ସାତ କୋଟି ଠକେଇ ଅଭିଯୋଗରେ ଦ୍ବାରିକା ଜୁଏଲାରୀ ଓ ତାର ସହଯୋଗୀଙ୍କ ଘରେ CBI ରେଡ୍
1 min read
ଭୁବନେଶ୍ୱର: ସାତ କୋଟି ଠକେଇ ଅଭିଯୋଗରେ ଦ୍ବାରିକା ଜୁଏଲାରୀ ଓ ତାର ସହଯୋଗୀଙ୍କ ଘରେ CBI ଚଢ଼ାଉ କରିଛି । CBI DSP ଦିବାକର ମିଶ୍ରଙ୍କ ନେତୃତ୍ୱରେ ଏକ ଟିମ୍ ରେଡ୍ କରିଛି । CBI ଦ୍ବାରିକା ଜୁଏଲାରୀ ମୁଖ୍ୟ ଦ୍ବାରିକାନାଥ ପାତ୍ର, ତାଙ୍କ ପତ୍ନୀ, ପୁଅ, ବୋହୂ, ଝିଅ ଓ ଅନ୍ୟ ଜଣଙ୍କ ନାଁରେ ମାମଲା ରୁଜୁ କରିଛି । ଭୁବନେଶ୍ବରର 6ଟି ଜାଗାରେ ରେଡ୍ ହୋଇଥିବାବେଳେ ବହୁ ଗୁରୁତ୍ବପୂର୍ଣ କାଗଜପତ୍ର ଜବତ ହୋଇଥିବା ସୂଚନା ମିଳିଛି । ସହିଦ ନଗର ଇଣ୍ଡିଆନ ବ୍ୟାଙ୍କ ମ୍ୟାନେଜରଙ୍କ ଅଭିଯୋଗ କ୍ରମେ ମାମଲା ରୁଜୁ ହୋଇଥିଲା ।
2013 ମସିହାରେ ଦ୍ବାରିକା ଜୁଏଲାରୀର ଦ୍ବାରିକାନାଥ ଓ ଭାଗୀଦାର ତତ୍କାଳୀନ ଆହ୍ଲାବାଦ ବ୍ୟାଙ୍କ୍ ତଥା ବର୍ତ୍ତମାନର ଇଣ୍ଡିଆନ ବ୍ୟାଙ୍କରୁ ଛଅ କୋଟି ଟଙ୍କା କ୍ୟାସ କ୍ରେଡିଟରେ ନେଇଥିଲେ । ଏଥିରେ ଦ୍ବାରିକାନାଥଙ୍କ ଝିଅ ଗ୍ୟରେଣ୍ଟର ରହିଥିଲେ । ଏହି ଟଙ୍କାରେ ସୁନା, ରୁପା ପଥର କିଣିବେ ବୋଲି ବ୍ୟାଙ୍କରେ ଉଲ୍ଲେଖ କରିଥିଲେ । ପରେ ଏହି ଟଙ୍କା ନ ଶୁଝିବାରୁ ଏହା ଠକେଇ ବୋଲି 2022 ମାର୍ଚ୍ଚରେ ଘୋଷଣା ହୋଇଥିଲା । ଏହି ଟଙ୍କାରୁ ଦ୍ବାରିକାଙ୍କ ପୁଅ ଉମାଶଙ୍କରଙ୍କ ବିଲଡର କମ୍ପାନୀ ଆକାଉଣ୍ଟକୁ ତିନି କୋଟି 55 ଲକ୍ଷ ଯାଇଥିଲା । ବ୍ୟାଙ୍କର ଅସାଧୁ ଅଧିକାରୀଙ୍କ ସହ ହାତ ମିଳାଇ ଏଭଳି ଠକେଇ କରିଥିବା ପ୍ରାଥମିକ ତଦନ୍ତରୁ CBI ଜାଣିପାରିଛି ।
