ବିଜେପି ସରକାର ନିଆଁ ସହ ଖେଳୁଛି ! ତାଇଓ୍ୱାନ୍କୁ ନେଇ ପ୍ରଶ୍ନ ଦୁଇ ଦେଶ ମଧ୍ୟରେ ଅଧିକ ତିକ୍ତତା ବଢ଼ାଉଛି
1 min read
ନୂଆଦିଲ୍ଲୀ: ତାଇୱାନ୍ ଜାତୀୟ ଦିବସରେ, ନୂଆଦିଲ୍ଲୀସ୍ଥିତ ଚୀନ୍ ଦୂତାବାସ ବାହାରେ ଦିଲ୍ଲୀ ବିଜେପି ନେତା ତାଜିନ୍ଦର ବଗା ଲଗାଇଥିଲେ ପୋଷ୍ଟର । ଏହାକୁ ନେଇ କ୍ରୋଧ ପ୍ରକାଶ କରିଛି ଚୀନ୍ର ସରକାରୀ ପତ୍ରିକା ଗ୍ଲୋବାଲ୍ ଟାଇମ୍ସ । ଗ୍ଲୋବାଲ ଟାଇମ୍ସ କହିଛି ଯେ, ଏହାଦ୍ୱାରା ଭାରତ-ଚୀନ୍ ସମ୍ପର୍କ ଅଧିକ ଖରାପ ହେବ । ଭାରତରେ ଥିବା ବିଜେପି ସରକାର ମୁର୍ଖଙ୍କ ଭଳି ବ୍ୟବହାର କରୁଛି । ସେ ନିଆଁ ସହ ଖେଳୁଛନ୍ତି ବୋଲି ଯଥାଶୀଘ୍ର ବୁଝିଯିବା ଆବଶ୍ୟକ ।
ଚାଇନାର ବିଶେଷଜ୍ଞ ଲିୟୁ କାୟୁଙ୍କ ପକ୍ଷରୁ ଗ୍ଲୋବାଲ ଟାଇମ୍ସ କହିଛି ଯେ, ବିଜେପି ନେତା ଏଭଳି ଏକ ସମୟରେ ଏହି ପଦକ୍ଷେପ ନେଇଛନ୍ତି, ଯେଉଁ ସମୟରେ ଭାରତୀୟ ଗଣମାଧ୍ୟମ ତାଇୱାନର ଜାତୀୟ ଦିବସକୁ ସମର୍ଥନ କରିଛି । ଏହାସହ ଭାରତୀୟ ବୈଦେଶିକ ମନ୍ତ୍ରଣାଳୟର ଜଣେ ଅଧିକାରୀ, ଭାରତୀୟ ଗଣମାଧ୍ୟମର ଚୀନ୍ ନୀତିକୁ ସମ୍ମାନ ନକରି ନିଜର ମତାମତ ପ୍ରକାଶ କରିବା ଅଧିକାରକୁ ସମର୍ଥନ ଜଣାଇଛନ୍ତି ।
ଚାଇନାର ବିଶେଷଜ୍ଞ କହିଛନ୍ତି ଯେ, ଭାରତ ପକ୍ଷରୁ ତାଇୱାନକୁ ନେଇ କରାଯାଇଥିବା ଉତ୍ତେଜନାପୂର୍ଣ୍ଣ ପ୍ରଶ୍ନ, ଭାରତ-ଚୀନ୍ ସମ୍ପର୍କକୁ ଆହୁରି ତିକ୍ତତା ଆଡ଼କୁ ନେଉଛି । ଯାହା ଆଗକୁ ସମାଧାନ ନହେବାର ସମ୍ଭାବନା ବେଶି । ସାଂଘାଇ ପ୍ରତିଷ୍ଠାନର ଅନ୍ତର୍ଜାତୀୟ ବ୍ୟାପାର ବିଶେଷଜ୍ଞ ଜାଓ ଗାନଚେଙ୍ଗ୍ କହିଛନ୍ତି ଯେ, ଚୀନ୍ର ଏକ ଚୀନ୍ ନୀତିକୁ ଚ୍ୟାଲେଞ୍ଜ କରି ଭାରତ ନିଆଁ ସହ ଖେଳୁଛି । ସେ ଦାବି କରିଛନ୍ତି ଯେ ଭାରତ ତାଇୱାନକୁ ନେଇ ଯେଉଁଭଳି ପ୍ରଶ୍ନ କରୁଛି, ଏହାଦ୍ୱାରା ତଳ ସ୍ତରରେ ଲୋକଙ୍କ ମନରେ ଚୀନ୍ ବିରୋଧୀ ଭାବନା ଉତ୍ତେଜିତ ହେବାର ଆଶଙ୍କା ରହିଛି । ଭାରତ ପକ୍ଷରୁ ଏଭଳି ଆଚରଣ, ଚୀନ୍କୁ ଏକ ପଡୋଶୀ ଦେଶ ଭଳି ବ୍ୟବହାର ନକରିବାକୁ ବାଧ୍ୟ କରୁଛି ।
ତାଇଓ୍ୱାନ୍କୁ ନେଇ ପ୍ରଶ୍ନ, ତିକ୍ତତାକୁ ଅଧିକ ବଢ଼ାଉଛି
ଝାଓ କହିଛନ୍ତି ଯେ, ଭାରତ-ଚୀନ୍ ମଧ୍ୟରେ ଯେତେବେଳେ ଅର୍ଥନୈତିକ ତଥା ପାରସ୍ପରିକ ଆଦାନ-ପ୍ରଦାନ ବନ୍ଦ ହୋଇଯିବ ସେତେବେଳେ ଭାରତ ଚିନ୍ତା କରିବ । ଭାରତ ସରକାର ଖୋଲାଖୋଲି ଭାବରେ ଚୀନ୍ ନୀତି ଅନୁସରଣ କରୁଛନ୍ତି କିନ୍ତୁ ସାମ୍ବାଦିକ ସ୍ୱାଧୀନତା ଆଳରେ ଏଥିପ୍ରତି ଗୁରୁତ୍ୱ ଦେଉନାହାନ୍ତି । ଚାଇନାର ଜଣେ ରିସର୍ଚ୍ଚ ଫେଲୋ ହୁ ଜିଓଙ୍ଗ କହିଛନ୍ତି ଯେ, ଭାରତ-ଚୀନ୍ ମଧ୍ୟରେ ଉତ୍ତେଜନା ଲାଗିରହିଥିବା ବେଳେ ଅନୈତିକ ଭାବେ ବିଜେପି ତାଇୱାନ ପ୍ରଶ୍ନକୁ ନେଇ ପରିସ୍ଥିତିକୁ ଆହୁରି ବିଗାଡ଼ୁଛି । ସେ ଆହୁରି କହିଛନ୍ତି ଯେ, ବିଜେପି ସରକାର ଲକ୍ଷ୍ମଣରେଖା ପାର କରି, ତାଇଓ୍ୱାନ୍ କାର୍ଡ ଖେଳିବା ଦ୍ୱାରା ଚୀନ୍ ସହ ମୁଲଚାଲ ସମୟରେ ସହଯୋଗ ହେବ ବୋଲି ଭାବୁଛି ।
ଏଭଳି ଆଚରଣ ଭାରତ ପାଇଁ ଆଦୌ ଲଭାଦାୟକ ନୁହେଁ ବରଂ ଦ୍ୱିପାକ୍ଷିକ ତିକ୍ତତାକୁ ଆହୁରି ଅଧିକ କରୁଛି । ଏପରିକି ଏହା ଦୁଇ ଦେଶ ମଧ୍ୟରେ ରଣନୀତିକ ଭାଗିଦାରୀକୁ କ୍ଷତି ପହଞ୍ଚାଇବ । ଗ୍ଲୋବାଲ ଟାଇମ୍ସ କହିଛି ଯେ, ମସ୍କୋରେ ହୋଇଥିବା ୫ଟି ଚୁକ୍ତି ଉପରେ ଭାରତ ଏପର୍ଯ୍ୟନ୍ତ କୌଣସି ପଦକ୍ଷେପ ନେଇନାହିଁ । ଭାରତ ନିଜର ସାମରିକ ଶକ୍ତିକୁ ସୀମାରେ ବୃଦ୍ଧି କରିଛି । ଯାହାକି ଚୀନ୍ ସେନା ପକ୍ଷରୁ କୌଣସି ପରିସ୍ଥିତିରେ ବି ମୁକାବିଲା କରିବା ପାଇଁ ପ୍ରସ୍ତୁତ ରହିବାକୁ ବାଧ୍ୟ କରିଛି ।
