କଲେଜ ଓ ବିଶ୍ବବିଦ୍ୟାଳୟର ରାଙ୍କ ପାଇଁ ଲାଞ୍ଚ କାରବାର: ଆଶଙ୍କା ଘେରରେ ଲକ୍ଷ ଲକ୍ଷ ମେଧାବୀ ଛାତ୍ରଛାତ୍ରୀଙ୍କ ଭବିଷ୍ୟତ

ନୂଆଦିଲ୍ଲୀ: କଲେଜ ଓ ବିଶ୍ୱବିଦ୍ୟାଳୟର ରାଙ୍କ ପାଇଁ ଲାଞ୍ଚ କାରବାର। ସିବିଆଇ ହାତରେ ମାମଲାର ତଦନ୍ତ। ଜେଏନୟୁ ପ୍ରଫେସର ଲାଞ୍ଚ କାରବାରର ମାଷ୍ଟର ମାଇଣ୍ଡ। ନାକ୍ ଅନୁଧ୍ୟାନ କମିଟିର ଅଧ୍ୟକ୍ଷ ମୁଖ୍ୟ କାର୍ପଟଦାର। ଷଡ଼ଯନ୍ତ୍ରରେ ସାମିଲ ହୋଇଛନ୍ତି ସମ୍ବଲପୁର ବିଶ୍ୱବିଦ୍ୟାଳୟର ପ୍ରଫେସର ବୁଲୁ ମହାରଣା। ବିଭିନ୍ନ ଜାଗାରୁ ୧୦ ଜଣଙ୍କୁ ଗିରଫ କରିଛି ସିବିଆଇ। ଆଗକୁ ଆହୁରି ବଢ଼ିପାରେ ଗିରଫଦାରୀ ସଂଖ୍ୟା। ନାକ୍ ମାନ୍ୟତାକୁ ଆଧାର କରି ୟୁଜିସି ବିଭିନ୍ନ ଅନୁଦାନ ପ୍ରଦାନ କରିଥାଏ। ନାକ ମାନ୍ୟତା ପାଇଁ ଅନୁଷ୍ଠାନର ଭିତ୍ତିଭୂମି, ପାଠପଢ଼ାର ମାନ, ଶୈକ୍ଷିକ ପରିବେଶ, ଶିକ୍ଷାର ନୂଆ ନୂଆ ଦିଗ ଭଳି ୭ଟି ପାରାମିଟରକୁ ଅନୁଧ୍ୟାନ କରାଯାଏ। ହେଲେ ନିଜ ପକେଟ ଗରମ କରି ଏସବୁ ସର୍ତ୍ତ ସହ ବୁଝାମଣା କରୁଥିଲେ ନାକ ଅନୁଧ୍ୟାନ କମିଟି। ଯେଉଁଥିରେ ସହଯୋଗର ହାତ ବଢ଼ାଇଥିଲେ ବିଭିନ୍ନ ବିଶ୍ୱବିଦ୍ୟାଳୟର ପ୍ରଫେସରମାନେ। ଏଭଳି ଖବର ପଦାକୁ ଆସିବା ପରେ ଏହାକୁ ଦୃଢ଼ ନିନ୍ଦା କରିଛନ୍ତି ଶିକ୍ଷାବିତ୍।

ଗତବର୍ଷ ଜୁଲାଇ ମାସରେ ନିଟ୍ ପ୍ରଶ୍ନ ପତ୍ର ଲିକ୍ ମାମଲା ଡ଼ାକ୍ତରୀ ପ୍ରବେଶିକା ପରୀକ୍ଷାର ସ୍ବଚ୍ଛତା ଉପରେ ପ୍ରଶ୍ନ ଉଠାଇଥିଲା। ଏବେ ନାକ୍ ମାନ୍ୟତା ପାଇଁ ଲାଞ୍ଚ କାରବାର ସମ୍ପୂର୍ଣ୍ଣ ଶିକ୍ଷା ବ୍ୟବସ୍ଥା ଆଡ଼କୁ ଅଙ୍ଗୁଳି ଉଠାଇଛି। ଶିକ୍ଷାର ବ୍ୟାପକ ଘରୋଇକରଣ ବ୍ୟବସ୍ଥା ଭିତରେ ମାଫିଆଙ୍କ ଦବଦବା ଏବଂ ଅସାଧୁ ପ୍ରଫେସରଙ୍କ ଲାଞ୍ଚ ଖୋର ମନୋବୃତ୍ତି ଯୋଗୁଁ ଲକ୍ଷ ଲକ୍ଷ ମେଧାବୀ ଛାତ୍ରଛାତ୍ରୀଙ୍କ ଭବିଷ୍ୟତ ଆଶଙ୍କା ଘେରକୁ ଠେଲି ହୋଇଯାଇଛି। ଶିକ୍ଷା ବ୍ୟବସ୍ଥାରେ ଲାଞ୍ଚ କାରବାରକୁ ସହଜରେ ଗ୍ରହଣ କରିପାରୁନାହାନ୍ତି ଶିକ୍ଷାବିତ୍। ସିବିଆଇ ମାମଲା ରୁଜୁ କରି ତଦନ୍ତ କରୁଥିବା ବେଳେ ଦୋଷୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି।

ଆନ୍ଧ୍ରପ୍ରଦେଶ ଗୁଣ୍ଟୁରରେ ଥିବା ଏକ ଘରୋଇ ବିଶ୍ବବିଦ୍ୟାଳୟ KLEFକୁ ଭଲ ମାନ୍ୟତା ଦେବା ପାଇଁ କୋଟିଏ ୮୦ ଲକ୍ଷ ଟଙ୍କାର ଲାଞ୍ଚ ମାଗିଥିଲେ ନାକ ଅନୁଧ୍ୟାନ କମିଟି। ଏଥିରେ ଜେଏନୟୁର ଜଣେ ପ୍ରଫେସର ମଧ୍ୟସ୍ଥତା କରିବା ପରେ ପ୍ରତି ଟମ୍ ସଦସ୍ୟଙ୍କୁ ଗୋଟିଏ ଲେଖାଏଁ ଲାପଟପ୍ ସହ ୩ ଲକ୍ଷ ଟଙ୍କା, କମିଟି ଅଧ୍ୟକ୍ଷଙ୍କୁ ୧୦ ଲକ୍ଷ ଟଙ୍କା ଏବଂ କମିଟିର ଜଣେ ସଦସ୍ୟଙ୍କ ପତ୍ନୀଙ୍କ ପାଇଁ ଫ୍ଲାଇଟ୍ ଟିକେଟ ଓ ସୁବିଧା ସାଙ୍ଗକୁ ଆଇଫୋନ୍ ଦିଆଯାଇଥିବା ଅଭିଯୋଗ ହୋଇଥିଲା। ଘଟଣା ଜଣାପଡିବା ପରେ ସିବିଆଇ ୧୦ ଜଣଙ୍କୁ ଗିରଫ କରିଛି।