କଂଗ୍ରେସର ସ୍ବରକୁ ଚପାଇବା ସହ ଦମନ କରିବାକୁ ବିଜେପି କରୁଛି ହୀନ ଚକ୍ରାନ୍ତ: ପିସିସି ସଭାପତି

ଭୁବନେଶ୍ବର: ଅସାଧୁ ଉପାୟରେ କଂଗ୍ରେସର ସ୍ବରକୁ ଚପାଇ ଦେବାକୁ ହେଉଛି ଉଦ୍ୟମ । ନାରୀ ନିର୍ଯାତନା ପ୍ରସଙ୍ଗକୁ ନେଇ ଆନ୍ଦୋଳନକୁ ତୀବ୍ର କରୁଛି ଦଳ। ହେଲେ ଦମନ ପାଇଁ ଶାସକ ଦଳ କରୁଛି ହୀନ ପ୍ରୟାସ । ଶାସକ ବିଜେପି ବିରୋଧରେ ଏପରି ସାଂଘାତିକ ଖୁଲାସା କରିଛନ୍ତି ଖୋଦ ପିସିସି ସଭାପତି । ଯାହାକୁ ନେଇ ମୁହାଁମୁହିଁ ହୋଇଛନ୍ତି ଉଭୟ ବିଜେପି ଓ କଂଗ୍ରେସ ।
ମ୍ୟାନେଜ ହେବେ କି ଭକ୍ତ । ଚାଲିଛି ଅହରହ ଉଦ୍ୟମ । ସରକାରୀ ଦଳ ପକ୍ଷରୁ ଅସାଧୁ ଉପାୟରେ ନାରୀ ନିର୍ଯାତନା ପ୍ରସଙ୍ଗକୁ ଚପାଇ ଦେବାକୁ ଚାଲିଛି ଉଦ୍ୟମ । ବିଭିନ୍ନ ଉପାୟରେ କଂଗ୍ରେସର ସ୍ବରକୁ ଚପାଇ ଦେବାକୁ ଯୋଜନା ଚାଲିଥିବା ନେଇ ଅଭିଯୋଗ କରିଛନ୍ତି ଖୋଦ ପିସିସି ସଭାପତି ଭକ୍ତଚରଣ ଦାସ । ହେଲେ ରାଜ୍ୟ ସରକାର ଯେତେ ଚେଷ୍ଟା କଲେ ବି ନାରୀ ନିର୍ଯାତନା ବିରୋଧରେ ଆନ୍ଦୋଳନକୁ ଜାରି ରଖିବ କଂଗ୍ରେସ । ୬୦ ହଜାର ମହିଳା ଓ ଶିଶୁ ନିଖୋଜ ଥିବା ବେଳେ, ଖୋଜୁ ନାହାନ୍ତି ସରକାର । ୧୬୦୧ ଜଣ ନିର୍ଯାତନାର ଶିକାର ହୋଇଥିବା ବେଳେ, ୬୦ ଜଣ ମହିଳାଙ୍କୁ ଗଣ ଦୁଷ୍କର୍ମ କରାଯାଇଛି । କଂଗ୍ରେସ ହାଉସ କମିଟି ଗଠନ କରିବାକୁ ଦାବି କରୁଛି । କିନ୍ତୁ କୁମ୍ଭକର୍ଣ୍ଣ ନିନ୍ଦ୍ରାରେ ଶୋଇଛନ୍ତି ସରକାର । ଏହା ବିରୋଧରେ କଂଗ୍ରେସ ଆରମ୍ଭ କରିଛି କ୍ୟାଣ୍ଡେଲ ଶୋଭାଯାତ୍ରା । ବିଜେପି ସରକାରରେ ମହିଳା ଅସୁରକ୍ଷିତ ଥିବାରୁ ଗାଁ ଗାଁରେ ଜନ ଆନ୍ଦୋଳନ କରିବାକୁ ଚେତାବନୀ ଦେଇଛି ଦଳ ।
କେବଳ ସେତିକି ନୁହେଁ, ଅନ୍ଦୋଳନକୁ ଭଣ୍ଡୁର କରିବାକୁ ରାଜ୍ୟ ସରକାର ପ୍ରାୟୋଜିତ ଗଣ୍ଡଗୋଳ କରିଛନ୍ତି ବୋଲି ଅଭିଯୋଗ କରିଛନ୍ତି ପିସିସି ସଭାପତି । ମିଥ୍ୟା ମାମଲା ରୁଜୁ କରି ଦଳୀୟ ନେତା ଓ କର୍ମୀଙ୍କ ସ୍ବରକୁ ଚପାଇ ଦେବାକୁ ଚାଲିଛି ପ୍ରୟାସ । ଅନ୍ୟପଟେ କଂଗ୍ରେସର ଅଭିଯୋଗକୁ ସିଧାସଳଖ ଖଣ୍ଡନ କରିଛି ବିଜେପି ।
ନାରୀ ନିର୍ଯାତନା ଓ ମହିଳା ଅସୁରକ୍ଷତି ପ୍ରସଙ୍ଗକୁ ମୁଖ୍ୟ ମୁଦ୍ଦା କରି ରାଜ୍ୟ ସରକାରଙ୍କ ବିରୋଧରେ ଋଣହୁଙ୍କାର ଦେଇଛି କଂଗ୍ରେସ । ପ୍ରଥମଥର ଲାଗି ବିଧାନସଭାରୁ କଂଗ୍ରେସର ୧୪ ଜଣ ବିଧାୟକ ନିଲମ୍ବିତ ହୋଇ ଏ ପ୍ରସଙ୍ଗରେ ଜାରି ରଖିଛନ୍ତି ପ୍ରତିବାଦ ।