ନନ୍ଦିଘୋଷ ବ୍ୟୁରୋ : ସ୍କୁଲରୁ ଲାଞ୍ଚ ନେଇ ୨ ଅଡିଟ୍ ଅଫିସର ଧରାପଡ଼ିଛନ୍ତି। ସେମାନଙ୍କୁ ଧରିଛି ଭିଜିଲାନ୍ସ। ଅଟକ ଦୁଇ ଅଧିକାରୀ ହେଉଛନ୍ତି ଭୁବନେଶ୍ୱର ଏସଟି/ଏସସି ଉନ୍ନୟନ ବିଭାଗର ପ୍ରଜ୍ଞାପ୍ରକାଶ ପାତ୍ର ଓ ପ୍ରଶାନ୍ତ ପ୍ରଧାନ । ଏମାନେ ୮ ରୁ ୧୦ ଦିନ ହେଲା ବାରିପଦାର ଏକ ହୋଟେଲରେ ରହି ଜିଲ୍ଲାର ବିଭିନ୍ନ ଆଦିବାସୀ ହଷ୍ଟେଲ ଓ ଆଶ୍ରମ ସ୍କୁଲ (ଡିଡବ୍ଲୁଓ ଅଧୀନସ୍ଥ ବିଦ୍ୟାଳୟ) ର ଅଡିଟ କରୁଥିଲେ। ତେବେ ଅଡିଟ୍ ବାବଦକୁ ସେମାନେ ବିଭିନ୍ନ ସ୍କୁଲରୁ ୫ରୁ ୧୦ ହଜାର ଟଙ୍କା ଲେଖାଏଁ ଲାଞ୍ଚ ନେଇଥିବା ଅଭିଯୋଗ ହୋଇଛି। ଆଗରୁ ସୂଚନା ପାଇ ଭିଜିଲାନ୍ସ ଟିମ୍ ଅନେକ ଦିନ ହେଲା ସେମାନଙ୍କ ଉପରେ ନଜର ରଖିଥିଲା।
ଗତକାଲି ବିଳମ୍ବିତ ରାତିରେ ଦୁଇ ଅଧିକାରୀ ନଗଦ ଟଙ୍କା ଧରି ଖସି ପଳାଇବାକୁ ଯୋଜନା କରୁଥିବା ବେଳେ ମାଡ଼ି ବସିଥିଲା ଭିଜିଲାନ୍ସ ଟିମ୍। ୫ ଲକ୍ଷ ଟଙ୍କା ଓ ଏକ ବୋଲେରୋ ଗାଡ଼ି ଜବତ କରାଯାଇଛି। ହୋଟେଲ ରୁମରୁ ବି ବହୁ ଟଙ୍କା ମିଳିଛି। ଏହା ପରେ ଭିଜିଲାନ୍ସ ଟିମ୍ ପୁରୀ ଓ ଭୁବନେଶ୍ୱରରେ ରେଡ୍ କରିଛି। ଅଫିସ୍ ସହିତ ପୈତୃକ ଘରେ ଚଢ଼ାଉ ହୋଇଛି। ଦୁଇ ଅଧିକାରୀଙ୍କୁ ଭୁବନେଶ୍ଵର ନିଆଯିବ ବୋଲି ଭିଜିଲାନ୍ସ ଏସପି ଅରୁଣ କୁମାର ନାୟକ ସୂଚନା ଦେଇଛନ୍ତି।
