ନନ୍ଦିଘୋଷ ବ୍ୟୁରୋ: ବନ୍ୟା ମୁକାବିଲାରେ ରାଜ୍ୟ ସରକାର ସମ୍ପୂର୍ଣ୍ଣ ବିଫଳ ହୋଇଛି। ସରକାର ନିଜ ବିଫଳତାକୁ ସ୍ୱୀକାର କରି ବନ୍ୟା ବିପନ୍ନଙ୍କ ସ୍ୱାର୍ଥ ପାଇଁ କାମ କରିବା ଉଚିତ ବୋଲି କହିଛନ୍ତି ବିଜେଡି ନେତ୍ରୀ ସୁଜାତା ରାଉତ। ରାଜ୍ୟର ଏକ ପ୍ରମୁଖ ଦୈନିକରେ ପ୍ରକାଶିତ ନିବନ୍ଧ ଜରିଆରେ ସେ ରାଜ୍ୟ ସରକାରଙ୍କ ବନ୍ୟା ପରିଚାଳନା ଆଭିମୁଖ୍ୟକୁ କଡ଼ା ସମାଲୋଚନା କରିଛନ୍ତି। ରାଜ୍ୟ ଏବେ ବନ୍ୟାରେ ଉବୁଟୁବୁ ହେଉଥିବା ବେଳେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀଙ୍କ ‘ଇନ୍ଦ୍ରଙ୍କୁ ଫୋନ୍ ନମ୍ବର ମାଗିବା’ ମନ୍ତବ୍ୟ ସରକାରଙ୍କ ଦୁର୍ବଳତାକୁ ପଦାରେ ପକାଇଛି ବୋଲି ସୁଜାତା କହିଛନ୍ତି। ସେ କହିଛନ୍ତି, ୧୯୯୯ ମହାବାତ୍ୟା ପରେ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ନେତୃତ୍ୱରେ ଓଡ଼ିଶା ଦଶନ୍ଧି ଦଶନ୍ଧି ଧରି ଏକ ପ୍ରଭାବଶାଳୀ ବିପର୍ଯ୍ୟୟ ପରିଚାଳନା ବ୍ୟବସ୍ଥା ଗଢ଼ି ତୋଳିଥିଲା। ପ୍ରାକ୍ ସତର୍କତା, ଯୋଜନାବଦ୍ଧ ସ୍ଥାନାନ୍ତରଣ, ବୃତ୍ତିଗତ ଦକ୍ଷତା ଏବଂ ଅଭିଜ୍ଞ ଓ ସମ୍ବେଦନଶୀଳ ପ୍ରଶାସନିକ ବ୍ୟବସ୍ଥା ଯୋଗୁଁ ଏହା ସମ୍ଭବ ହୋଇଥିଲା। ‘ଜିରୋ କାଜୁଆଲିଟି’ ଥିଲା ତତ୍କାଳୀନ ସରକାରଙ୍କ ପ୍ରମୁଖ ଲକ୍ଷ୍ୟ। ରାଜ୍ୟ ସରକାରଠାରୁ ଆରମ୍ଭ କରି ଜିଲ୍ଲା ପ୍ରଶାସନ ଓ ସ୍ଥାନୀୟ ସରପଞ୍ଚଙ୍କ ପର୍ଯ୍ୟନ୍ତ ସମସ୍ତେ ଗୋଟିଏ ଟିମ୍ ଭାବେ କାମ କରୁଥିଲେ। ତେବେ ୨୦୨୬ ଜୁଲାଇ-ଅଗଷ୍ଟରେ ବନ୍ୟା ପରିଚାଳନାରେ ଭୁଲ କେଉଁଠି ରହିଲା ଏବଂ ଭାରତର ଏକ ଶ୍ରେଷ୍ଠ ବିପର୍ଯ୍ୟୟ ପରିଚାଳନା ବ୍ୟବସ୍ଥାରେ ଏତେ ବଡ଼ ତ୍ରୁଟି କିପରି ହେଲା ବୋଲି ସୁଜାତା ପ୍ରଶ୍ନ କରିଛନ୍ତି। ଏଥିପାଇଁ ଦାୟୀ କିଏ ବୋଲି ମଧ୍ୟ ସେ ସରକାରଙ୍କୁ ପ୍ରଶ୍ନ କରିଛନ୍ତି। ବିଜେପି ନେତା ଓ କର୍ମୀମାନେ ପ୍ରଶାସନର ଭୂମିକାକୁ ନିଜ ହାତକୁ ନେଇଥିବାରୁ ରିଲିଫ୍ ବଣ୍ଟନରେ ପ୍ରତିଯୋଗିତା ଚାଲିଥିବା ସେ ଅଭିଯୋଗ କରିଛନ୍ତି। କର୍ମୀମାନେ ରିଲିଫ୍ ବଣ୍ଟନକୁ ନେଇ ପ୍ରତିଯୋଗିତା କଲେ ବନ୍ୟା ସେବା ନୁହେଁ, ବରଂ ଉପାର୍ଜନର ଏକ ମାଧ୍ୟମରେ ପରିଣତ ହୁଏ ବୋଲି ସେ କହିଛନ୍ତି। ଦଳୀୟ ଭିତ୍ତିରେ ରିଲିଫ୍ ବଣ୍ଟନ ଅଭିଯୋଗ ଏକ ସମ୍ବେଦନଶୀଳ ବିଷୟ ହୋଇଥିବା ବେଳେ ଏହା ଶାସନ ଓ ରାଜଧର୍ମର ନୀତିକୁ ଉଲ୍ଲଂଘନ କରୁଛି ବୋଲି ସେ ମତ ଦେଇଛନ୍ତି। ବିଜେପି ସବୁବେଳେ ଲୋକେ ପରିବର୍ତ୍ତନ ଚାହୁଁଥିଲେ ବୋଲି ଦାବି କରୁଛି। ତେବେ ବନ୍ୟା ପରିଚାଳନାରେ ବିଫଳତା ଓ ଲୋକଙ୍କ ଦୁର୍ଦ୍ଦଶା କ’ଣ ସେହି ପରିବର୍ତ୍ତନର ପ୍ରତିଫଳନ ବୋଲି ସୁଜାତା ପ୍ରଶ୍ନ କରିଛନ୍ତି। ଏଥିସହ ମିଶନ ଶକ୍ତି ସ୍ୱୟଂସହାୟକ ଗୋଷ୍ଠୀଗୁଡ଼ିକୁ ବନ୍ୟା ପରିଚାଳନା ଓ ରିଲିଫ୍ କାର୍ଯ୍ୟରୁ ଦୂରେଇ ଦିଆଯିବାକୁ ମଧ୍ୟ ସେ ଆଉ ଏକ ବିଫଳତା ବୋଲି ଦର୍ଶାଇଛନ୍ତି।
ସୁଜାତାଙ୍କ ଅଭିଯୋଗ ଅନୁଯାୟୀ, ଆଜି ରାଜ୍ୟ ପ୍ରାକୃତିକ ବିପର୍ଯ୍ୟୟ ପରିଚାଳନାରେ ଅସହାୟ ହୋଇପଡ଼ିଛି। ୨୪ ମାସ ମଧ୍ୟରେ ୨୪ ବର୍ଷ ଧରି ଗଢ଼ିଉଠିଥିବା ଏକ ଦୃଢ଼ ଓ ସଫଳ ପରିଚାଳନାଗତ ବ୍ୟବସ୍ଥା ଭୁଶୁଡ଼ି ପଡ଼ିଛି। ଏହାର ପରିଣାମ ସାଧାରଣ ଲୋକଙ୍କୁ ଭୋଗିବାକୁ ପଡ଼ୁଛି ବୋଲି ସେ କହିଛନ୍ତି। ବର୍ତ୍ତମାନର ଆବଶ୍ୟକତା ହେଉଛି ଦଳୀୟ ରାଜନୀତିରୁ ଊର୍ଦ୍ଧ୍ୱକୁ ଉଠି ଦକ୍ଷ ଓ ଅଭିଜ୍ଞ ଲୋକଙ୍କୁ ବିପର୍ଯ୍ୟୟ ପରିଚାଳନାରେ କାମ କରିବାର ସୁଯୋଗ ଦେବା। ନିର୍ବାଚିତ ପ୍ରତିନିଧିମାନଙ୍କୁ ସେମାନଙ୍କ ଦାୟିତ୍ୱ ନିର୍ବାହରେ ସହଯୋଗ କରାଗଲେ ବନ୍ୟା ପରିଚାଳନା ବ୍ୟବସ୍ଥା ଆହୁରି ସୁଦୃଢ଼ ହୋଇପାରିବ ବୋଲି ସୁଜାତା ପରାମର୍ଶ ଦେଇଛନ୍ତି।
