ରାଜ୍ୟ ବସସଂଘର ନିଷ୍ପତ୍ତି ବିରୋଧରେ ବାଲେଶ୍ବର, ଗଡିଲା ଘରୋଇ ବସ
ବାଲେଶ୍ବର: ଜିଲ୍ଲା ଭିତରେ ଘରୋଇ ବସ୍ ଚଳାଚଳ ସ୍ବାଭାବିକ । ବାଲେଶ୍ବରରୁ ଜଳେଶ୍ବର, ଭୋଗରାଇ, ବାଲିଆପାଳ, ନୀଳଗିରି, ସୋର, ଖଇରାକୁ ଚାଲିଛି ବସ୍ । ଭୁବନେଶ୍ବରକୁ ମଧ୍ୟ ଗୋଟିଏ ବସ୍ ଚଳାଚଳ କରିଛି । ରାଜ୍ୟ ସଂଘର ନିଷ୍ପତ୍ତିକୁ ବିରୋଧକରି ବାଲେଶ୍ବର ଜିଲ୍ଲା ଘରୋଇ ବସ୍ ମାଲିକ ସଂଘ ଆଜି ସକାଳୁ ଜିଲ୍ଲାର ସମସ୍ତ ସ୍ଥାନକୁ ବସ୍ ଚଳାଇଛନ୍ତି । ଫଳରେ ଯାତ୍ରୀସେବା ସ୍ବାଭାବିକ ରହିଛି ।
ବାଲେଶ୍ବର ବସ୍ଷ୍ଟାଣ୍ଡରୁ ଭୂବନେଶ୍ବରକୁ ଗୋଟିଏ ବସ୍ ଯାତ୍ରୀ ମାନଙ୍କୁ ନେଇ ବାହାରିଥିବାବେଳେ, ବାଲିଆପାଳ, ଜଳେଶ୍ବର, ଭୋଗରାଇ, ଚନ୍ଦନେଶ୍ବର, ବସ୍ତା, ନୀଳଗିରି, ସୋର, ଖଇରା ପ୍ରଭୃତି ସ୍ଥାନକୁ ବସ୍ ଚଳାଚଳ କରିଛି । ବସ୍ ଧର୍ମଘଟ ନେଇ ରାଜ୍ୟ ସଂଘର ନିଷ୍ପତ୍ତି ପରେ ବାଲେଶ୍ବର ଜିଲ୍ଲା ଘରୋଇ ବସ୍ ମାଲିକ ସଂଘ ଏହାକୁ ବିରୋଧ କରିଥିଲା । ପାର୍ବଣ ଋତୁ ଥିବାରୁ ଲକ୍ଷ୍ମୀପୂଜା ପରେ ମଧ୍ୟ ସରକାରଙ୍କ ସହିତ ସମସ୍ୟା ନେଇ ଆଲୋଚନା କରାଯାଇ ପାରିବ ।
ଯାତ୍ରୀ ମାନଙ୍କୁ ସମସ୍ୟାରେ ନପକାଇ ବସ୍ସେବା ସ୍ବାଭାବିକ ରଖିବାକୁ ସଂଘ ଗତକାଲି ଘୋଷଣା କରିଥିଲା । ଏହି ଘୋଷଣା ଅନୁସାରେ ଆଜି ସକାଳ ଠାରୁ ବସ୍ ଚଳାଚଳ ସ୍ବାଭାବିକ ରହିଛି ।
