ଭାରତ ଗସ୍ତରେ ଆସିବେ ବ୍ରିଟେନ୍ ପ୍ରଧାନମନ୍ତ୍ରୀ ବୋରିସ୍ ଜନସନ

ଲଣ୍ଡନ: ଆସନ୍ତା ଏପ୍ରିଲ୍ ମାସ ଶେଷ ବେଳକୁ ବ୍ରିଟେନ ପ୍ରଧାନମନ୍ତ୍ରୀ ବୋରିସ୍ ଜନସନ ଭାରତ ଗସ୍ତରେ ଆସିବେ। ୟୁରୋପିଆନ ୟୁନିୟନରୁ ଅଲଗା ହେବା ପରେ ବ୍ରିଟେନ ପ୍ରଧାନମନ୍ତ୍ରୀଙ୍କର ଏହା ସବୁଠୁ ବଡ଼ ଆନ୍ତର୍ଜାତୀକ ଗସ୍ତ ବୋଲି ତାଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି। ବୋରିସଙ୍କ ଏହି ଗସ୍ତ ଦୁଇ ଦେଶ ମଧ୍ୟରେ ସମ୍ପର୍କ ସୁଦୃଢ଼ କରିବ ବୋଲି ଆଶା କରାଯାଉଛି ।

ଚଳିତ ବର୍ଷ ଜାନୁଆରୀ ମାସ ତଥା ୭୨ତମ ଗଣତନ୍ତ୍ର ଦିବସ ଅବସରରେ ବୋରିସ ଜନସନଙ୍କର ଭାରତ ଗସ୍ତ କରିବା କାର୍ଯ୍ୟକ୍ରମ ରହିଥିଲା । ଏହି ସମୟରେ ସେ ମୁଖ୍ୟ ଅତିଥି ଭାବେ ଯୋଗ ଦେଇଥାନ୍ତେ । ମାତ୍ର ବ୍ରିଟେନରେ କରୋନାର ନୂଆ ଲହର ଯୋଗୁ ଏହି ଗସ୍ତ ବାତିଲ ହୋଇଯାଇଥିଲା। ଏବେ ପ୍ରାୟ ୩ ମାସ ପରେ ସେ ଭାରତ ଗସ୍ତରେ ଆସିବାକୁ ଯାଉଛନ୍ତି ।

ସେ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ଆଲୋଚନା ବେଳେ ବୋରିସ୍ କହିଥିଲେ ଯେ, ବ୍ରିଟେନରେ ଯେଉଁ ଗତିରେ କରୋନା ସଂକ୍ରମଣ ବ୍ୟାପୁଛି ସେଭଳି ସ୍ଥିତିରେ ତାଙ୍କର ବ୍ରିଟେନରେ ରହିବା ଅତ୍ୟନ୍ତ ଜରୁରୀ । ଯାହା ଫଳରେ ସେ କରୋନା ଭାଇରସର ଘରୋଇ ପ୍ରତିକ୍ରିୟା ଉପରେ ଧ୍ୟାନ କେନ୍ଦ୍ରିତ କରିପାରିବେ ।

Leave a Reply