ଡ୍ୟାନ୍ସ କ୍ଳାସରେ ନୁହେଁ, ଛପର ଘରେ ପ୍ରାକ୍ଟିସ ! କୁନି ଡ୍ୟାନ୍ସର ଏବେ ମାଛ ବ୍ୟବସାୟୀ…
ଭୁବନେଶ୍ୱର: ଡ୍ୟାନ୍ସ କ୍ଳାସରେ ନୁହେଁ, ଛପର ଘରେ ଚାଲିଛି ଡ୍ୟାନ୍ସ ପ୍ରାକ୍ଟିସ । କୌଣସି ରିଆଲିଟି ସୋ ନୁହେଁ, ମାଛ ବିକିବା ସହ ଡ୍ୟାନ୍ସ କରୁଛନ୍ତି ରାଜଧାନୀର ବସ୍ତି ବାଳକ ଓମ୍ । ଅର୍ଥ ଅଭାବ ତାଙ୍କ ପ୍ରତିଭାକୁ ଅଟକାଇବାରେ ହୋଇଛି ଅସଫଳ । କିନ୍ତୁ ମନର ଉତ୍ସାହ ତାଙ୍କୁ ଡାନ୍ସ କରିବାକୁ ଦିଏ ସାହସ ।
ସବୁଥିରେ ପାରଙ୍ଗମ ଓମ୍ । ଭୁବନେଶ୍ୱରର ନୟାପଲ୍ଲୀର ଓମ୍ ନବମ ଶ୍ରେଣୀରେ ପାଠ ପଢନ୍ତି । ବଲିଉଡ, ହିପ୍ହପ୍, ସଲ୍ସା ହେଉ ଅବା କଣ୍ଟେମ୍ପରାରୀ ସବୁ ଡ୍ୟାନ୍ସ ଷ୍ଟାଇଲରେ ମାହିର ଓମ୍ । ପିଲାଟି ଦିନରୁ ଟିଭି ଦେଖି ନାଚ ସିଖୁଥିବା ଓମ୍ ଆଗକୁ ଡ୍ୟାନ୍ସରେ ହିଁ କ୍ୟାରିୟର କରିବାକୁ ଚାହୁଁଛନ୍ତି । ବର୍ତ୍ତମାନ ଭୁବନେଶ୍ୱରରେ ଜଣେ ଡ୍ୟାନ୍ସ ଗୁରୁଙ୍କ ପାଖରେ ନାଚ ମଧ୍ୟ ଶିଖୁଛନ୍ତି । ହେଲେ ନାଚରେ ସମ୍ପୁର୍ଣ ଦକ୍ଷ ହେବା ପାଇଁ ତାଙ୍କୁ ଦରକାର ଆହୁରି ଶିକ୍ଷା । କିନ୍ତୁ ଏସବୁ ଭିତରେ ଅର୍ଥ ସାଜୁଛି ବଡ଼ ବାଧକ ।
କାରଣ ଓମଙ୍କ ବାପା ଜଣେ ମାଛ ବ୍ୟବସାୟୀ । ଭୁବନେଶ୍ୱର ୟୁନିଟ ୮ ରାସ୍ତା କଡରେ ଓମଙ୍କ ବାପା ମାଛ ବିକ୍ରି କରନ୍ତି । ଆଉ ଏବେ ଲକଡାନରରେ ଓମ୍ ବି ବାପାଙ୍କ ସହ ମିଶି କରୁଛନ୍ତି ମାଛ ବେପାର । କାରଣ ଲକଡାଉନରେ ସବୁ ବେପାର ଠପ୍ ହୋଇ ପଡିଥିବା ବେଳେ କେମିତି ଘରକୁ ଭଲ ଦୁଇ ପଇସା ଆସିବ ସେ ଚିନ୍ତାରେ ଓମ୍ ବି ଡ୍ୟାନ୍ସରରୁ ପାଲଟି ଯାଇଛନ୍ତି ମାଛ ବ୍ୟବସାୟୀ ।
ଆଗକୁ ଏ ବସ୍ତି ବଏ ସ୍ୱପ୍ନ ନଗରୀ ମୁମ୍ବାଇରେ ରହି ନାଚ ଶିଖିବାକୁ ଆଶା ବାନ୍ଧିଛନ୍ତି । ଯଦି କୌଣସି ପ୍ରକାରରେ କାହାର ସାହାଯ୍ୟ ମିଳେ ନିଜର ଡ୍ୟାନ୍ସକୁ ଜାତୀୟ ସ୍ଥରରେ ପ୍ରଦର୍ଶିତ କରିବାକୁ ଆଶା ମଧ୍ୟ ରଖିଛନ୍ତି ଓମ୍ ।
(ଶତରୂପା ସାମନ୍ତରାୟ)
