ବ୍ରିଟେନ “କଦାପି ଆତ୍ମସମର୍ପଣ କରିବ ନାହିଁ” ; ଦକ୍ଷିଣପନ୍ଥୀ ବିରୋଧୀଙ୍କୁ କଡ଼ା ଚେତାବନୀ ଦେଇଛନ୍ତି କେର ଷ୍ଟାର୍ମର

ନନ୍ଦିଘୋଷ ବ୍ୟୁରୋ: କୌଣସି ପରିସ୍ଥିତିରେ ବି ଦକ୍ଷୀଣପନ୍ଥୀଙ୍କ ନିକଟରେ ମୁଣ୍ଡ ନୁଆଁଇବ ନାହିଁ ବ୍ରିଟେନ ସରକାର । ଏଭଳି କହି ପ୍ରବାସୀ ବିରୋଧୀ କର୍ମୀ ଟମି ରବିନସନଙ୍କ ନେତୃତ୍ବାଧୀନ ଦକ୍ଷିଣପନ୍ଥୀ ବିରୋଧୀଙ୍କୁ କଡ଼ା ଚେତାବନୀ ଦେଇଛନ୍ତି ପ୍ରଧାନମନ୍ତ୍ରୀ କେର ଷ୍ଟାର୍ମର । ଦେଶ ଭିତରେ ଏଭଳି ବିରୋଧ ପ୍ରଦର୍ଶନକୁ ନିନ୍ଦା କରିଛନ୍ତି ପ୍ରଧାନମନ୍ତ୍ରୀ କେର ଷ୍ଟାର୍ମର ।

ଲୋକମାନଙ୍କର ଶାନ୍ତିପୂର୍ଣ୍ଣ ପ୍ରତିବାଦ କରିବାର ଅଧିକାର ଅଛି। ଏହା ଆମ ଦେଶର ମୂଲ୍ୟବୋଧର ମୂଳ । କିନ୍ତୁ ଆମେ ପୋଲିସ ଅଧିକାରୀଙ୍କ ଉପରେ ଆକ୍ରମଣକୁ ସମର୍ଥନ କରିବୁ ନାହିଁ । ବ୍ରିଟେନ ଏକ ଗର୍ବର ସହିତ ସହନଶୀଳତା, ବିବିଧତା ଏବଂ ସମ୍ମାନ ଉପରେ ନିର୍ମିତ ଏକ ରାଷ୍ଟ୍ର । ଆମର ପତାକା ଆମର ବିବିଧ ଦେଶକୁ ପ୍ରତିନିଧିତ୍ୱ କରେ । ଆମେ ଏହାକୁ କେବେବି ହିଂସା, ଭୟ ଏବଂ ବିଭାଜନର ପ୍ରତୀକ ଭାବରେ ବ୍ୟବହାର କରୁଥିବା ଲୋକଙ୍କ ହାତରେ ସମର୍ପଣ କରିବୁ ନାହିଁ ବୋଲି କହିଛନ୍ତି ପ୍ରଧାନମନ୍ତ୍ରୀ ।

ଗତକାଲି ପ୍ରବାସୀ ବିରୋଧୀ କର୍ମୀ ଟମି ରବିନସନଙ୍କ ନେତୃତ୍ବରେ ଦକ୍ଷିଣପନ୍ଥୀମାନେ ଲଣ୍ଡନରେ ବଡ଼ ଧରଣର ବିକ୍ଷୋଭ କରିଛନ୍ତି । ଏଥିରେ ସାମିଲ ହୋଇଛନ୍ତି ଲକ୍ଷାଧିକ କର୍ମୀ । କେତେକ ସ୍ଥାନରେ ଭଙ୍ଗାରୁଜା ବି ହୋଇଛି । ପୋଲିସ ସହ ଆନ୍ଦୋଳନକାରୀଙ୍କ ଧସ୍ତାଧସ୍ତି ହୋଇଛି । ୟୁନାଇଟ ଦି କିଙ୍ଗଡମ ନାମରେ ଏହି ଅଭିଯାନକୁ ନେଇ ବ୍ରିଟେନ ରାଜନୀତିରେ ଦେଖାଯାଇଛି କମ୍ପନ । ଷ୍ଟାଣ୍ଡ ଅପ୍ ଟୁ ରାସିଜିମ୍ ପକ୍ଷରୁ ୫ ହଜାର ଲୋକଙ୍କୁ ନେଇ ପ୍ରତିବାଦ କରାଯିବା ଘଟଣାର ଜବାବରେ ୟୁନାଇଟ ଦି କିଙ୍ଗଡମ ପ୍ରତିବାଦ କରାଯାଇଛି । ଏହି ଆନ୍ଦୋଳନବେଳେ କିଛି ଅଫିସରଙ୍କୁ ଆନ୍ଦୋଳନକାରୀ ଆକ୍ରମଣ କରିଥିବା ସୂଚନା ମିଳିଛି । ଆନ୍ଦୋଳନକାରୀଙ୍କ ହାତରେ ବ୍ରିଟେନ, ଆମେରିକା ଓ ଇସ୍ରାଏଲ ପତାକା ଦେଖିବାକୁ ମିଳିଥିବାବେଳେ ସେମାନେ ପ୍ରବାସୀ ରହୁଥିବା ହୋଟେଲ ଆଗରେ ବିକ୍ଷୋଭ ପ୍ରଦର୍ଶନ କରିଥିଲେ । ଆନ୍ଦୋଳନକାରୀମାନେ ପିନ୍ଧିଥିବା ଟୋପିରେ ମେକ୍ ଆମେରିକା ଗ୍ରେଟ ଏଗେନ ଲେଖାଥିବାବେଳେ ସେମାନେ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କୁ ସମର୍ଥନ କରିଥିବା ଦେଖିବାକୁ ମିଳିଛି ।

ଶନିବାର ଦିନ ଦକ୍ଷିଣପନ୍ଥୀ କର୍ମୀ ଟମି ରବିନସନଙ୍କ ନେତୃତ୍ୱରେ ପ୍ରବାସ ବିରୋଧରେ ୧,୧୦,୦୦୦ ରୁ ଅଧିକ ଲୋକ କେନ୍ଦ୍ରୀୟ ଲଣ୍ଡନରେ ଏକ ଶୋଭାଯାତ୍ରା କରିଥିଲେ, ଯାହାଙ୍କ ପ୍ରକୃତ ନାମ ଷ୍ଟିଫେନ ୟାକ୍ସଲି-ଲେନନ। ୟୁନିଟ୍ ଦି କିଙ୍ଗଡମ ରାଲିରେ ଯୋଗ ଦେଇଥିବା କିଛି ଲୋକ ପୋଲିସ ସହିତ ସଂଘର୍ଷ କରିଥିଲେ। ମେଟ୍ରୋପଲିଟାନ ପୋଲିସ ଅନୁଯାୟୀ, ୨୬ ଜଣ ଅଧିକାରୀ ଆହତ ହୋଇଥିଲେ ଏବଂ ଅତି କମରେ ୨୪ ଜଣଙ୍କୁ ଗିରଫ କରାଯାଇଥିଲା।