ବିନା କାରଣରେ ସରପଞ୍ଚଙ୍କୁ ଅଟକ, ବିଳମ୍ବିତ ରାତିରେ ବୁର୍ଲା ଥାନା ଘେରିଲେ ଗ୍ରାମବାସୀ
ସମ୍ବଲପୁର: ବିଳମ୍ବିତ ରାତିରେ ବୁର୍ଲା ଥାନା ଘେରାଉ କଲେ ଶତାଧିକ ଗ୍ରାମବାସୀ । ଚାଂରପୁର ଗ୍ରାମର ପୂର୍ବତନ ସରପଞ୍ଚକୁ ବୁର୍ଲା ପୋଲିସ କୌଣସି କାରଣ ନଥାଇ ଥାନାରେ ଅଟକ ରଖିଥିବା ଅଭିଯୋଗରେ ବୁର୍ଲା ଥାନା ଘେରିଥିଲେ ଗ୍ରାମବାସୀ । ଚାଂରପୁର ଗ୍ରାମରେ ଗତ କିଛି ଦିନ ହେବ ବିଦ୍ୟୁତ କାଟ ହେଉଛି । ଫଳରେ ଚାଷ ଜମିରେ ପାଣି ଯୋଗାଣ ହୋଇପାରୁନଥିବା ବେଳେ ଛାତ୍ରଛାତ୍ରୀଙ୍କ ଅନଲାଇନ ପାଠ ପଢ଼ାରେ ମଧ୍ୟ ଅନେକ ସମସ୍ୟା ଦେଖାଦେଉଛି ।
ଘଟଣାକୁ ନେଇ ପୂର୍ବତନ ସରପଞ୍ଚ ଆହ୍ଲଦ ମେହେର ଓ ବିଦ୍ୟୁତ୍ କର୍ମଚାରୀଙ୍କ ମଧ୍ୟରେ ବଚସା ହୋଇଥିଲା । ଅଭିଯୋଗ ପରେ ବୁର୍ଲା ପୋଲିସ ଗ୍ରାମର ୩ ଜଣଙ୍କୁ ଥାନାରେ ଅଟକ ରଖିଥିଲା । ଏହାକୁ ବିରୋଧ କରି ଶତାଧିକ ମହିଳା ଓ ପୁରୁଷ ବୁର୍ଲା ଥାନାକୁ ଘେରିଥିଲେ । ବିଳମ୍ବିତ ରାତି ପର୍ଯ୍ୟନ୍ତ ଥାନା ଘେରିବା ପରେ ବିଦ୍ୟୁତ ବିଭାଗର ଏସ୍ଡିଓ ଓ କନିଷ୍ଠ ଯନ୍ତ୍ରୀ ଆସି ଗ୍ରାମବାସୀଙ୍କୁ ବୁଝାସୁଝା କରିଥିଲେ ।
