ରାଜ୍ୟ ସରକାରଙ୍କୁ ପ୍ରଶଂସା କଲେ କେନ୍ଦ୍ରମନ୍ତ୍ରୀ ଅଶ୍ୱିନୀ ଚୌବେ
ଭୁବନେଶ୍ୱର: ୱାନ୍ ନେସନ୍, ୱାନ୍ ରାସନ୍ ଯୋଜନାର କାର୍ଯ୍ୟକାରିତା ନେଇ ରାଜ୍ୟ ସରକାରଙ୍କୁ ପ୍ରଶଂସା କଲେ କେନ୍ଦ୍ରମନ୍ତ୍ରୀ ଅଶ୍ୱନୀ ଚୌବେ । କହିଛନ୍ତି, ରାଜ୍ୟରେ ଗରିବଙ୍କ ପାଇଁ ଖାଦ୍ୟ ଯୋଜନା ସୂଚାରୁ ରୁପେ ଚାଲିଛି । ସେହିପରି ପୁରୀର ବ୍ଲୁଫ୍ଲାଗ ବିଚର ରକ୍ଷଣାବେକ୍ଷଣ ନେଇ ମଧ୍ୟ ପ୍ରଶଂସା କରିଛନ୍ତି । ସମୁଦ୍ରତଟର ବିକାଶ ପାଇଁ ଦେଶର ୧୦ଟି ସମୁଦ୍ର କୂଳକୁ ଚିହ୍ନଟ କରାଯାଇଥିଲା । ପୁରୀର ସ୍ୱର୍ଣ୍ଣାଭ ବେଳାଭୂମି ଭଲ ମାନ୍ୟତା ପାଇଛି । ଆଗାମୀ ୫ ବର୍ଷରେ ଦେଶ ସାରା ୧୦୦ଟି ବିଚ୍କୁ ବ୍ଲୁଫାଗ୍ ବିଚରେ ପରିଣତ କରାଯିବ ।
ସେହିପରି ଓଡ଼ିଶାର ୧୦ଟି ବିଚକୁ ବ୍ଲୁଫ୍ଲାଗ ମାନ୍ୟତା ଦେବାକୁ ଯୋଜନା ଥିବା କହିଛନ୍ତି ମନ୍ତ୍ରୀ । ସେ ଆହୁରି ମଧ୍ୟ କହିଛନ୍ତି ଯେ, ସମୁଦ୍ରତଟର ରକ୍ଷଣାବେକ୍ଷଣ ଯୋଗୁ ଦେଶରେ ୨୦୨୦ ଜାନୁଆରୀରୁ ୨୦୨୧ ଅଗଷ୍ଟ ମଧ୍ୟରେ ପର୍ଯ୍ୟଟକଙ୍କ ସଂଖ୍ୟାରେ ୮୦ ପ୍ରତିଶତ ବୃଦ୍ଧି ହୋଇଛି । ହାତୀ ମଣିଷ ଲଢେଇ ସମ୍ପର୍କରେ କେନ୍ଦ୍ରମନ୍ତ୍ରୀ କହିଛନ୍ତି, ଓଡ଼ିଶାରେ ହାତୀ ଜନବସତି ଆଡ଼କୁ ନଯିବା ପାଇଁ ସୀମାରେ ବିଦ୍ୟୁତ୍ ବାଡ଼ ଦିଆଯିବ । ଏ ନେଇ ଓଡ଼ିଶା ବନ ବିଭାଗ ଅଧିକାରୀଙ୍କ ସହ ଆଲୋଚନା କରାଯାଇଥିବା ସେ ସୂଚନା ଦେଇଛନ୍ତି ।
