୭.୨ କୋଟି ଭ୍ୟୁ ପାଇଁ ଖର୍ଚ୍ଚ କରିଥିଲେ ୭୨ ଲକ୍ଷ ଟଙ୍କା, ଯାଞ୍ଚ ପରେ ସ୍ୱୀକାର କଲେ ରାପର ବାଦଶାହ

ମୁମ୍ବାଇ: ବିଗତ କିଛି ଦିନ ହେବ ମୁମ୍ବାଇ ପୋଲିସ ସୋସିଆଲ ମିଡିଆରେ ଫେକ୍ ଫଲୋଅର୍ସ ଏବଂ ଟଙ୍କା ଦେଇ ଲାଇକ୍ସ କିଣୁଥିବା ମାମଲା ଉପରେ ଯାଞ୍ଚ ଆରମ୍ଭ କରିଛି । ଏହି ମାମଲାରେ ରାପର ଆଦିତ୍ୟ ପ୍ରତୀକ ସିଂହ ସିସୋଦିଆ ଉର୍ଫ ବାଦଶାହଙ୍କୁ ପଚରାଉଚରା କରୁଛି ମୁମ୍ବାଇ ପୋଲିସ । ଏବେ ବାଦଶାହ ସ୍ୱୀକାର କରିଛନ୍ତି ଯେ, ସେ ସୋସିଆଲ ମିଡିଆରେ ଭ୍ୟୁ ଏବଂ ଲାଇକ୍ସ ବଢ଼ାଇବା ପାଇଁ ୭୨ ଲକ୍ଷ ଟଙ୍କା ଖର୍ଚ୍ଚ କରିଥିଲେ । ଏହି ମାମଲାରେ ଏଯାବତ ବାଦଶାହାଙ୍କ ତରଫରୁ କୌଣସି ପ୍ରତିକ୍ରିୟା ମିଳିପାରିନାହିଁ ।

ମୁମ୍ବାଇ ପୋଲିସର କ୍ରାଇମ ଇଣ୍ଟେଲିଜେନ୍ସ ୟୁନିଟର ଅଧିକାରୀ କହିଛନ୍ତି ଯେ, ବାଦଶାହ ସୋସିଆଲ ମିଡିଆରେ ୭.୨ ମିଲିୟନ ଭ୍ୟୁ କିଣିବା ପାଇଁ ୭୨ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି । ବାଦଶାହଙ୍କ ପ୍ରସିଦ୍ଧ ଗୀତ ପାଗଲ ହେ… ଗୀତକୁ ବିଶ୍ୱ ରେକର୍ଡରେ ଅନ୍ତର୍ଭୁକ୍ତ କରିବା ପାଇଁ ଏହି ଭ୍ୟୁ କିଣାଯାଇଥିଲା । ଗତ ବର୍ଷ ମଧ୍ୟ ବାଦଶାହ ଦାବି କରିଥିଲେ ଯେ ତାଙ୍କ ଗୀତ ୨୪ ଘଣ୍ଟା ମଧ୍ୟରେ ୭୫ ମିଲିୟନ ଭ୍ୟୁ ହୋଇଥିଲା ବୋଲି ।ତେବେ ଗୁଗୁଲ ଏବଂ ୟୁଟ୍ୟୁବର ମାଲିକାନା କମ୍ପାନୀ ଆଲଫାବେଟ୍ ଦ୍ୱାରା ତାଙ୍କର ଏହି ଦାବିକୁ ପ୍ରତ୍ୟାଖ୍ୟାନ କରାଯାଇଥିଲା ।

ପୋଲିସ ଅଧିକାରୀ କହିଛନ୍ତି ଯେ, ବାଦଶାହାଙ୍କ ଏହି ଗୀତ ବ୍ୟତୀତ ସୋସିଆଲ ମିଡିଆରେ ସେୟାର କରାଯାଇଥିବା ଅନ୍ୟ ଗୀତ ଗୁଡ଼ିକର ମଧ୍ୟ ଯାଞ୍ଚ କରାଯିବ । ଜଣାଇ ରଖୁଛୁ ଯେ, ଜୁଲାଇ ୧୫ ତାରିଖରେ ଇଣ୍ଟରନ୍ୟାସନାଲ ରାକେଟ କଥା ସାମ୍ନାକୁ ଆସିଥିଲା ଯିଏ ଟଙ୍କା ଦେଇ ସୋସିଆଲ ମିଡିଆରେ ଭ୍ୟୁ, ଫଲୋଅର୍ସ ଏବଂ ଲାଇକ୍ସ ବିକ୍ରି କରୁଥିଲା । ଏହି ମାମଲା ସେତେବେଳେ ସାମାନକୁ ଆସିଲା ଯେତେବେଳେ ଗାୟିକା ଭୂମି ତ୍ରୀବେଦୀ ଅଭିଯୋଗ କରିଥିଲେ ଯେ କେହି ଜଣେ ତାଙ୍କ ନାମରେ ଏକ ଫେକ୍ ଇନଷ୍ଟାଗ୍ରାମ ଆକାଉଣ୍ଟ କରି ତାର ଅପବ୍ୟବହାର କରୁଛି ।