ସମ୍ବଲପୁର: ଥାନାରେ କଟିଲା ପୁରା ରାତି । ନିଜ ଜିଦ୍ ପାଇଁ ରାତି ସାରା ଥାନାରେ ରହିଲେ ଏକାଧିକ ବିଜେପି ନେତା । ଏଭଳି ଏକ ଘଟଣା ଦେଖିବାକୁ ମିଳିଛି ସମ୍ବଲପୁରରେ । ସମ୍ବଲପୁର ବିଧାୟକ ଜୟନାରାୟଣ ମିଶ୍ରଙ୍କ ସମେତ ଆଖପାଖ ଅଞ୍ଚଳର ୧୦ରୁ ଅଧିକ ବିଜେପି ନେତା ରାତି ସାରା ଥାନା ବିତାଇଥିବା ଦେଖିବାକୁ ମିଳିଛି ।
ଦୀର୍ଘ ଦିନ ଧରି ଲାଗି ରହିଥିବା ମଣ୍ଡି ସମସ୍ୟାକୁ ନେଇ ବିଜେପି ନେତା ଚାଷୀ ଅଧିକାର ରାଲି କରିଥିଲେ । ଏହି ସମୟରେ ସେମାନେ ସମ୍ବଲପୁର ଆର୍ଡିସି ଅଫିସ୍ ଘେରାଉ କରିଥିଲେ । ଆର୍ଡିସି ଅଫିସ୍ ସମ୍ମୁଖରେ ହୋ-ହଲ୍ଲା କରିବା ସହ କାର୍ଯ୍ୟାଳୟ ଭିତରକୁ ଧସେଇ ପଶିବାକୁ ଚେଷ୍ଟା କରିଥିଲେ । ଫଳରେ ପରିସ୍ଥିତି ଉତ୍ତେଜନାପୂର୍ଣ୍ଣ ହୋଇଥିଲା । ପୋଲିସ ବିଜେପି ନେତା ମାନଙ୍କୁ ଗିରଫ କରି ଥାନାକୁ ଆଣିଥିଲା ।
ଏଥିରେ ସମ୍ବଲପୁର ବିଧାୟକ ଜୟନାରାୟଣ ମିଶ୍ର, ରେଙ୍ଗାଲି ବିଧାୟକ ନାଉରୀ ନାୟକ, ବିଜେପି ରାଜ୍ୟ ସଭାପତି ସମୀର ମହାନ୍ତି, ବିରୋଧୀ ଦଳ ନେତା ପ୍ରଦିପ୍ତ ନାୟକ, କନକ ବର୍ଦ୍ଧନ ସିଂ ଦେଓଙ୍କ ସହ ବହୁ ନେତା ଗିରଫ ହୋଇଥିଲେ । ଗିରଫ ହେବା ପରେ ସେମାନେ ରାତି ସରା ଟାଉନ ଥାନାରେ ଧାରଣାରେ ବସିଥିଲେ ।
