କଳାହାଣ୍ଡି ବିଜେପିରେ ଫାଟ, ଦଳ ପରିବର୍ତ୍ତନ ପାଇଁ କର୍ମୀଙ୍କ ଧମକ

ଧର୍ମଗଡ଼: ଆଗକୁ ତ୍ରିସ୍ତରୀୟ ପଞ୍ଚାୟତ ନିର୍ବାଚନ । ହେଲେ ନିର୍ବାଚନ ଆଗରୁ କଳାହାଣ୍ଡି ବିଜେପିରେ ଫାଟ । ଆଗାମୀ ଜିଲ୍ଲା ପରିଷଦ ପଦ ପାଇଁ ପ୍ରାର୍ଥୀ ଚୟନକୁ ନେଇ ଦେଖା ଦେଇଛି ମତଭେଦ । ପ୍ରାର୍ଥୀ ଚୟନରେ ଓବିସିକୁ ଅଣଦେଖା ନେଇ ଦଳ ପରିବର୍ତ୍ତନ ଧମକ ଦେଇଛନ୍ତି କର୍ମୀ ।

କଳାହାଣ୍ଡିରେ ମଉଳିଛି ପଦ୍ମ । ଶଙ୍ଖମୁହାଁ ବିଜେପି କର୍ମୀ । ଧର୍ମଗଡ଼ ନିର୍ବାଚନ ମଣ୍ଡଳୀ ପର୍ଲା ଜିଲ୍ଲା ପରିଷଦ ଜୋନ-୨ରେ ବିଜେପିରେ ଦେଖିବାକୁ ମିଳିଛି କର୍ମୀ ଅସନ୍ତୋଷ । ପର୍ଲା, ବଡ଼ ଘୁମର, ଗଡିଆଯୋର, କଦଳୀମୁଣ୍ଡା ଭଳି ନଅ ଗୋଟି ଗ୍ରାମ ପଞ୍ଚାୟତକୁ ନେଇ ଗଠିତ ଜିଲ୍ଲା ପରିଷଦ ଜୋନ-୨ । ଏହି ଜୋନରେ ଓବିସି ଭୋଟରଙ୍କ ସଂଖ୍ୟା ଗରିଷ୍ଠତା ରହିଛି । ହେଲେ ଚଳିତ ବର୍ଷ ଏହି ଆସନ ଅଣସଂରକ୍ଷିତ ହୋଇଛି । ଏହି ଓବିସି ସଂଖ୍ୟା ଗରିଷ୍ଠତାର ମତ ନନେଇ ବିଜେପି ଠିକ୍ କରିଛି ପ୍ରାର୍ଥୀ । ଯାହାକୁ ନେଇ ଏବେ ଦେଖିବାକୁ ମିଳିଛି ଗୋଷ୍ଠୀ କନ୍ଦଳ । ବହୁ ପଦପଦବୀରେ ଥିବା ଓବିସି କର୍ମୀ ଏବେ ଦଳ ପରିବର୍ତ୍ତନ କରି ବିଜେଡିରେ ମିଶିବାକୁ ଚେତାବନୀ ଦେଇଛନ୍ତି ।

ଧର୍ମଗଡ଼, କୋକସରା, କଲମପୁର ଓ ଜୟପାଟଣା ବ୍ଲକର ୨ଟି ପଞ୍ଚାୟତକୁ ନେଇ ଗଠିତ ହୋଇଛି ଧର୍ମଗଡ଼ ନିର୍ବାଚନ ମଣ୍ଡଳୀ । ଗତ ପଞ୍ଚାୟତ ନିର୍ବାଚନରେ ୮ ଗୋଟି ଜିଲ୍ଲା ପରିଷଦ ପଦ କେବଳ ବିଜେପି ହାତେଇଥିଲା । ଏଥିରୁ ୬ ଜଣ ଓବିସି ବର୍ଗ ଓ ଜଣେ ସାଧାରଣ ଓ ଜଣେ ଅନୁସୂଚିତ ଜନଜାତି ବର୍ଗର ପାର୍ଥୀ ବିଜୟ ଲାଭ କରିଥିଲେ । ଚଳିତବର୍ଷ କିନ୍ତୁ ଓବିସିଙ୍କ ମତ ନନେଇ ବିଜେପି ଏକତରଫା ରଣନୀତି ପ୍ରସ୍ତୁତ କରିବାକୁ ନେଇ କର୍ମୀ ଅସନ୍ତୋଷ ଦେଖିବାକୁ ମିଳିଛି ।