ର ସରକାରଙ୍କ ଏଭଳି କାର୍ଯ୍ୟକୁ ବିଜେଡି ସମାଲୋଚନା କରିଥିବାବେଳେ ମୁଖ୍ୟମନ୍ତ୍ରୀଙ୍କ ପ୍ୟାକେଜ କ୍ଷତିଗ୍ରସ୍ତ କୃଷକଙ୍କୁ ବେଶ୍‌ ସହାୟକ ହେବ ବୋଲି କୁହାଯାଇଛି l ଯାହାକୁ ନେଇ ସରଗରମ ହୋଇଛି ରାଜନୀତି l

କରୋନା ମହାମାରୀ ଭାଙ୍ଗିଦେଇଛି ଅର୍ଥନୈତିକ ଅଣ୍ଟା । ତଥାପି ରାଜ୍ୟ ସରକାର କିନ୍ତୁ ବନ୍ୟାରେ କ୍ଷତିଗ୍ରସ୍ତ ଚାଷୀଙ୍କୁ ସହାୟତା ଅଜାଡି ଦେଇଛନ୍ତି । ମୁଖ୍ୟମନ୍ତ୍ରୀ ଚାଷୀଙ୍କୁ କରୋନା ସହାୟତା ପାଇଁ ୩୦୦ କୋଟି ଟଙ୍କାର ପ୍ୟାକେଜ ଘୋଷଣା ପରେ ରାଜ୍ୟ ରାଜନୀତି ତୀବ୍ର ହୋଇଛି । ଲୋକେ କ୍ଷୟକ୍ଷତି ପାଇଁ ଚାହିଁ ବସିଥିବା ବେଳେ କେନ୍ଦ୍ରୀୟ ଟିମ ଆକଳନ କରିବାକୁ ଏଯାଏ ଆସିଲାନି । ଏହାକୁ ନେଇ କଂଗ୍ରେସ ଉଠାଇଛି ପ୍ରଶ୍ନ l ଉଭୟ ବିଜେଡି ବିଜେପି ଏକ ହୋଇଥିବାରୁ କେନ୍ଦ୍ରୀୟ ଟିମ କାହିଁକି ଆସୁନି ବୋଲି ବିଜେଡି ପ୍ରଶ୍ନ କରନି ବୋଲି କଂଗ୍ରେସ ନେତା ସୁରେଶ ରାଉତରାୟ ପ୍ରଶ୍ନ କରିଛନ୍ତି l

ଅନ୍ୟପକ୍ଷରେ ଏହାକୁ ନେଇ ବିଜେଡି ଜବାବ ରଖିଛି । ସଂଘୀୟ ବ୍ୟବସ୍ଥା ଅନୁଯାୟୀ ଟିମ ତୁରନ୍ତ ଆସିବା କଥା । ଏତେ ଦିନ ଯାଏ ଟିମ ଆସିନଥିବାରୁ କିଭଳି ବନ୍ୟାର ସଠିକ କ୍ଷୟକ୍ଷତି ଆକଳନ କରିବ ବୋଲି ବିଜେଡି ପ୍ରଶ୍ନ କରିଛି । ଅନ୍ୟପକ୍ଷରେ ବନ୍ୟା ସ୍ଥିତି ଆକଳନ ପାଇଁ କେନ୍ଦ୍ର ଟିମ ନଆସିବା ପରେ କେନ୍ଦ୍ର ପାଇଁ ଓକିଲାତି କରିଛି ରାଜ୍ୟ ବିଜେପି l କହିଛି, କେନ୍ଦ୍ର ଦେଉଥିବା ଅର୍ଥ ସଠିକ ଢଙ୍ଗରେ ଖର୍ଚ୍ଚ କରିବାରେ ଓଡିଶା ସରକାର ବିଫଳ ହୋଇଛନ୍ତି । ତେଣୁ ବର୍ତ୍ତମାନ ରାଜ୍ୟ ସରକାର କ୍ଷୟକ୍ଷତି ଆକଳନ କରି କେନ୍ଦ୍ରକୁ ଜଣାନ୍ତୁ । କେନ୍ଦ୍ରୀୟ ଟିମ ଆସିବାର କିଛି ଆବଶ୍ୟକତା ନାହିଁ ।  ଗତ ବନ୍ୟାରେ ରାଜ୍ୟର 8ଟି ଜିଲ୍ଲାରେ ବ୍ୟାପକ କ୍ଷତି ହୋଇଛି l