ଓ୍ବାକଫ ବୋର୍ଡର ଜମି ବିକ୍ରି ହୋଇପାରିବ କି, ଏହି ସମ୍ପତ୍ତିକୁ କେଉଁଠାରେ ବ୍ୟବହାର କରାଯାଏ?

ନୂଆଦିଲ୍ଲୀ: ଓ୍ବାକଫ ସଂଶୋଧନ ବିଲ ଲୋକସଭାରେ ପାସ ହେବା ପରେ ତାହାକୁ ନେଇ ଅନେକ ପ୍ରଶ୍ନ ଉଠିଛି । ସେଥିମଧ୍ୟରୁ ଗୋଟିଏ ବଡ଼ ପ୍ରଶ୍ନ ହେଉଛି, ଓ୍ବାକଫ ବୋର୍ଡର ଜମି କ’ଣ ବିକ୍ରି ହୋଇପାରିବ, ଏହାର ବ୍ୟବହାର କେଉଁଠାରେ ହୋଇଥାଏ? କେନ୍ଦ୍ରମନ୍ତ୍ରୀ କିରେନ ରିଜିଜୁ ଏହି ବିଲକୁ ଲୋକସଭାରେ ଆଗତ କରିବା ପରେ ୧୨ ଘଣ୍ଟାରୁ ଅଧିକ ସମୟ ଧରି ଚର୍ଚ୍ଚା ପରେ ରାତି ୨ଟାରେ ଏହା ପାସ୍ ହୋଇଥିଲା । ବିଲର ସପକ୍ଷରେ ୨୮୮ଟି ଓ ବିପକ୍ଷରେ ୨୩୨ଟି ଭୋଟ ପଡ଼ିଥିଲା । ଶାସକ ପକ୍ଷର ସାଂସଦମାନେ ଏହାକୁ ସମର୍ଥନ କରିଥିବା ବେଳେ ବିରୋଧୀ ସାଂସଦମାନେ ଏହି ସଂଶୋଧନକୁ କଡ଼ା ବିରୋଧ କରିଥିଲେ । AIMIM ସାଂସଦ ଅସଦୁଦ୍ଦିନ ଓଓ୍ବେସୀ ନିଜର ମତ ରଖିବାକୁ ଯାଇ ବିଲକୁ ଚିରି ଦେଇଥିଲେ ।

ଓ୍ବାକଫର ସିଧା ଅର୍ଥ ହେଉଛି, ଓଲ୍ଲାହଙ୍କ ନାମରେ ଦାନ କରାଯାଇଥିବା କୌଣସି ସମ୍ପତ୍ତି ବା ବସ୍ତୁ, ଯାହାକୁ କେବଳ ପରୋପକାର ଉଦ୍ଦେଶ୍ୟରେ ଦାନ କରାଯାଏ । କୌଣସି ମୁସଲମାନ ନିଜର ଚଳନ୍ତି ବା ଅଚଳନ୍ତି ସମ୍ପତ୍ତିକୁ ଓ୍ବାକଫ ନାମରେ ଦାନ କରିପାରିବେ । ଯଦି ଥରେ କୌଣସି ସମ୍ପତ୍ତି ବା ଜମି ଓ୍ବାକଫ ନାମରେ କରାଯାଏ, ତେବେ ଉକ୍ତ ସମ୍ପତ୍ତି ଉପରେ ଉକ୍ତ ବ୍ୟକ୍ତିଙ୍କ ମାଲିକାନା ସମାପ୍ତ ହୋଇଯାଏ । ତାହାକୁ ପୁନର୍ବାର ଅଣ ଓ୍ବାକଫ ସମ୍ପତ୍ତିରେ ରୂପାନ୍ତରିତ କରାଯାଇ ପାରିବ ନାହିଁ । ଓ୍ବାକଫର ସମ୍ପତ୍ତିର ଦେଖାଶୁଣା ପ୍ରତି ରାଜ୍ୟରେ ଥିବା ଏକ ଓ୍ବାକଫ ବୋର୍ଡ କରିଥାଏ ।

ଦେଶରେ ମୋଟ ୩୨ଟି ଓ୍ବାକଫ ବୋର୍ଡ ରହିଥିବା ବେଳେ ୟୁପି ଓ ବିହାରରେ ଦୁଇଟି ବୋର୍ଡ ରହିଛି । ଓ୍ବାକଫର କୌଣସି ସମ୍ପତ୍ତି ନା ବିକ୍ରି କରିହେବ ନା ଲିଜରେ ଦେଇହେବ । ଓ୍ବାକଫ ବୋର୍ଡର ଜମିକୁ ମସଜିଦ ତିଆରି କରିବା, ସମାଧି ସ୍ଥଳ ତିଆରି କରିବା, ହସ୍ପିଟାଲ ଖୋଲିବା, ଗରିବଙ୍କ ଆଶ୍ରୟ ଦେବା କାର୍ଯ୍ୟରେ ବ୍ୟବହାର କରାଯାଇଥାଏ । ଓ୍ବାକଫରେ ଲୋକମାନେ ନିଜର ଚଳ-ଅଚଳ କୌଣସି ସମ୍ପତ୍ତି ଯେପରିକି ପଡ଼ିଆ, ପୁସ୍ତକ, କ୍ଷେତ, ଲାଇବ୍ରେରୀ, ଘର, କୌଣସି ବ୍ୟବହାରଯୋଗ୍ୟ ଜିନିଷ ଦାନ କରିପାରିବେ ।