କାଲିମେଳା: ନବୀନଙ୍କ ଉପରେ ବଢୁଛି ଜନତାଙ୍କ ବିଶ୍ୱାସ । ବିଭିନ୍ନ ଜନହିତକର ଯୋଜନା ଓ ସ୍ୱଚ୍ଛ ଶାସନ ପାଇଁ ବିଜେଡି ମୁହାଁ ହେଉଛନ୍ତି ଅନ୍ୟଦଳର ନେତା ଓ କର୍ମୀ । ଆଜି ମାଲକାନଗିରି ଜିଲ୍ଲା କାଲିମେଳା ବ୍ଲକ ଏମପିଭି-୮୧ରେ ଆୟୋଜିତ ହୋଇଛି ବିଜେଡିର ମିଶ୍ରଣ ପର୍ବ । ବିଜୁ ଜନତା ଦଳର ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ମିଶ୍ରଣ ପର୍ବ ଅନୁଷ୍ଠିତ ହୋଇଛି । ଚିତ୍ରକୋଣ୍ଡା ନିର୍ବାଚନ ମଣ୍ଡଳୀର ୧୦୦ରୁ ଅଧିକ ବିଜେପି ଓ କଂଗ୍ରେସ କର୍ମୀ ବିଜୁ ଜନତା ଦଳରେ ଯୋଗ ଦେଇଛନ୍ତି ।
ଏହି ମିଶ୍ରଣ କାର୍ଯ୍ୟକ୍ରମରେ ନବରଙ୍ଗପୁର ସାଂସଦ ରମେଶ ଚନ୍ଦ୍ର ମାଝି, ସ୍ୱତନ୍ତ୍ର ବିକାଶ ପରିଷଦ ଅଦକ୍ଷ ମାନସ ମାଡକାମୀ, ଜିଲ୍ଲା ବିଜୁ ଜନତା ଦଳର କାର୍ଯ୍ୟକାରୀ ସଭାପତି ଦୁର୍ଗା ପ୍ରସାଦ ତ୍ରିପାଠୀ, ଜିଲ୍ଲା ସାଧାରଣ ସମ୍ପାଦକ ଗୋପାଳ କୃଷ୍ଣ ପଣ୍ଡା ପ୍ରମୁଖ ଯୋଗ ଦେଇଥିଲେ । ସ୍ୱାଭିମାନ ଅଞ୍ଚଳର ବିକାଶ ଧାରା ଜାରି ରହିଥିବାରୁ ଆଗକୁ ଆହୁରି ଶତାଧିକ କର୍ମୀ ଯୋଗ ଦେବେ ବୋଲି ଆଶା କରାଯାଉଛି ।
