ବିଜେପି ନେତାଙ୍କୁ ଗାଁରେ ପୂରାଇ ଦେଲେନି ଲୋକେ

ମୁଜଫରପୁର: ଆଉ ଦିନ କେଇଟା ପରେ ଉତ୍ତର ପ୍ରଦେଶ ନିର୍ବାଚନ । ମୈଦାନ ପ୍ରସ୍ତୁତ, ପ୍ରଚାର ଲଢେଇ ଜୋରଦାର । ବିରୋଧୀ ଦଳଙ୍କଠାରୁ କଡା ଟକ୍କରର ସମ୍ମୁଖୀନ ହେଉଥିବା ଶାସକ ବିଜେପିକୁ ଦଳୀୟ ନେତାଙ୍କ ଚିନ୍ତା । ଗୋଟିଏ ପଟେ ଘର ଭାଙ୍ଗୁଛି ଅନ୍ୟପଟେ ବିଜେପି ନେତାଙ୍କ ବିରୋଧରେ ଜନ ଅସନ୍ତୋଷ ଯୋଗୀ ଟିମକୁ ଆକଚା ମାକଚା କରି ପକାଇଲାଣି ।

ବିଜେପି ବିରୋଧରେ ଜନ ଅସନ୍ତୋଷ ଏତେ ତୀବ୍ର ହେବାରେ ଲାଗିଛି ଯେ ନିଜ ନିର୍ବାଚନମଣ୍ଡଳିକୁ ବି ପଶିବାକୁ ଡରୁଛନ୍ତି ଦଳୀୟ ନେତା । ମୁଜଫରପୁରର ବିଜେପି ବିଧାୟକ ସମ୍ମୁଖୀନ ହୋଇଛନ୍ତି ଏମିତି ସ୍ଥିତିର ।  ବିଧାୟକଙ୍କୁ ଗ୍ରାମବାସୀ ତଡ଼ି ଦେଉଥିବାର ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।

ମୁଜଫରପୁର ଖତୋଲି ବିଧାୟକ ତଥା ବିଜେପି ବିଧାୟକ ପ୍ରାର୍ଥୀ ବିକ୍ରମ ସିଂହ ସୈନୀଙ୍କୁ ନିଜ ନିର୍ବାଚନମଣ୍ଡଳିରେ ବିରୋଧର ସମ୍ମୁଖୀନ ହେବାକୁ ପଡୁଛି । ଏକ ଦଳୀୟ କାର୍ଯ୍ୟକ୍ରମରେ ସାମିଲ ହେବାକୁ ବିକ୍ରମ ଯାଇଥିବା ବେଳେ ଗ୍ରାମବାସୀ ତାଙ୍କୁ ସେଠାରୁ ତଡ଼ି ଦେଇଛନ୍ତି । ସେତିକି ନୁହେଁ ବିକ୍ରମ ଗାଡ଼ିରେ ବସି ଫେରିବାକୁ ଉଦ୍ୟମ କରୁଥିବା ବେଳେ ଗ୍ରାମାବସୀ ତାଙ୍କୁ ଘେରି ଯାଇ ସରକାରୀ ବିରୋଧୀ ସ୍ଲୋଗାନ ଦେଉଥିବା ଭିଡିଓରେ ଦେଖିବାକୁ ମିଳୁଛି । ଏପରିକି ଲୋକଙ୍କୁ ଶାନ୍ତ କରିବାକୁ ବିକ୍ରମ ହାତ ଗୋଡି କ୍ଷମା ମାଗୁଥିବା ମଧ୍ୟ ଦେଖିବାକୁ ମିଳୁଛି ।