ଏହି ତାରିଖରେ ଶପଥ ନେବେ ମହାରାଷ୍ଟ୍ର ମୁଖ୍ୟମନ୍ତ୍ରୀ !
ନନ୍ଦିଘୋଷ ବ୍ୟୁରୋ: ୫ ଡିସେମ୍ବରରେ ମହାରାଷ୍ଟ୍ରକୁ ମିଳିବ ନୂତନ ମୁଖ୍ୟମନ୍ତ୍ରୀ ! ଶପଥ ଗ୍ରହଣ ପାଇଁ ମଇଦାନ ମଧ୍ୟ ଚୟନ ସରିଛି । ଶପଥ ଗ୍ରହଣର ମହାନ କାର୍ଯ୍ୟ ମୁମ୍ବାଇର ଐତିହାସିକ ଆଜାଦ ମଇଦାନରେ ହେବ । ମୁଖ୍ୟମନ୍ତ୍ରୀଙ୍କ ସମେତ ସମସ୍ତ ମନ୍ତ୍ରୀ ଏଠାରେ ଶପଥ ଗ୍ରହଣ କରିବେ । ତେବେ ମୁଖ୍ୟମନ୍ତ୍ରୀଙ୍କ ସମେତ କେତେ କ୍ୟାବିନେଟ ମନ୍ତ୍ରୀ ଶପଥ ନେବେ ତାହା ଏପର୍ଯ୍ୟନ୍ତ ପ୍ରକାଶ କରାଯାଇନାହିଁ । ସୂଚନାନୁସାରେ, ବିଜେପି ସରକାର ଶପଥ ଗ୍ରହଣ ପ୍ରକ୍ରିୟା ଆରମ୍ଭ କରିଛି । ମହାରାଷ୍ଟ୍ର ଭାଜପା ଅଧ୍ୟକ୍ଷ ଚନ୍ଦ୍ରଶେଖର ବାୱାନକୁଲେ ନିଜେ ଏହି ପ୍ରସଙ୍ଗରେ ତଦାରଖ କରୁଛନ୍ତି । ବାୱାନକୁଲେ ହିଁ ଏହି ଶପଥ ଗ୍ରହଣ ବିଷୟରେ ସୂଚନା ଦେଉଛନ୍ତି ।
ଡିସେମ୍ବର ୨ କିମ୍ବା ୩ ରେ ମୁମ୍ବାଇରେ ବିଧାୟକ ଦଳ ବୈଠକ ଅନୁଷ୍ଠିତ ହେବ। ଏହି ବୈଠକରେ ବିଧାୟକ ଦଳର ନେତା ବଛାଯିବେ। ବିଧାୟକ ଦଳର ନେତା ବାଛିବା ପାଇଁ ବିଜେପି କେନ୍ଦ୍ରରୁ ପର୍ଯ୍ୟବେକ୍ଷକ ପଠାଯିବ । ବିଧାୟକ ଦଳର ବୈଠକ ପରେ ତୁରନ୍ତ ସରକାର ଗଠନ ପାଇଁ ଦାବି କରାଯିବ। ଏହା ପରେ ଶପଥ ଗ୍ରହଣ ତାରିଖ ଘୋଷଣା କରାଯିବ।
୨୦୧୪ରେ ଯେତେବେଳେ ଦେବେନ୍ଦ୍ର ଫଡନାଭିସ୍ ମୁଖ୍ୟମନ୍ତ୍ରୀ ହୋଇଥିଲେ, ସେତେବେଳେ ସେ ମୁମ୍ବାଇର ଓ୍ବାଙ୍ଖଡେ ଷ୍ଟାଡିୟମରେ ଶପଥ ନେଇଥିଲେ। ଏହି ସମାରୋହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅଂଶଗ୍ରହଣ କରିଥିଲେ। ୨୦୧୯ରେ, ଫଡନାଭିସ୍ ଦ୍ୱିତୀୟ ଥର ପାଇଁ ମୁଖ୍ୟମନ୍ତ୍ରୀ ହୋଇଥିଲେ, କିନ୍ତୁ ସେତେବେଳେ ରାଜ ଭବନରେ ଶପଥ ଗ୍ରହଣ ସମାରୋହ ଅନୁଷ୍ଠିତ ହୋଇଥିଲା ।
ଯେତେବେଳେ ଉଦ୍ଧବ ମୁଖ୍ୟମନ୍ତ୍ରୀ ହୋଇଥିଲେ ସେତେବେଳେ ସେ ଶପଥ ଗ୍ରହଣ ସମାରୋହ ପାଇଁ ଶିବାଜୀ ମଇଦାନକୁ ବାଛିଥିଲେ । ବାଲାସାହେବଙ୍କ ଅନ୍ତିମ ସଂସ୍କାର ଏହି ମଇଦାନରେ ହୋଇଥିବାରୁ ଶିବସେନା ପାଇଁ ଏହି ଭୂମି ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଏ । ମହାରାଷ୍ଟ୍ର ୨୮୮ ବିଧାନସଭା ଆସନ ମଧ୍ୟରୁ୨୩୦ ଟି ଜିତିଛି । ରାଜ୍ୟରେ ସର୍ବାଧିକ ୧୩୨ ଟି ଆସନ ଜିତିଛି ଭାଜପା । ସିନ୍ଦେ ସେନା ୫୭ ଟି ସିଟ୍ ଏବଂ ଅଜିତ ପାୱାରଙ୍କ ଦଳ ୪୧ଟି ସିଟ୍ ଜିତିଛି।
