ଧାନ ଫସଲରେ ଚକଡା ପୋକ, ଚିନ୍ତାରେ ଚାଷୀ

ବଲାଙ୍ଗିର: ଚାଷୀଙ୍କୁ ନୟାନ୍ତ କଲାଣି ଚକଡା ପୋକ। କିଛି ଦିନ ତଳେ ଜମିରେ ହସୁଥିଲା ଧାନ ଫସଲ। ସୁନାର ଫସଲକୁ ଦେଖି ଖୁସି ହେଉଥିଲା ଚାଷୀ। ଅମଳ କରି ଖଳାକୁ ନେବ। ଦି ପଇସା ଭଲ ରୋଜଗାର କରିବାର ଲକ୍ଷ୍ୟ ରଖିଥିଲା। ହେଲେ ସ୍ୱପ୍ନ ସବୁ ସ୍ୱପ୍ନରେ ରହିଗଲା। ଧାନ ଫସଲରେ ଚକଡା ଏମିତି ମାଡିଛି ଯେ ଛାଡିବାର ନାଁ ନେଉନି। ବଲାଙ୍ଗିରର ୧୪ଟି ବ୍ଲକର ବିଭିନ୍ନ ଅଞ୍ଚଳରେ ଚକଡ଼ା ପ୍ରାଦୁର୍ଭାବ ଦେଖିବାକୁ ମିଳିଛି। ଧାର ଉଧାର କରି ଚାଷ କରିଥିବା ଚାଷୀ ଏବେ ଚିନ୍ତାରେ।

ଚକଡା ପୋକ ସମସ୍ୟାକୁ ନେଇ ଚାଷୀ କୃଷି ବିଭାଗରେ ଅଭିଯୋଗ ପରେ ବି ନିରାଶ। ଔଷଧ ପ୍ରୟୋଗ ପରେ ବି ଚକଡ଼ା ନିୟନ୍ତ୍ରଣ ହେଉ ନଥିବା ଅଭିଯୋଗ କରିଛନ୍ତି। କୃଷି ବିଭାଗ ପକ୍ଷରୁ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ କ୍ଷତିଗ୍ରସ୍ତ ଚାଷୀ ମାନେ ଦାବି କରିଛନ୍ତି। ସେପଟେ କୃଷି ବିଭାଗ ପକ୍ଷରୁ ବିଭିନ୍ନ ଅଞ୍ଚଳ ପରିଦର୍ଶନ କରି ସ୍ଥିତି ପରଖିବା ସହ ଚକଡା ନିୟନ୍ତ୍ରଣ ପାଇଁ ଚାଷୀଙ୍କୁ ଆବଶ୍ୟକ ପରାମର୍ଶ ଦିଆଯାଇଥିବା କହିଛନ୍ତି ଜିଲ୍ଲା ମୁଖ୍ୟ କୃଷି ଅଧିକାରୀ।