ଗାଁ ଭିତରେ ପଶିଲା କେନାଲ ପାଣି

ଧର୍ମଗଡ଼: ଗାଁ ଭିତରେ ପଶିଲା କେନାଲ ପାଣି । କଳାହାଣ୍ଡି ଜିଲ୍ଲା କଲମପୁରରେ କେନାଲ ପାଣି ପଶିବା ଫଳରେ ଲୋକ ମାନଙ୍କୁ ଅନେକ ଅସୁବିଧାର ସମ୍ମୁଖୀନ ହେବାକୁ ପଡ଼ିଛି । ଅନେକ ଦିନରୁ କଲମପୁର ମାଇନର ୧ କେନାଲ ମରାମତି ଅଭାବରୁ ଶୋଚନୀୟ ହୋଇପଡ଼ିଛି । ଅପରାହ୍ଣରେ ଏହି କେନାଲରେ ଆବଶ୍ୟକତା ଠାରୁ ଅଧିକ ପାଣି ଛଡ଼ାଯିବାରୁ ଏଭଳି ଘଟଣା ଘଟିଛି ।

ପ୍ରାଣୀ ଚିକିତ୍ସାଳୟ ନିକଟରେ ଥିବା ଏକ ପୋଲରେ ଆବର୍ଜନା ଭର୍ତ୍ତି ହୋଇଯିବାରୁ ତଳମୁଣ୍ଡକୁ ପାଣି ଯାଇ ନପାରି ଗାଁ ଭିତରକୁ ପଶି ଯାଇଥିଲା । ବିଭାଗୀୟ ଅଧିକାରୀ ଖବର ପାଇ କେନାଲର ଜଳସ୍ତରକୁ ନିୟନ୍ତ୍ରଣକୁ ଆଣିବା ପରେ ପରିସ୍ଥିତି ସ୍ୱାଭାବିକ ହୋଇଛି । ତୁରନ୍ତ କେନାଲ ମରାମତି ପାଇଁ ସ୍ଥାନୀୟ ଲୋକ ଦାବି କରିଛନ୍ତି ।