ହାରିଲେ ଯୋଗୀଙ୍କ ଉପମୁଖ୍ୟମନ୍ତ୍ରୀ କେଶବ ସିଂ ମୌର୍ଯ୍ୟ

ଲକ୍ଷ୍ନୌ: ବିଜେପିର ତୁଙ୍ଗ ନେତା ତଥା ଯୋଗୀ ସରକାରର ଉପ ମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟଙ୍କୁ ସିରାଥୁ ଆସନରେ ପରାଜୟ ବରଣ କରିବାକୁ ପଡିଛି । ସମାଜବାଦୀ ପାର୍ଟି ପ୍ରାର୍ଥୀ ପଲ୍ଲଭୀ ପଟେଲଙ୍କଠାରୁ ୭ ହଜାର ୩୩୭ ଭୋଟରେ ପରାଜିତ ହୋଇଛନ୍ତି । ଏଠାରେ ବିଜେପି ଏଜେଣ୍ଟ ରି-କାଉଣ୍ଟିଂ କରିବା ଦାବିରେ ହଙ୍ଗାମା କରୁଛନ୍ତି ।

ପଲ୍ଲଭୀ ନିଜକୁ କୌଶମ୍ବୀର ବୋହୂ ବୋଲି କହିଥାନ୍ତି । କାରଣ ତାଙ୍କ ପତି ପଙ୍କଜ ନିରଞ୍ଜନ ଏହି ଜିଲ୍ଲାର ବାସିନ୍ଦା । କେଶବ ପ୍ରସାଦ ମୌର୍ଯ୍ୟଙ୍କ ଜନ୍ମଭୂମି କୌଶମ୍ବୀ । ଏମିତି ସ୍ଥିତିରେ ସିରାଥୁରେ ବୋହୂ ବନାମ ପୁଅ ଲଢେଇ ହୋଇଥିଲା । ଏଠାରେ ଉଭୟ ବିଜେପି ଓ ସମାଜବାଦୀ ପାର୍ଟି ନିଜ ଇଜ୍ଜତ ବଞ୍ଚାଇବାକୁ ପୂରା ଦମ୍ ଲଗାଇ ଦେଇଥିଲେ ।

ସୂଚନାଯୋଗ୍ୟ, ସିରାଥୁ ବିଧାନସଭା ଆସନ ଏକଦା ସମାଜବାଦୀ ପାର୍ଟିର ଗଡ ଥିଲା । ୨୦୧୨ ବିଧାନସଭା ନିର୍ବାଚନରେ କେଶବ ଏଠାରେ ପ୍ରଥମ ଥର ବିଜୟୀ ହୋଇ ପଦ୍ମ ଫୁଟାଇଥିଲେ । ଏହାପରେ ଏହି ଆସନଟି ବିଜେପି ଦଖଲରେ ରହି ଆସିଥିଲା । ଗତ ୫ ବର୍ଷରେ ଏଠାରେ ହୋଇଥିବା ବିକାଶକୁ ନେଇ କେଶବ ଜିତିବେ ବୋଲି ଦାବି କରି ଆସୁଥିଲେ । ହେଲେ ଜାତିଗତ ସମୀକରଣକୁ ଦେଖି ସମାଜବାଦୀ ପାର୍ଟି ଏଠାରେ ପଲ୍ଲଭୀଙ୍କୁ ଏମିତି ଉପସ୍ଥାପନା କଲା ଯେ, ପ୍ରତିଦ୍ବନ୍ଦ୍ବିତା ରୋଚକ ହୋଇଯାଇଥିଲା ।