ଭୁବନେଶ୍ବର: ବିଜେପିର ଚାର୍ଜସିଟ ରାଜନୀତି ବିଜେପି ବିଧାୟକ ଦଳକୁ ଦୁଇଫାଳ କରିଛି । ବିରୋଧୀ ଦଳ ନେତା ଜୟନାରା୍ରଣ ମିଶ୍ର ଚାର୍ଜସିଟ ରଣନୀତିକୁ ବ୍ୟକ୍ତିଗତ ମତ କହି ନିଜ ଦଳର ନେତାଙ୍କୁ ପ୍ରଶ୍ନ କରିଛନ୍ତି । ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝୀ ଜୟ ନାରାୟଣଙ୍କ ଚାର୍ଜସିଟ ରଣନୀତିକୁ ବ୍ୟକ୍ତିଗତ ମତ ବୋଲି ଖୋଲାଖୋଲି ଗଣମାଧ୍ୟମ ଆଗରେ କହିଛନ୍ତି । ବିଧାୟକ ପ୍ରକାଶ ସୋରେନ ମଧ୍ୟ ଚାର୍ଜସିଟ ରଣନୀତି କଣ ବୋଲି ପ୍ରଶ୍ନ କରିଛନ୍ତି । ବିଜେପିର ରଣନୀତିକୁ ନେଇ ବିଧାୟକ ଦଳ ନେତା ଓ ବିଧାୟକଙ୍କ ମତରେ ତାଳମେଳ ନାହିଁ । ବିଜେପିର ଚାର୍ଜସିଟ ରଣନୀତିକୁ ମଧ୍ୟ କଟାକ୍ଷ କରିଛନ୍ତି କଂଗ୍ରେସ ଓ ବିଜେଡି । ଯାହାକୁ ନେଇ ବିଜେପି ୨୪ ରଣନୀତି ପାଣିଚିଆ ହୋଇଛି ।
ଚାର୍ଜସିଟ ରଣନୀତି ନେଇ ବିଜେପି ରାଜନୀତି ଚାର୍ଜ। ବିରୋଧୀ ଦଳ ନେତା- ମୁଖ୍ୟ ସଚେତକ ମୁହାଁମୁହିଁ। ଜୟନାରାୟଣଙ୍କ ବୟାନକୁ ବ୍ୟକ୍ତିଗତ ମତ କହିଲେ ମୋହନ। ପ୍ରକାଶ ସୋରେନ ବି ଉଠାଇଲେ ପ୍ରଶ୍ନ। କଟାକ୍ଷ କଲା କଂଗ୍ରେସ। ନିଜ ଚାର୍ଜସିଟରେ ନିଜେ ଅଭିଯୁକ୍ତ ରାଜ୍ୟ ବିଜେପି। ଲୋକଙ୍କ ପାଖକୁ ଚାର୍ଜସିଟ ନେବା ପୂର୍ବରୁ ଜୟନାରାୟଣଙ୍କ ରଣନୀତିକୁ ନେଇ ଉଠିଲା ପ୍ରଶ୍ନ। କାହିଁକି ଦଳରେ ହଠାତ୍ ଏମିତି ରଣନୀତି? ବିରୋଧୀ ଦଳ ନେତା ବିଳିବିଳେଇଲା ଭଳି ଚାର୍ଜସିଟ ରଣନୀତି କଥା କହିବା ନେଇ ଦଳ ଭିତରେ ଜୟଙ୍କୁ ଘେରିଛନ୍ତି ନିଜ ଦଳର ବିଧାୟକ। ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝୀ ଚାର୍ଜସିଟ ରଣନୀତି ଜୟନାରାୟଣଙ୍କ ବ୍ୟକ୍ତିଗତ ମତ ବୋଲି କହିଛନ୍ତି।
ଚାର୍ଜସିଟ୍ ବୟାନ କଣ ବୋଲି ମଧ୍ୟ ପଚାରିବାକୁ ପଛାଇ ନାହାନ୍ତି। ସେହିପରି ବିଧାୟକ ପ୍ରକାଶ ସୋରେନ ମଧ୍ୟ ଚାର୍ଜସିଟ ରଣନୀତି ଜାଣିନଥିବା କହିଛନ୍ତି। ବିଜେପି ବିଧାୟକଙ୍କ ଚାର୍ଜସିଟ ବୟାନ ରାଜନୀତିର ଭାଷା ନାଁ ବ୍ୟକ୍ତିଗତ ଭାଷା, ତାକୁ ନେଇ କାଠଗଡ଼ାରେ ଜୟନାରାୟଣ। ବିଭିନ୍ନ ମାମଲାରେ ଜୟଙ୍କ ବିରୋଧରେ ଚାର୍ଜସିଟ ହୋଇଛି। ବୋଧେ ତାକୁ ଲକ୍ଷ୍ୟ ରଖି ୨୪ ନିର୍ବାଚନ ପାଇଁ ଚାର୍ଜସିଟ ଶଦ୍ଦକୁ ଆଣିବାକୁ ଚାହୁଁଥିବା କହି ଜୟନାରାୟଣଙ୍କ ଦଳ ଭିତରୁ ନେତାଏ ଘେରିଛନ୍ତି। ଏହାକୁ ନେଇ ରାଜ୍ୟ ବିଜେପି ରାଜନୀତି ଗୋଳିଆ ହୋଇଛି। ଦଳର ନିଷ୍ପତ୍ତି ଯଦି ଚାର୍ଜସିଟ ହୋଇଥାନ୍ତା, ତେବେ ବିରୋଧୀ ଦଳ ମୁଖ୍ୟ ସଚେତକ ଓ ବରିଷ୍ଠ ବିଧାୟକ ବି ଅବଗତ ହୋଇଥାନ୍ତେ। ଏବେ ଚାର୍ଜସିଟ ଶଦ୍ଦ ଯେ, ବିଜେପି ଦଳରେ ଫାଟ ସୃଷ୍ଟି କରିଛି ତାହା ନେତାଙ୍କ ବୟାନରୁ ବଡ଼ ସଙ୍କେତ ମିଳିଛି।
୨୦୨୪ ସାଧାରଣ ନିର୍ବାଚନ ପୂର୍ବରୁ ବିଜେପିର ଚାର୍ଜସିଟ ରଣନୀତିକୁ କଡ଼ା ସମାଲୋଚନା କରିଛି କଂଗ୍ରେସ। ରାଜ୍ୟବାସୀଙ୍କ ପାଖରେ ବିଜେପି ନିଜେ ଅଭିଯୁକ୍ତ ହୋଇଥିବାରୁ ଏପରି ଚାର୍ଜସିଟ ନାଟକ କରୁଛି ବୋଲି ବରିଷ୍ଠ ବିଧାୟକ ସୁରେଶ ରାଉତରାୟ କହିଛନ୍ତି। ଓଡ଼ିଶାବୀସୀ ବିଜେପିର ଅସଲ ଚାର୍ଜସିଟ ବତାଇବେ ବୋଲି କଂଗ୍ରେସ କହିଛି। ସେପଟେ ୨୪ନିର୍ବାଚନକୁ ଆଖିରେ ରଖି ବିଜେପି ଏପରି ନୂଆ ସ୍ଲୋଗାନ ଦେଇଛି। ରାଜନୀତିରେ କିଏ ଚୋର ଓ କିଏ ଭଲ ତାହା ବିଜେପି ଅପେକ୍ଷା ଲୋକେ ଜାଣନ୍ତି ବୋଲି ରାଜନୈତିକ ସମୀକ୍ଷକ କହିଛନ୍ତି। ଅନ୍ୟପଟେ ବିଜେପି ଚାର୍ଜସିଟ ପଲିଟିକ୍ସରେ ନିଜ ଦଳର ସ୍ଥିତି କଣ ତାହା ଦଳୀୟ ନେତାଙ୍କ ମତରୁ ସ୍ପଷ୍ଟ ଜଣାପଡ଼ୁଛି ବୋଲି ବିଜେଡି କହିଛି। ୨୪ନିର୍ବାଚନ ସ୍ଲୋଗାନ ରଣନୀତି ନେଇ ବିଜେପି ସରକାରକୁ ଘେରିବା ପୂର୍ବରୁ ଦଳର ସ୍ଥିତି ଓ ଆଭିମୁଖ୍ୟ ବିବାଦ ଚିନ୍ତା କରୁ ବୋଲି ଦଳ କହିଛି।
