ରେଖାଙ୍କୁ ନିଜ ଝିଅ ବୋଲି ଅସ୍ୱୀକାର କରିଥିଲେ ବାପା, ଘର ଚଳେଇବାକୁ ଅଭିନୟ କରିବାକୁ ବାଧ୍ୟ ହୋଇଥିଲେ…

ମୁମ୍ବାଇ: ୬୬ ବର୍ଷରେ ପାଦ ଦେଲେ ବଲିଉଡର ଏଭର-ଗ୍ରୀନ୍ ଅଭିନେତ୍ରୀ ରେଖା । ୧୮୦ ରୁ ଅଧିକ ଚଳଚ୍ଚିତ୍ରରେ ଅଭିନୟ କରିଥିବା ଏହି ଅଭିନେତ୍ରୀଙ୍କ ଜୀବନ ଯାତ୍ରା ଏତେ ସହଜ ନଥିଲା । ରେଖା ୧୯୬୬ ମସିହାରେ ତେଲୁଗୁ ଚଳଚ୍ଚିତ୍ର ରଙ୍ଗୁଲା ରତ୍ନମରେ ଶିଶୁ ଅଭିନେତ୍ରୀ ଭାବରେ ଡେବ୍ୟୁ କରିଥିଲେ । ମୁଖ୍ୟ ଅଭିନେତ୍ରୀ ଭାବେ ତାଙ୍କର ପ୍ରଥମ ଚଳଚ୍ଚିତ୍ର ଥିଲା ସାୱାନ୍ ଭଦୋ (୧୯୭୦) । କ୍ୟାରିୟରର ପ୍ରଥମ କିଛି ବର୍ଷ ପାଇଁ ରେଖା ତାଙ୍କ ଲୁକ୍ ପାଇଁ ସମାଲୋଚିତ ହୋଇଥିଲେ ।

ଏକ ସାକ୍ଷାତକାର ସମୟରେ ରେଖା କହିଛନ୍ତି ଯେ, ତାଙ୍କ ଦେହର ରଙ୍ଗ ଏବଂ ଦକ୍ଷିଣ ଭାରତୀୟ ଅନ୍ଦାଜ ପାଇଁ ତାଙ୍କୁ ବଲିଉଡରେ ଅସୁନ୍ଦରୀ ଭାବେ ସମାଲୋଚନା କରାଯାଉଥିଲା । ଯଦିଓ, ସେ ନିଜ ବିଷୟରେ ଲୋକଙ୍କ ଧାରଣାକୁ ପରିବର୍ତ୍ତନ କରିବାରେ ସଫଳ ହୋଇଥିଲେ । ସେ ନିଜ ଅଭିନୟକୁ ଦୃଢ କରିବାକୁ ଯାଇ ଚଳଚ୍ଚିତ୍ରଗୁଡ଼ିକୁ ସାବଧାନତାର ସହିତ ବାଛିବା ଆରମ୍ଭ କରିଥିଲେ । ଦୋ ଅଞ୍ଜାନେ (୧୯୭୬) ତାଙ୍କର ପ୍ରଥମ ଷ୍ଟାଇଲିଷ୍ଟ ଚଳଚ୍ଚିତ୍ର ଥିଲା ଏବଂ ତାଙ୍କର ଏହି ନୂଆ ଅବତାରକୁ ତାଙ୍କ ପ୍ରଶଂସକମାନେ ଖୁବ୍ ପସନ୍ଦ ମଧ୍ୟ କରିଥିଲେ  ।

ରେଖା ତେଲୁଗୁ ଅଭିନେତ୍ରୀ ପୁଷ୍ପାବଲୀ ଏବଂ ତାମିଲ ଅଭିନେତା ଜେମିନୀ ଗଣେଶନଙ୍କ ଝିଅ। ତାଙ୍କ ବାପାମାଆ ବିବାହ ହୋଇ ନଥିଲା ଏବଂ ବାପା ମଧ୍ୟ ରେଖାଙ୍କୁ ପିଲାଦିନେ ତାଙ୍କ ସନ୍ତାନ ବୋଲି ଭାବି ନଥିଲେ। ରେଖା କିନ୍ତୁ କେବ ଅଭିନେତ୍ରୀ ହେବାର ସ୍ୱପ୍ନ ଦେଖି ନଥିଲେ । ତେବେ ପରିବାରର ଆର୍ଥିକ ଅବସ୍ଥା ହେତୁ ରେଖାଙ୍କୁ ସ୍କୁଲ ଛାଡି ଚଳଚ୍ଚିତ୍ରରେ କାମ କରିବାକୁ ପଡିଥିଲା।

ରେଖା ୧୯୭୮ ରେ ମୁକ୍ତିଲାଭ କରିଥିବା ଚଳଚ୍ଚିତ୍ରରେ ଏକ ଦୁଷ୍କର୍ମ ପୀଡ଼ିତାଙ୍କ ଚରିତ୍ରରେ ନଜର ଆସିଥିଲେ । ଯାହା ତାଙ୍କ କ୍ୟାରିୟରରେ ଏକ ଟର୍ଣ୍ଣିଂ ପଏଣ୍ଟ ଥିଲା । ଏହି ଚଳଚ୍ଚିତ୍ରରେ ଜଣେ ଦୁଷ୍କର୍ମ ପୀଡିତାଙ୍କ ସଂଘର୍ଷକୁ ଦେଖାଇଛନ୍ତି । ସେ ଏହି ଚଳଚ୍ଚିତ୍ର ପାଇଁ ତାଙ୍କର ପ୍ରଥମ ଫିଲ୍ମ ଫେୟାର ଶ୍ରେଷ୍ଠ ଅଭିନେତ୍ରୀ ପୁରଷ୍କାର ହାତେଇ ଥିଲେ । ରେଖା ଏବଂ ଅମିତାଭ ବଚ୍ଚନ ଅନେକ ଚଳଚ୍ଚିତ୍ରରେ ଏକାଠି ଅଭିନୟ କରିଛନ୍ତି । ଉଭୟଙ୍କର ଅନସ୍କ୍ରିନ୍ କେମେଷ୍ଟ୍ରି ସବୁବେଳେ ଚର୍ଚ୍ଚା ସାଉଁଟିଛି । ଜଣେ ବିବାହିତ ପୁରୁଷଙ୍କ ସହ ସମ୍ପର୍କ ଥିବାରୁ ରେଖାଙ୍କୁ ଅନେକ ସମାଲୋଚନା ମଧ୍ୟ କରାଯାଇଥିଲା। ରେଖା ୧୯୭୮ରେ ଅମିତାଭ ବଚ୍ଚନଙ୍କ ସହ ମୁକଦ୍ଦର କା ସିକନ୍ଦର ଫିଲ୍ମରେ ପୁଣି ଥରେ ନଜର ଆସିଥିଲେ। ଚଳଚ୍ଚିତ୍ରଟି ସେହି ଦଶନ୍ଧିର ସବୁଠାରୁ ବଡ ହିଟ୍ ହୋଇଥିଲା ଏବଂ ସେ ଅଭିନେତ୍ରୀମାନଙ୍କ ମଧ୍ୟରେ ଏକ ନମ୍ବର ହୋଇଥିଲେ ।