ପ୍ରେମ ପାଇଁ ପୁଣି ପ୍ରତିଶୋଧ, ଦୁମକା ପରେ ଦିଲ୍ଲୀରେ ବିଭତ୍ସ ଘଟଣା
ନୂଆଦିଲ୍ଲୀ: ଦୁମ୍କା ପରେ ଦିଲ୍ଲୀରେ ଏକତରଫା ପ୍ରେମ ଓ ପ୍ରତିଶୋଧ କାହାଣୀ। ଦିଲ୍ଲୀ ସଂଗମ ବିହାରରେ ସ୍କୁଲରୁ ଫେରୁଥିବା ବେଳେ ଦ୍ବାଦଶ ଶ୍ରେଣୀ ଛାତ୍ରୀଙ୍କୁ ଗୁଳିମାଡ଼। ଏକତରଫା ପ୍ରେମକୁ ନେଇ ଅମାନତ ଅଲ୍ଲୀ ନାମକ ଯୁବକ ଗତ ୨୫ତାରିଖରେ ଛାତ୍ରୀଙ୍କ ପିଛା କରିଥିଲା। ଦୁଇ ସହଯୋଗୀଙ୍କ ସହ ଛାତ୍ରୀଙ୍କୁ ପିଛା କରିବା ପରେ ଗୁଳିମାଡ଼ କରିଥିଲା ଅମାନତ୍। ଛାତ୍ରୀଙ୍କ କାନ୍ଧରେ ଗୁଳି ବାଜିଥିଲା। ଏବେ ସେ ବିପଦମୁକ୍ତ ଥିବା ଜଣାପଡିଛି।
ଦୁଇ ବର୍ଷ ତଳେ ସୋସିଆଲ୍ ମିଡିଆରେ ଅମାନତ ସହ ଛାତ୍ରୀଙ୍କ ପରିଚୟ ହୋଇଥିଲା। ତେବେ ଛାତ୍ରୀ ଜଣକ ଅମାନତକୁ ସୋସିଆଲ୍ ମିଡିଆରେ ବ୍ଲକ କରିବା ସହ କଥାବାର୍ତ୍ତା ବନ୍ଦ କରିଦେଇଥିଲେ। ଏଥିରେ ଭୀଷଣ ରାଗିବା ସହ ଛାତ୍ରୀଙ୍କୁ ହତ୍ୟା କରିବାକୁ ପ୍ଲାନ୍ କରିଥିଲା ଅମାନତ। ପୋଲିସ ଅମାନତ ଓ ତାର ଦୁଇ ସହଯୋଗୀଙ୍କୁ ଗିରଫ କରିଛି ।
