ନ୍ୟାୟ ଦାବିରେ ବଧୂ ବେଶର ଯୁବତୀଙ୍କ ଧାରଣା: ବାପା ଓ ଭାଇଙ୍କୁ ଉଠାଇ ନେଲା ପୋଲିସ!

ବ୍ରହ୍ମପୁର: ବଧୂ ବେଶରେ ଧାରଣାରତ ଯୁବତୀଙ୍କ ବାପା ଓ ଭାଇଙ୍କୁ ଉଠାଇ ନେଇଛି ପୋଲିସ । ଝିଅର ଧାରଣା ସମୟରେ ସେଠାରେ ଉପସ୍ଥିତ ବାପା ଓ ଭାଇଙ୍କୁ ପୋଲିସ ଉଠାଇ ନେଇଛି । ପୋଲିସକୁ ଅସଦ୍ ବ୍ୟବହାର ଅଭିଯୋଗରେ ଉଠାଇ ନେଇଥିବା ସୂଚନା ।

ଗତକାଲି ଠାରୁ ବିବାହ ପରେ ପ୍ରତାରଣା କରିଥିବା ଅଭିଯୋଗରେ ବ୍ରହ୍ମପୁର ବ୍ରହ୍ମାନଗରରେ ଧାରଣାରେ ବସିଛନ୍ତି ଛତ୍ରପୁରର ଡିମ୍ପଲ । ତଥାକଥିତ ସ୍ୱାମୀ ଡାକ୍ତର ସୁମିତ ସାହୁଙ୍କ ବାରଣ୍ଡାରେ ଧାରଣା ଦେଇଛନ୍ତି । ଧାରଣାରୁ ଓହରିବା ପାଇଁ ତାଙ୍କୁ ବୁଝାସୁଝା କରିବା ସମୟରେ ସେଠାରେ ଉପସ୍ଥିତ ଡିମ୍ପଲଙ୍କ ଭାଇ ଓ ବାପା ପୋଲିସକୁ ଗାଳିଗୁଲଜ କରିଥିଲେ । ଫଳରେ ଘଟଣାସ୍ଥଳରେ ଅପ୍ରିତିକର ପରିସ୍ଥିତି ସୃଷ୍ଟି ହୋଇଥିଲା । ପରେ ପୋଲିସ ଦୁହିଁଙ୍କୁ ଉଠାଇ ନେଇଛି । ୭ ସେପ୍ଟେମ୍ବର ୨୦୨୦ରେ କୋର୍ଟରେ ବ୍ରହ୍ମପୁର ବ୍ରହ୍ମାନଗର ଅଞ୍ଚଳର ଡାକ୍ତର ସୁମିତ ସାହୁଙ୍କୁ ବିବାହ କରିଥିଲେ ଡିମ୍ପଲ । ୭ ମାସ ପତି-ପତ୍ନୀ ଭାବେ ଜୀବନ ବିତାଇବା ପରେ ଡିମ୍ପଲଙ୍କୁ ଛାଡି ନିଜ ବାପା ଓ ମା’ଙ୍କ ନିକଟକୁ ଫେରିଯାଇଥିଲେ ସୁମିତ । ବାରମ୍ବାର କହିବା ପରେ ବିବାହ ପାଇଁ ଦିନ ଧାର୍ଯ୍ୟ ହୋଇଥିଲେ ସୁଦ୍ଧା କୌଣସି ବ୍ୟବସ୍ଥା କରିନଥିଲେ ସୁମିତଙ୍କ ପରିବାର ଲୋକେ । ଏପରିକି ବଧୂ ବେଶରେ ଆସିଥିବା ଡିମ୍ପଲଙ୍କୁ ଘର ଭିତରକୁ ଯିବାକୁ ଅନୁମତି ଦେଇ ନଥିଲେ । ତେଣୁ ସ୍ୱାମୀଙ୍କ ଘର ବାରଣ୍ଡାରେ ଗତକାଲିଠାରୁ ଧାରଣା ଦେଇଛନ୍ତି ଡିମ୍ପଲ ।