ଚୋକରଙ୍କ ବାବାଙ୍କ ଟିକେଟ୍ କଟିଲା, ଆଜୀବନ କରିବେ ଫଳାହାର

ଛପରା(ବିହାର):  ବିହାର ନିର୍ବାଚନ ପାଇଁ ନାମାଙ୍କନ ଆରମ୍ଭ ହୋଇଯାଇଛି । ମେଣ୍ଟ ନିର୍ବାଚନରେ କାହାର ଟିକେଟ କଟୁଛି ତ ଆଉ କାହାକୁ ମିଳୁଛି । ଆମନୌର ବିଧାନସଭା ଆସନରୁ ବିଧାୟକ ଥିବା ବିଜେପି ନେତା ଶତ୍ରୁଘ୍ନ ଚିୱାରୀ ଏଥରକ ବି ଟିକେଟ୍ ମିଳିବା ନେଇ ଆଶାବାଦୀ ଥିଲେ । ହେଲେ, ବିଜେପି ଚଳିଥର ଅମନୌର ଆସନରେ ପ୍ରାର୍ଥୀ ଦେଇନାହିଁ । ବିଜେପିର ସହଯୋଗୀ ଦଳ ଏହି ଆସନରେ ପ୍ରାର୍ଥୀ ଦେଇଛି । ଟିକେଟ୍ କଟିବାରୁ ଅମନୌର ବିଧାୟକ ଘୋଷଣା କରିଛନ୍ତି ସେ ଆଜୀବନ ଅନ୍ନ ଗ୍ରହଣ କରିବେ ନାହିଁ । କେବଳ ଫଳ ଖାଇ ରହିବେ । ବିଧାୟକଙ୍କ ଏଭଳି ବିରୋଧ ସମସ୍ତଙ୍କୁ ଚକିତ କରିଦେଇଛି । ଏହାକୁ ନେଇ ଅଜବ ଯୁକ୍ତି ଉପସ୍ଥାପନ କରିଛନ୍ତି ଶତ୍ରୁଘ୍ନ ।

ଟିକେଟ କଟିବା ପରେ ଶତ୍ରୁଘ୍ନ ସ୍ଥାନୀୟ ସାଂସଦଙ୍କୁ ଟାର୍ଗେଟ୍ କରିଛନ୍ତି । ଶତ୍ରୁଘ୍ନ ସ୍ଥାନୀୟ ସାଂସଦଙ୍କ ସହ ମଙ୍ଗଳ ପାଣ୍ଡେ ଓ ସୁଶୀଲ ମୋଦିଙ୍କୁ ବି ଶାଣିତ ଆକ୍ରମଣ କରିଛନ୍ତି । ଏମାନେ ସମସ୍ତେ ମିଶି ତାଙ୍କ ଟିକେଟ କାଟିଥିବା ଅଭିଯୋଗ କରିଛନ୍ତି ଚୋକର ବାବା (ଶତ୍ରୁଘ୍ନ ତିୱାରୀ) । ସେ କହିଛନ୍ତି- ‘ମୋ ଲୋକପ୍ରିତା ସହିନପାରି ଏମାନେ ସମସ୍ତେ ମିଶି କରି ମୋ ଟିକେଟ୍ କାଟି ଦେଇଛନ୍ତି, ଯେଉଁଥିପାଇଁ ମୁଁ ଆଜୀବନ ଫଳ ଖାଇ ରହିବାକୁ ନିଷ୍ପତ୍ତି ନେଇଛି ।’

ଚୋକର ବାବାଙ୍କ କହିବା କଥା- ‘ମୁଁ ଯାହାଙ୍କୁ ଗତଥର ନିର୍ବାଚନରେ ପରାସ୍ତ କରିଥିଲି ଦଳ ତାଙ୍କୁ ହିଁ ଟିକେଟ୍ ଦେଇଛି । ମୁଁ ଏବେ ବିଧାୟକ ଥିବାବେଳେ ନିର୍ବାଚନ ପ୍ରସ୍ତୁତିରେ ଲାଗିଛି । ବନ୍ୟା ବେଳେ ସ୍ଥାନୀୟ ଲୋକଙ୍କ ସହ ମଧ୍ୟ କାମ କରୁଥିଲି । ଯେଉଁଥିପାଇଁ ତାଙ୍କ ଲୋକପ୍ରିୟତା ମଧ୍ୟ ଲଗାତାର ବୃଦ୍ଧି ପାଇଛି । ଏହି କଥା ସାଂସଦଙ୍କୁ ହଜମ ହେଲାନି, ତେଣୁ ଟିକେଟ୍ କାଟି ଦେଇଛନ୍ତି ।’

ଦଳୀୟ ଟିକେଟ୍ କଟିବା ପରେ ନାରାଜ ଥିବା ଚୋକର ବାବା କହିଛନ୍ତି- ସେ ଏବେ ସନ୍ୟାସୀଙ୍କ ଭଳି ଜୀବନ ଯାପନ କରିବେ । ସେ ସନ୍ୟାସୀଙ୍କ ଭଳି ବିରୋଧ କରିବେ । ଏଥିସହ ସେ ଆଜୀବନ ଅନ୍ନ ଖାଇବେ ନାହିଁ ବୋଲି ଘୋଷଣା କରିଛନ୍ତି । କେବଳ ଫଳ ଖାଇ ହିଁ ରହିବେ । ଦଳରେ ଆଭ୍ୟନ୍ତରୀଣ ଗଣତନ୍ତ୍ର ଶେଷ ହୋଇଯାଇଥିବା ନେଇ ସେ ଅଭିଯୋଗ କରିଛନ୍ତି ।