ପେଟ୍ରୋଲ, ଡିଜେଲ ଦର କମିବା ଚାହୁଁନି କେନ୍ଦ୍ର ସରକାର !

ଭୁବନେଶ୍ବର: ପେଟ୍ରୋଲ ଓ ଡିଜେଲ ଦର କମୁ, ଏକଥା ଚାହୁଁନି କେନ୍ଦ୍ର । ପେଟ୍ରୋଲ ଓ ଡିଜେଲକୁ ଜିଏସଟି ନେଟ୍କୁ ଆଣିବା ନେଇ ବିଜେପି ଯୁକ୍ତି ବାଢୁଛି, ହେଲେ ପ୍ରଶ୍ନ ଉଠୁଛି ତାକୁ କରିବ କିଏ ? କେନ୍ଦ୍ର ନା ରାଜ୍ୟ ? ବିଶେଷଜ୍ଞଙ୍କ ମତ, କେନ୍ଦ୍ର ପାଖରେ ରହିଛି ସବୁ କ୍ଷମତା । ସମ୍ବିଧାନ ସଂଶୋଧନ କରିବେ, ନଚେତ୍ ଲିଟର ପିଛା ପେଟ୍ରୋଲ ଓ ଡିଜେଲ ଉପରୁ କେନ୍ଦ୍ର ନେଉଥିବା ସେସ୍କୁ ମୂଳ ଉତ୍ପାଦ ଶୁଳ୍କରେ ମିଶ୍ରଣ କଲେ ତେଲ ଦର କମିଯିବ । କେନ୍ଦ୍ର ଏପରି ନିଷ୍ପତ୍ତି ନେଲେ ଆପେ ରାଜ୍ୟମାନେ ବି ଭାଟ୍ ହ୍ରାସ କରିପାରିବେ ।

ପେଟ୍ରୋଲ ଓ ଡିଜେଲ ଦର ନେଇ କେନ୍ଦ୍ରର ଭେଳିକି । ଦର ହ୍ରାସ କରିବା କ୍ଷମତା କେନ୍ଦ୍ର ସରକାରଙ୍କ ହାତରେ । ତଥାପି ଅବାନ୍ତର ଯୁକ୍ତି କରୁଛି ବିଜେପି । ଏହାକୁ ନାପସନ୍ଦ କରିଛନ୍ତି ଅର୍ଥନୀତି ସମୀକ୍ଷକ । ବାସ୍ତବରେ ଏଯାଏଁ ପେଟ୍ରୋଲ ଓ ଡିଜେଲକୁ ଜିଏସଟି ପରିସରଭୁକ୍ତ କରିବାକୁ କେବେ ବି ଆନ୍ତରିକତା ଦେଖାଇନି କେନ୍ଦ୍ର । ୨୦୧୬ରେ ୧୦୧ ତମ ସମ୍ବିଧାନ ସଂଶୋଧନ ଯୋଗୁଁ ଜିଏସଟି ଆଇନ ଆସିଲା । ସେଥିରେ ପେଟ୍ରୋଲ, ଡିଜେଲ, ବୈମାନିକ ଇନ୍ଧନ, ମଦ, ସିଏନଜି ଓ ଅଶୋଧିତ ତୈଳ ଉପରେ ମୂଲ୍ୟଯୁକ୍ତ କର ବସାଇବା ପାଇଁ ରାଜ୍ୟକୁ କ୍ଷମତା ଦିଆଯାଇଥିଲା । ଯଦି ପେଟ୍ରୋଲ ଓ ଡିଜେଲକୁ ଜିଏସଟି ନେଟ୍କୁ ଆଣିବାକୁ କେନ୍ଦ୍ର ଚାହିଁବ, ତା’ହେଲେ ସବୁ ରାଜ୍ୟଙ୍କ ସହମତି ଆଧାରରେ ଜିଏସଟି ପରିଷଦର ଅନୁମୋଦନ ନେଇ କେନ୍ଦ୍ର ଅର୍ଥମନ୍ତ୍ରୀ କ୍ୟାବିନେଟ୍କୁ ସୁପାରିସ କରିବେ । ଯଦି ସବୁ ରାଜ୍ୟ ସହମତ ନହୁଅନ୍ତି ତେବେ ଦୁଇ ତୃତୀୟାଂଶ ଭୋଟ୍ ଆଧାରରେ ବି କ୍ୟାବିନେଟକୁ ସୁପାରିସ କରାଯାଇପାରିବ । କ୍ୟାବିନେଟ୍ ଅନୁମୋଦନ ପରେ ସମ୍ବିଧାନ ସଂଶୋଧନ ହେବ ।

ଗୋଟିଏ ଲିଟର ପିଛା ପେଟ୍ରୋଲ ଉପରେ କେନ୍ଦ୍ର ସ୍ବତନ୍ତ୍ର ଉତ୍ପାଦ ଶୁଳ୍କ, କୃଷି ସେସ୍, ରାସ୍ତା ଭିତ୍ତିଭୂମି ବାବଦରେ ୧୮ ଟଙ୍କା ୫୦ ପଇସା ଆଦାୟ କରୁଛନ୍ତି । ଡିଜେଲରେ ଆଦାୟ ହେଉଛି ୧୪ ଟଙ୍କା । ଏଥିରୁ ଗୋଟିଏ ଟଙ୍କା ଡିଭିଜିବିଲ୍ ପୁଲ୍କୁ ଯାଏନି କି ରାଜ୍ୟମାନେ ଟଙ୍କାଟିଏ ପାଆନ୍ତିନାହିଁ ।

କେନ୍ଦୁପତ୍ର ଉପରୁ ସମ୍ପୂର୍ଣ୍ଣ ଜିଏସଟି ଛାଡ଼ କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗତବର୍ଷ ନଭେମ୍ବରରେ କେନ୍ଦ୍ର ଅର୍ଥମନ୍ତ୍ରୀଙ୍କୁ ଚିଠି ଲେଖିଲେ । ଏହାସହ ସଂସଦରେ ବିଜେଡି ସାଂସଦ ବି ସ୍ବର ଉଠାଇଛନ୍ତି । ହେଲେ କେନ୍ଦ୍ର ସରକାର ଏପର୍ଯ୍ୟନ୍ତ କେନ୍ଦୁପତ୍ର ଉପରୁ ଜିଏସଟି ଛାଡ଼ କଲେନି । ୧୮ ପ୍ରତିଶତ ଜିଏସଟି ଯୋଗୁଁ ଗରିବ ଆଦିବାସୀଙ୍କ ଆର୍ଥିକ ସଂକଟରେ ପଡୁଛନ୍ତି । ପେଟ୍ରୋଲ ଓ ଡିଜେଲକୁ ଜିଏସଟି ପରିସରଭୁକ୍ତ କରିବାକୁ ଜିଏସଟି ପରିଷଦ ବୈଠକରେ ବିଧିବଦ୍ଧ ଭାବେ ପ୍ରସ୍ତାବ ଆସିଲେ ଓଡ଼ିଶା ସରକାର ବିଚାର କରିବେ ।

ପେଟ୍ରୋଲ ଉପରେ ଏବେ କେନ୍ଦ୍ର ସରକାର ଉତ୍ପାଦ ଶୁଳ୍କ ୧ ଟଙ୍କା ୪୦ ପଇସା ଓ ଡିଜେଲ ଉପରେ ଲିଟର ପିଛା ଉତ୍ପାଦ ଶୁଳ୍କ ୧ ଟଙ୍କା ୮୦ ପଇସା ନେଉଛନ୍ତି । ଏହା ରାଜ୍ୟମାନଙ୍କ ଭିତରେ ୪୦ ପ୍ରତିଶତ ହିସାବରେ ଟିକସ୍ ଅଂଶ ଭାବେ ବଣ୍ଟନ ହେଉଛି । ସେସ୍ ଗୁଡ଼ିକ ମୂଳ ଉତ୍ପାଦ ଶୁଳ୍କରେ ମିଶ୍ରଣ କଲେ ରାଜ୍ୟମାନଙ୍କ ଅଂଶଧନ ପରିମାଣ ବି ଅଧିକ ହେବ । ହେଲେ ପ୍ରଶ୍ନ ଉଠୁଛି ସଂଘୀୟ ବ୍ୟବସ୍ଥାରେ କେନ୍ଦ୍ର ସରକାର ରାଜ୍ୟମାନଙ୍କୁ ଅଧିକ ଅର୍ଥ ଆସୁ ବୋଲି କ’ଣ ଚାହୁଁନାହାନ୍ତି ?