ମମିତା ହତ୍ୟା ମାମଲାକୁ ନେଇ ବିଜେପିର ବନ୍ଦ ପଲିଟିକ୍ସ
ଭୁବନେଶ୍ବର: ମମିତା ହତ୍ୟା ମାମଲାରୁ ମାଇଲେଜ୍ ପଲିଟିକ୍ସ । ସମ୍ବେଦନଶୀଳ ଘଟଣା ଆଞ୍ଚରେ ରାଜନୀତିର ରୁଟି ସେକୁଛି ବିଜେପି । ନୟାଗଡ଼ ପରୀ ହେଉ କି ଧର୍ମଶାଳା ସ୍ମିତାରାଣୀ ମୃତ୍ୟୁ ମାମଲା । ଅପରାଧକୁ ଅସ୍ତ୍ର କରି ରାଜନୈତିକ ମାଇଲେଜ୍ ପାଇଁ ରଣନୀତି ବିଜେପିର ପୁରୁଣା ଅଭ୍ୟାସ । ଏଥର ବି ମମିତା ମାମଲାରେ କରୁଛି ପଲିଟିକାଲ୍ ଷ୍ଟଣ୍ଟ । ଦୁଇ ଦିନରେ ଦୁଇଟି ଜିଲ୍ଲାରେ ଚକ, ଅଖ ଜାମ୍ କରିଛି ବିଜେପି। ଫଳରେ କରୋନା କମିବା ପରେ ଟ୍ରାକ୍କୁ ଫେରୁଥିବା ଜୀବନ ଜୀବିକା ବାଧାପ୍ରାପ୍ତ ହୋଇଛି । ଗେରୁଆ ଦଳର ଏଭଳି ହୀନ ରାଜନୀତିକୁ ନାପସନ୍ଦ କରିଛନ୍ତି ସାଧାରଣ ଲୋକେ ।
ବିଜେପିର ବନ୍ଦ ପଲିଟିକ୍ସ । କାଲି କଳାହାଣ୍ଡି, ଆଜି ବଲାଙ୍ଗିର । କଥା କଥାରେ ବନ୍ଦ, ଚକାଜାମ୍ । ବଡ଼ ଅପରାଧକୁ ନେଇ ହୀନ ରାଜନୀତି । ଧର୍ମଶାଳା ସ୍ମିତାରାଣୀ, ନୟାଗଡ଼ ପରୀ ଆଉ ଏବେ ମମିତା ମେହେର । ସମ୍ବେଦନଶୀଳ ଘଟଣାକୁ ରାଜନୈତିକ ରଙ୍ଗ ଦେଉଛି ବିଜେପି । ନା ତଥ୍ୟ ନା ପ୍ରମାଣ, ନା ଅଭିଯୋଗ ନା ଲିଙ୍କ, ନିଜେ ଅନୁସନ୍ଧାନକାରୀ ନିଜେ ବିଚାରପତି ସାଜୁଛନ୍ତି ଗେରୁଆ ନେତା । ପାର୍ଟି ଅଫିସ୍ରେ କୋର୍ଟ ବସାଇ ରାଜନୈତିକ ସ୍ବାର୍ଥ ପାଇଁ ମନ୍ତ୍ରୀ, ବିଧାୟକଙ୍କୁ କାଠଗଡ଼ାକୁ ଟାଣୁଛନ୍ତି । ପ୍ରଶ୍ନ ଉଠୁଛି, ପୋଲିସ ତଦନ୍ତ ଓ ନ୍ୟାୟିକ ପ୍ରକ୍ରିୟାରେ ଭରସା ନରଖି କାହିଁକି କୁମ୍ଭୀର କାନ୍ଦଣା କାନ୍ଦୁଛି ବିଜେପି ? ଲଖିମପୁର ଖେରି ହିଂସା ମାମଲାରେ ଦଳ କାହିଁକି ଚୁପ୍ ଥିଲା ବୋଲି ପ୍ରଶ୍ନ କରିଛି ବିଜେଡି ।
ମମିତା ହତ୍ୟା ମାମଲା ତଦନ୍ତରେ ଅଭିଯୋଗକାରୀ ସନ୍ତୁଷ୍ଟ । ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁ ଗିରଫ ଓ ପୋଲିସର କାର୍ଯ୍ୟାନୁଷ୍ଠାନରେ ମମିତାଙ୍କ ପରିବାର ସନ୍ତୋଷ ପ୍ରକାଶ କରିଛନ୍ତି। ମାମଲାରେ ଅଧିକ ପ୍ରମାଣ ଯୋଗାଡ଼ କରୁଛି ପୋଲିସ । ହେଲେ ପ୍ରଶ୍ନ ଉଠୁଛି, କାହିଁକି ବନ୍ଦ ନାଁରେ ମିଛ ପ୍ରହସନ କରୁଛି ବିଜେପି ।
ବନ୍ଦ ଡାକରା ନାଁରେ ବିଜେପିର ହୀନ ରାଜନୀତିକୁ ସମାଲୋଚନା କରିଥିବା କହିଛନ୍ତି କଂଗ୍ରେସ ନେତା ଦିଲ୍ଲୀପ ବେହେରା । ସେପଟେ କରୋନା କମିବା ପରେ ଟ୍ରାକ୍କୁ ଫେରୁଛି ଜୀବନ ଜୀବିକା । ଲକ୍ଡାଉନ୍, ସଟ୍ଡାଉନ୍ରେ ପ୍ରବଳ କ୍ଷତି ସହିଥିଲେ । ମହାମାରୀ ମାଡ଼ ପରେ ଅଣ୍ଟା ସଳଖୁଛନ୍ତି ବ୍ୟବସାୟୀ । ହେଲେ ଏମିତି ସମୟରେ ବିଜେପିର ବନ୍ଦ ଡାକରା ଦାଉ ସାଧୁଛି । ଏଥିରେ ଅସନ୍ତୋଷ ପ୍ରକାଶ କରିଛନ୍ତି ବ୍ୟବସାୟୀ ।
