ଆସନ୍ତା ସପ୍ତାହରେ ଭାରତ ଆସିବେ ବ୍ରିଟେନ୍ ପ୍ରଧାନମନ୍ତ୍ରୀ ବୋରିସ୍ ଜନସନ୍

ନୂଆଦିଲ୍ଲୀ: ଭାରତ ଆସିବେ ବ୍ରିଟେନ୍ ପ୍ରଧାନମନ୍ତ୍ରୀ ବୋରିସ ଜନସନ୍ । ଆସନ୍ତା ସପ୍ତାହରେ ଭାରତ ଗସ୍ତରେ ଆସି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ବାଣିଜ୍ୟ ଓ ନିରାପତ୍ତା ବିଷୟରେ ଆଲୋଚନା କରିବେ । ଭାରତ ଓ ବ୍ରିଟେନ ମଧ୍ୟରେ ସମ୍ପର୍କକୁ ସୁଦୃଢ଼ କରିବାକୁ ପ୍ରୟାସ କରିବେ ବୋରିସ୍ ଜନସନ୍ । ଋଷ-ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ମଧ୍ୟରେ ଜନସନଙ୍କ ଏହି ଗସ୍ତ ବେଶ୍ ଗୁରୁତ୍ୱବହନ କରିବ ।

ବୋରିସ ଜନସନ ବ୍ରିଟେନର ପ୍ରଧାନମନ୍ତ୍ରୀ ହେବା ପରେ ପ୍ରଥମ ଥର ପାଇଁ ଭାରତ ଗସ୍ତରେ ଆସୁଛନ୍ତି । ଗତବର୍ଷ ବୋରିସ୍ ଜନସନ ଗତ ବର୍ଷ ଭାରତ ଆସିବାର କାର୍ଯ୍ୟକ୍ରମ ଥିଲା । ଜାନୁଆରୀ ୨୬ରେ ଗଣତନ୍ତ୍ର ଦିବସରେ ମୁଖ୍ୟ ଅତିଥି ଭାବରେ ଭାରତ ଆସିବାର କାର୍ଯ୍ୟକ୍ରମ ଥିଲା । କିନ୍ତୁ ମହାମାରୀ କରୋନା କାରଣରୁ ଜନସନଙ୍କ ଗସ୍ତକୁ ଦୁଇ ଥର ବାତିଲ କରିବାକୁ ପଡ଼ିଥିଲା ।

ଭାରତ ଆସିବା ପୂର୍ବରୁ ବୋରିସ୍ ଜନସନ ରବିବାର କହିଛନ୍ତି ଯେ ମୁଁ ଭାରତ ଗସ୍ତରେ କିଛି ଗୁରୁତ୍ୱପୂର୍ଣ୍ଣ ଜିନିଷ ଉପରେ ଧ୍ୟାନ ଦେବେ । ଯାହା ଉଭୟ ଦେଶଙ୍କ ଜନସାଧାରଣଙ୍କ ପାଇଁ ଗୁରୁତ୍ୱପୂର୍ଣ୍ଣ । ଏହି ଗସ୍ତରେ ନିଯୁକ୍ତି ସୃଷ୍ଟି, ଅର୍ଥନୈତିକ ବିକାଶଠାରୁ ଆରମ୍ଭ କରି ପ୍ରତିରକ୍ଷା ପର୍ଯ୍ୟନ୍ତ ଏହା ଅନ୍ତର୍ଭୂକ୍ତ ଅଟେ ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବ୍ରିଟେନ ପ୍ରଧାନମନ୍ତ୍ରୀ ବୋରିସ ଜନସନଙ୍କ ସହ ଶେଷ ଥର ପାଇଁ ଗତ ବର୍ଷ ନଭେମ୍ବର ମାସରେ ଗ୍ଲାସଗୋ ସମିଟିରେ ସାକ୍ଷାତକାର ହୋଇଥିଲା । ସୂଚନା ଅନୁସାରେ ଗତ ମାସରେ ଦୁଇ ଦେଶର ନେତା ଫୋନରେ କଥା ହୋଇଥିଲେ। ଦୁଇ ନେତା ୟୁକ୍ରେନର ସ୍ଥିତି ଉପରେ ବିସ୍ତୃତ ଭାବେ ଚର୍ଚ୍ଚା କରିଥିଲେ । ଏହାସହ ଦୁହେଁ ଦ୍ୱିପାକ୍ଷିକ ପ୍ରସଙ୍ଗ ଉପରେ ମଧ୍ୟ ଚର୍ଚ୍ଚା କରିଥିଲେ । ବାଣିଜ୍ୟ, ପ୍ରଯୁକ୍ତିବିଦ୍ୟା, ନିବେଶ, ପ୍ରତିରକ୍ଷା ଏବଂ ସୁରକ୍ଷା, ସହ ଅନ୍ୟ କ୍ଷେତ୍ରରେ ସହଯୋଗକୁ ଅଧିକ ମଜବୁତ କରିବା ଉପରେ ସହମତି ବ୍ୟକ୍ତ କରିଥିଲେ ।