ଭାରତ ବନ୍ଦ ବେଳେ ଧକ୍କା ଦେଲା କାର, ଶ୍ରମିକ ନେତା ଗୁରୁତର
ନନ୍ଦିଘୋଷ ବ୍ୟୁରୋ: ସାରା ଦେଶରେ ଭାରତ ବନ୍ଦ କରାଯାଇଛି । ଯାହାର ପ୍ରଭାବ ଦେଶର ଛୋଟରୁ ବଡ଼ ସହରରେ ଦେଖିବାକୁ ମିଳିଛି । ଶ୍ରମିକ ସଙ୍ଗଠନ ସମେତ ଶତାଧିକ ଆନ୍ଦୋଳନକାରୀ ରାସ୍ତାରୋକ କରି ବନ୍ଦକୁ ସମର୍ଥନ କରିବାକୁ ଲୋକଙ୍କୁ ଅନୁରୋଧ କରୁଛନ୍ତି । ଏହାରି ଭିତରେ ବାଲେଶ୍ବରରେ ଭାରତ ବନ୍ଦ ପାଳନ ବେଳେ ଅଭାବନୀୟ ଘଟଣା ଦେଖିବାକୁ ମିଳିଛି । ଏକ କାର ଦ୍ରୁତ ଗତିରେ ଆସି ଧକ୍କା ଦେବା କାରଣରୁ ଜଣେ ଶ୍ରମିକ ନେତା ଗୁରୁତର ଆହତ ହୋଇଛନ୍ତି ।
ମିଳିଥିବା ଖବର ଅନୁସାରେ ସକାଳୁ ସକାଳୁ ବାଲେଶ୍ବର ସହରରେ ଶ୍ରମିକ ସଂଗଠନ ପକ୍ଷରୁ ଭାରତ ବନ୍ଦ କରାଯାଇଥିଲା । ରେଲଓ୍ବେ ଷ୍ଟେସନ ଛକରେ ଶ୍ରମିକ ସଂଗଠନ ପକ୍ଷରୁ ରାସ୍ତାରୋକ କରାଯାଇଥିଲା । ଏହି ସମୟରେ ଏକ କାର ଦ୍ରୁତଗତିରେ ଆସି ଆନ୍ଦୋଳନକାରୀଙ୍କ ଭିଡରେ ପଶିଯିବା ସହ ଶ୍ରମିକ ନେତା ଗୌରାଙ୍ଗ ପାଣିଗ୍ରାହୀଙ୍କୁ ଧକ୍କା ଦେଇଥିଲା । ଫଳରେ ତାଙ୍କ ନାକ ଓ ଆଣ୍ଠୁରେ ଗଭୀର ଆଘାତ ଲାଗିଛି । ଆନ୍ଦୋନକକାରୀମାନେ ତାଙ୍କୁ ଉଦ୍ଧାର କରି ପୋଲିସ ଗାଡିରେ ଗିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଛନ୍ତି ।
ଅନ୍ୟପଟେ ଦୁର୍ଘଟଣା ଘଟାଇବା ପରେ କାର ସହ ଡ୍ରାଇଭର ଘଟଣା ସ୍ଥଳରୁ ଫେରାର ହୋଇଯାଇଛନ୍ତି । ତୁରନ୍ତ କାରକୁ ଜବତ କରିବା ସହ ଡ୍ରାଇଭରଙ୍କୁ ଗିରଫ କରିବାକୁ ଶ୍ରମିକ ସଂଗଠନ ପକ୍ଷରୁ ଦାବି କରାଯାଇଛି ।
