ମୁମ୍ବାଇ କ୍ଲବରେ ରେଡ୍, ପାର୍ଟି କରି ଗିରଫ ହେଲେ ସୁରେଶ ରୈନା

ମୁମ୍ବାଇ:  ଦୀର୍ଘଦିନର ଲକଡାଉନ ପାଇଁ ମାୟାନଗରୀ ବଲିଉଡର କୌଣସି ଫିଲ୍ମ ରିଲିଜ ହୋଇପାରୁ ନାହିଁ । ଆଉ ଏହି ମଧ୍ୟରେ ରିଲିଜ ହେଉଛି ଗୋଟିଏ ପରେ ଗୋଟିଏ ଓ୍ୱେବସାଇଟ । ଆଜି କିନ୍ତୁ ଆମେ ଆପଣଙ୍କୁ କୌଣସି ଫିଲ୍ମର ସ୍କ୍ରିନିଂ ବା ଓ୍ୱେବସିରିଜ ରିଲିଜ ବିଷୟରେ କହୁନାହୁଁ । ଘଟଣା ହେଉଛି ଟିକେ ହଟକେ । ଯେଉଁ ଘଟଣାରେ ସାମିଲ ଅଛନ୍ତି ନାମିଦାମୀ ସେଲିବ୍ରିଟି । ଆଜ୍ଞା ହଁ ଗତକାଲି ସୋମବାରକୁ ଏକ ନାମି କ୍ଲବରେ ରେଡ୍‌ କରିଛି ମୁମ୍ବାଇ ପୋଲିସ୍‌। ଯେଉଁଠାରେ କେତେକ ହାଇ ପ୍ରୋଫାଇଲ ସେଲିବ୍ରିଟୀଙ୍କୁ ଅଟକ ରଖାଯାଇଛି । ଏଥିରେ ସାମିଲ ଅଛନ୍ତି ଉଭୟ କଳାକାର ଏବଂ କ୍ରିକେଟର । ତେବେ କୋଭିଡ ୧୯ ନିୟମ ଭାଙ୍ଗିଥିବାରୁ ପୋଲିସ ଏଭଳି ପଦକ୍ଷେପ ନେଇଛି ।

ରାତି ପ୍ରାୟ ୩ଟାରେ ଅନ୍ଧେରୀର ଏକ ବଡ଼ କ୍ଲବ ଡ୍ରାଗନ ଫ୍ଲାଇରେ ରେଡ଼୍ ‌କରିଛି  ମୁମ୍ବାଇ ପୋଲିସ୍‌। ରିପୋର୍ଟ କହୁଛି ଧୁମଧାମରେ ପାର୍ଟି ଚାଲୁଥିଲା । ଗୁରୁ ରାନ୍ଧଓ୍ୱା, ସୁରେଶ ରୈନା, ସୁଜୈନ ଖାନ୍‌ଏବଂ ର୍ୟାପର ବାଦଶାହ ଆଦି ସେଲିବ୍ରିଟି ଏହି ପାର୍ଟିରେ ସାମିଲ ଥିଲେ । କିନ୍ତୁ ଆଶ୍ଚର୍ଯ୍ୟକର କଥା ହେଉଛି ସୁରେଶ ରୈନା କ୍ଲବର ପଛ ଦ୍ୱାର ଦେଇ ଲୁଚି ଚାଲିଗଲେ ।

ମୁମ୍ବାଇ ପୋଲିସ୍‌ ନାମିଦାମି ସେଲିବ୍ରିଟିଙ୍କ ସହ ୩୪ ଜଣଙ୍କୁ ଅଟକ ରଖିଥିଲା । । ପୋଲିସର ରିପୋର୍ଟ କହୁଛି ୧୯ ଜଣ ଦିଲ୍ଲୀ ଏବଂ ପଞ୍ଜାବରୁ ଆସିଥିଲେ । ପାର୍ଟିରେ ଦିଲ୍ଲୀ ଏବଂ ପଞ୍ଜାବ ବ୍ୟତୀତ ସାଉଥ ମୁମ୍ବାଇରୁ ମଧ୍ୟ ଲୋକ ଆସିଥିଲେ । ପୋଲିସ ୨୭ ଜଣ ଗ୍ରାହକଙ୍କ ସମେତ ୭ ଜଣ କର୍ମଚାରୀଙ୍କ ବିରୋଧରେ IPCର ଧାରା ୧୮୮ ଏବଂ ୨୬୯ ଅନୁସାରେ ମହାମାରୀ ଆକ୍ଟ ଦ୍ୱାରା ମାମଲା ରୁଜୁ ହୋଇଛି । ସୁରେଶ ରୈନାଙ୍କ ବିରୁଦ୍ଧରେ ମଧ୍ୟ ଧାରା ୧୮୮ ଅନୁସାରେ ମାମଲା ରୁଜୁ ହୋଇଥିବା କହିଛି ମୁମ୍ବାଇ ପୋଲିସ । ଅବଶ୍ୟ ହେପାଜତକୁ ନିଆଯାଇଥିବା ଲୋକଙ୍କୁ ନୋଟିସ ଦେଇ ଛାଡ଼ି ଦିଆଯାଇଛି ।