‘ସଂକ୍ରମଣ ପ୍ଲାଟୋ ଷ୍ଟେଜକୁ ନ ଆସିବା ଯାଏ କେବେ କମିବ କହି ହେବନି’

ଭୁବନେଶ୍ୱର: ଜାନୁଆରୀ ୧ରେ ୨୯୮, ଜାନୁଆରୀ ୯ରେ ୪ ହଜାର ୭୧୪ ସଂକ୍ରମିତ ଚିହ୍ନଟ । ମାତ୍ର ୮ ଦିନ ମଧ୍ୟରେ ରାଜ୍ୟରେ ଦୈନିକ ସଂକ୍ରମଣ ମାମଲା ୪ ହଜାର ୪୧୬ ବୃଦ୍ଧି ପାଇଛି । ଏନେଇ ପ୍ରତିକ୍ରିୟା ରଖିଛନ୍ତି ସ୍ୱାସ୍ଥ୍ୟ ନିର୍ଦ୍ଦେଶକ ବିଜୟ ମହାପାତ୍ର । ସେ କହିଛନ୍ତି, ସଂକ୍ରମଣ ପ୍ଲାଟୋ ଷ୍ଟେଜକୁ ନ ଆସିବା ଯାଏ କେବେ କମିବ କହି ହେବନି । ସଂକ୍ରମଣ ରୋକିବାକୁ କଟକଣା ଜାରି କରାଯାଇଛି । ବର୍ତ୍ତମାନ ସଂକ୍ରମଣ ଆକଳନ କରିବା କଷ୍ଟକର ।

କେବଳ ଜାନୁଆରୀ ମାସର ୮ ଦିନରେ ୧୫ ହଜାର ୬୧୧ ଜଣ ସଂକ୍ରମିତ ଚିହ୍ନଟ ହେଲେଣି । ଗତକାଲି ତୁଳନାରେ ଆଜି ୧୦୩୫ ମାମଲା ବୃଦ୍ଧି ପାଇଛି । ଅନ୍ୟପଟେ ପ୍ରଥମ ପ୍ରବାହର ପିକ୍ ଅତିକ୍ରମ କରିଛି ଆଜିର ସଂକ୍ରମଣ । ପ୍ରଥମ ପ୍ରବାହରେ ୨୦୨୦ ସେପ୍ଟେମ୍ବର ୨୫ରେ ୪ ହଜାର ୩୫୬ ଆକ୍ରାନ୍ତ ଚିହ୍ନଟ ହୋଇଥିଲେ । ଆଜି ରାଜ୍ୟରେ ଚିହ୍ନଟ ହୋଇଛନ୍ତି ୪ ହଜାର ୭୧୪ ସଂକ୍ରମିତ ।

ଅନ୍ୟପଟେ ରାଜ୍ୟରେ ଜାନୁଆରୀ ଶେଷ ସୁଦ୍ଧା କରୋନା ପିକ୍ ଛୁଇଁବ ବୋଲି ସେ କରିଛନ୍ତି । ଯଦିଓ ଏବେ ସଂକ୍ରମଣ ବଢୁଛି, ଗୁରୁତର କରୁନି । ଅଧିକ ହସ୍ପିଟାଲ ବେଡ୍ ଆବଶ୍ୟକତା ପଡୁନାହିଁ । ରାଜ୍ୟରେ କେସ୍ ଲୋଡ୍ ଏବଂ ହସ୍ପିଟାଲିଟି ଉପରେ କମ୍ ପ୍ରଭାବ ପଡୁଛି । ଗୁରୁତର ସଂଖ୍ୟା ବହୁତ କମ୍ ରହୁଛି । ଆମେ ଯଦି ସତର୍କ ରହିବା ଫେବ୍ରୁଆରୀ ଶେଷ ସୁଦ୍ଧା ଏହି ସଂକ୍ରମଣକୁ ପାର କରିଯିବା ବୋଲି କହିଛନ୍ତି ସ୍ୱାସ୍ଥ୍ୟ ବିଶେଷଜ୍ଞ ।